លោកកាំង ម៉ូនីកា អគ្គលេខាធិការរងនៃសមាគមរោងចក្រកាត់ដេរនៅកម្ពុជា បានបញ្ជាក់នៅថ្ងៃនេះថា កន្លងមកសមាជិករបស់សមាគមរោងចក្រកាត់ដេរនៅកម្ពុជា មិនមានរោងចក្រណាមួយផលិតម៉ាស់នោះទេ ពោលគឺពួកគេមានផលិតតែផលិតផលសម្លៀកបំពាក់ ស្បែកជើង និងកាបូបប៉ុណ្ណោះ។ ណាមួយការរៀបចំឲ្យមានការផលិតម៉ាស់ភ្លាមៗយ៉ាងដូច្នេះ វាក៏មិនមែនជាការងាយស្រួលនោះដែរ។
លោកកាំង ម៉ូនីកា និយាយថា «និយាយទៅកន្លងមក សមាជិករោងចក្រយើង មិនមានរោងចក្រណាមួយផលិតម៉ាស់ទេបាទ! រោងចក្រភាគច្រើនគាត់ផលិតតែសម្លៀកបំពាក់សម្រាប់នាំចេញ។ អញ្ចឹងការរៀបចំផលិតអីភ្លាមៗ វាក៏មិនមែនជាការងាយស្រួលដែរបាទ»។
លោកកាំង ម៉ូនីកា បានបន្ថែមទៀតថា តាមច្បាប់ រោងចក្រកាត់ដេរទទួលបានអាជ្ញាបណ្ណវិនិយោគពីរាជរដ្ឋាភិបាលកម្ពុជា សម្រាប់ការផលិតដើម្បីនាំចេញលក់ទៅក្រៅប្រទេស ដូច្នេះ សម្រាប់ការនាំចូលដូចជាវត្ថុធាតុដើមសម្រាប់ការផលិត គឺទទួលបានការលើកលែងពន្ធ។ ប៉ុន្ដែ សម្រាប់ការផលិតដើម្បីលក់ក្នុងទីផ្សារក្នុងស្រុកវិញ វានឹងត្រូវជាប់នូវបទប្បញ្ញាតិផ្សេងទៀត ដូចជាត្រូវជាប់ពន្ធនាំចូល និងពន្ធគយជាដើម។
អត្ថបទទាក់ទង!
មិនតែប៉ុណ្ណោះ លោក កាំង ម៉ូនីកា បានសង្ងត់ធ្ងន់ទៀតថា សម្រាប់ការផលិតម៉ាស់ពាក់ ដើម្បីការពារមេរោគនេះ គេមិនមែនចេះតែយកសាច់ក្រណាត់ណាក៏មកដេរធ្វើម៉ាស់បាននោះទេ វាត្រូវការសាច់ក្រណាត់ដែលមានគុណភាពសម្រាប់ការផលិត ហើយការផលិតសម្ភារសុខាភិបាលនេះទៀតសោត ក៏ត្រូវការឆ្លងកាត់ការវាយតម្លៃគុណភាព ពីស្ថាប័នសុខាភិបាលផងដែរ ទើបអាចចរាចរលក់ចេញលើទីផ្សារបាន។ លោកកាំង ម៉ូនីកា បញ្ជាក់ដោយខ្លីថា ជារួម សម្រាប់កម្ពុជា ការផលិតម៉ាស់នេះ គឺចាប់ផ្ដើមពីចំណុចសូន្យទៅ ដូច្នេះ បើចង់សម្រេចបានការផលិត គឺត្រូវការពេលវេលាច្រើនទៀត មិនអាចធ្វើទៅបានភ្លាមៗនោះទេ។
