ទិន្នន័យស្ដីពីពាណិជ្ជកម្មរបស់ក្រសួងហិរញ្ញវត្ថុជប៉ុនបានបង្ហាញថា ប្រទេសជប៉ុនបាននាំចូលធ្យូងថ្មចំនួន ២៣ ម៉ឺនតោន មកពីប្រទេសរុស្ស៊ីនៅក្នុងខែកុម្ភៈ ពោលគឺ ៧៣% តិចជាងការនាំចូលនៅក្នុងអំឡុងពេលដូចគ្នាកាលពីឆ្នាំមុន ខណៈដែលធ្យូងថ្មរុស្ស៊ីមានចំនួនត្រឹមតែ ២% នៃការនាំចូលសរុប ដោយបានធ្លាក់ចុះពីអត្រា ៩% កាលពីឆ្នាំមុន។
ការធ្លាក់ចុះនេះបានបង្ហាញពីវឌ្ឍនភាពរបស់ប្រទេសជប៉ុន ដូចអ្វីដែលក្រុមប្រទេសជឿនលឿន៧ (ជី៧) បានធ្វើការសន្យាកាលពីឆ្នាំ២០២២ ក្នុងការបញ្ឈប់ឬហាមឃាត់ពាណិជ្ជកម្មធ្យូងថ្មរបស់រុស្ស៊ី ដែលជាប្រភពប្រាក់ចំណូលដ៏សំខាន់សម្រាប់ទ្រទ្រង់សង្គ្រាមរបស់ទីក្រុងម៉ូស្គូនៅអ៊ុយក្រែន។
ប្រទេសជប៉ុនបាននាំចូលធ្យូងថ្មមកពីប្រទេសរុស្ស៊ីក្នុងចំនួនសរុបប្រហែល ៦,៥ លានតោន ពីខែមេសា ឆ្នាំ២០២២ ដល់ខែកុម្ភៈ ឆ្នាំ ២០២៣ គឺបានថយចុះ ៤៥%។
ចំណែកការនាំចូលធ្យូងថ្មមកពីប្រទេសឥណ្ឌូនេស៊ីវិញ គឺបានកើនឡើង ២៨% ក្នុងអំឡុងពេលដូចគ្នាដែលធ្វើឱ្យឥណ្ឌូនេស៊ីជែងដាច់រុស្ស៊ី ដើម្បីក្លាយជាអ្នកផ្គត់ផ្គង់ធំបំផុតទី២របស់ជប៉ុន។ កាលពីមុនសង្គ្រាមនៅអ៊ុយក្រែន ឥណ្ឌូនេស៊ីឈរនៅចំណាត់ថ្នាក់ទី៣ក្នុងការនាំចេញធ្យូងថ្មទៅជប៉ុន។ ទន្ទឹមនឹងនេះដែរ ការនាំចូលធ្យូងថ្មមកពីប្រទេសកាណាដាបានកើនឡើងទ្វេដងខណៈដែលធ្យូងថ្មមកពីប្រទេសអាហ្វ្រិកខាងត្បូងបានកើនឡើងប្រហែល៦ដងឯណោះ។
អត្ថបទគួរអាន
ផ្ទុយទៅវិញ ការនាំចូលឧស្ម័នធម្មជាតិរាវមកពីរុស្ស៊ីបានធ្លាក់ចុះត្រឹមតែប្រហែល ២០% ប៉ុណ្ណោះកាលពីខែកុម្ភៈឆ្នាំ២០២៣ បើធៀបនឹងរយៈពេលដូចគ្នាកាលពីឆ្នាំមុន ដោយសារជប៉ុនមានការលំបាកក្នុងការស្វែងរកប្រភពឧស្ម័នធម្មជាតិរាវ (LNG) មកជំនួសឧស្ម័នរបស់រុស្ស៊ី។
សូមរំលឹកថា នៅខែមេសា ឆ្នាំ២០២២ រដ្ឋាភិបាលជប៉ុនបានកំណត់កាត់បន្ថយការពឹងផ្អែកលើការនាំចូលធ្យូងថ្មរបស់រុស្ស៊ី ហើយក្រុមហ៊ុនថាមពលជប៉ុនបានដើរតួនាទីយ៉ាងសំខាន់ក្នុងកិច្ចខិតខំប្រឹងប្រែងមួយនេះ។ ធ្យូងថ្មនាំចូលពី ៦០% ទៅ ៧០% ដឹកឆ្ពោះទៅប្រើសម្រាប់ការផលិតអគ្គិសនី។ ប្រទេសរុស្ស៊ីគឺជាអ្នកផ្គត់ផ្គង់ធំទី២របស់ជប៉ុនក្នុងឆ្នាំសារពើពន្ធ២០២១ បន្ទាប់ពីប្រទេសអូស្ត្រាលី។
កម្លាំងនៃការផ្គត់ផ្គង់ និងតម្រូវការបានជំរុញឱ្យតម្លៃធ្យូងថ្មកើនឡើង បន្ទាប់ពីសង្គ្រាមនៅអ៊ុយក្រែនបានចាប់ផ្តើម ដែលធ្វើឱ្យជប៉ុនប្រឈមមុខនឹងបញ្ហាផ្ទាល់ខ្លួនលើការនាំចូលវត្ថុធាតុផលិតថាមពលមួយនេះ។
តម្លៃនាំចូលជាមធ្យមរបស់ជប៉ុនសម្រាប់ធ្យូងថ្ម បានកើនឡើងដល់ប្រហែល ៣៧៨ ដុល្លារក្នុង១តោន ពីខែមេសា ឆ្នាំ២០២២ ដល់ខែកុម្ភៈ ឆ្នាំ២០២៣ គឺបានកើនឡើងជិត៣ដង បើធៀបនឹងតម្លៃក្នុងពេលដូចគ្នាកាលពីឆ្នាំមុន។ ទោះយ៉ាងណាក៏ដោយ តម្លៃធ្យូងថ្មអន្តរជាតិបានធូរស្រាលជាងមុននៅឆ្នាំនេះ ប៉ុន្តែធ្យូងថ្មអូស្ត្រាលីបានហក់ឡើងក្នុងតម្លៃ ២០០ ដុល្លារក្នុងមួយតោននៅចុងខែកុម្ភៈ ដែលវានៅតែកើនឡើងជិតទ្វេដង បើធៀបនឹងឆមាសទី១នៅក្នុងឆ្នាំ២០២១៕
អត្ថបទ៖ សុខ ជា