លោក កាំង មូនីកា បញ្ជាក់យ៉ាងដូច្នេះថា «យើងអាចផលិត (ម៉ាស់) បាន ប៉ុន្ដែ យើងត្រូវការពេលវេលា។ ការផលិតរបស់អ្វីមួយ ហើយពិសេសទៅទៀតនោះ ការផលិតរបស់របរប្រើប្រាស់សម្រាប់ផ្គត់ផ្គង់ទៅឲ្យផ្នែកពេទ្យ ផ្នែកសុខាភិបាល គេត្រូវការស្ដង់ដារមួយ ដែលគេទទួលស្គាល់ទៀត មិនអញ្ចឹង?...វាត្រូវការការទទួលស្គាល់ត្រឹមត្រូវក្នុងកម្រិតទប់ស្កាត់វីរុសហ្នឹង ទប់ស្កាត់បានប៉ុន្មានភាគរយ អីប៉ុន្មានភាគរយ វាត្រូវស្ដង់ដារគេទទួលស្គាល់ ចឹងមិនមែនថា យើងចេះតែដេរ ដេរប្រើ ដេរប្រើទេ!»។
សូមបញ្ជាក់ថា កាលពីថ្ងៃទី ៣០ ខែមករា ឆ្នាំ២០២០ កន្លងទៅថ្មីៗនេះ ប្រមុខរាជរដ្ឋាភិបាលកម្ពុជា សម្តេច តេជោ ហ៊ុន សែន ប្រកាសអំពាវនាវដល់ អ្នកលក់ម៉ាស់កុំឆ្លៀតដំឡើងថ្លៃ ត្រូវជួយគ្នាក្នុងគ្រាក្រ កុំឆ្លៀតកេងចំណេញពេលមានតម្រូវការ។ ជាមួយគ្នានោះ សម្តេច ហ៊ុន សែន ក៏បានអំពាវនាវឲ្យរោងចក្រកាត់ដេរ ជួយផលិតម៉ាស់បន្ថែម ដើម្បីលក់ឲ្យរដ្ឋវិញ។ ហើយសម្តេច ក៏បានបញ្ជាឲ្យក្រសួងការងារ និង ក្រសួងសុខាភិបាល ត្រូវសហការគ្នាជាមួយសមាគមរោងចក្រកាត់ដេរ ដើម្បីផលិតម៉ាស់បន្ថែម។ ក្នុងនោះ រដ្ឋត្រូវទទួលខុសត្រូវក្នុងការទទួលទិញម៉ាស់ទាំងនោះ តាមស្តង់ដារ ដែលប្រគល់ឱ្យរោងចក្រផលិត។
អត្ថបទពិសេស!
សម្ដេច បានមានប្រសាសន៍យ៉ាងដូច្នេះថា «រោងចក្រយើងមានច្រើនណាស់ ដេរបន្ថែម! ក្រសួងសុខាភិបាល ត្រូវធ្វើការជាមួយក្រសួងការងារ និងសមាគមរោងចក្រកាត់ដេរ ដើម្បីផលិតម៉ាស់បន្ថែម ព្រោះយើងមានត្រូវការបន្ដ ព្រោះអាម៉ាស់ហ្នឹងខ្លះគេយកទៅបោក អាចប្រើបានបន្ដ ប៉ុន្ដែ មិនអាចប្រើមួយហ្នឹងបាន...វាត្រៀមលក្ខណៈក្រែងលោវាអូសបន្លាយពេល ដូច្នេះត្រូវផលិតម៉ាស់។ រោចក្រយើងមានច្រើនណាស់ រដ្ឋត្រូវទទួលខុសត្រូវក្នុងការទិញម៉ាស់ពីរោងចក្រដែលផលិតម៉ាស់។ ទៅចុះកុងត្រា រោងចក្រនេះផលិតប៉ុណ្ណេះ! រោងចក្រនេះផលិតប៉ុណ្ណេះ! ទៅតាមស្ដង់ដារ ដែលយើងប្រគល់ឲ្យគេផលិត។»
សូមបញ្ជាក់ថា តម្រូវការម៉ាស់មានការកើនឡើងខ្លាំង បន្ទាប់ពីមានការផ្ទុះឡើងនៃវីរុសកូរ៉ូណា ហើយមិនមែនតែប្រទេសកម្ពុជានោះទេ ដែលកំពុងមានតម្រូវការម៉ាស់ និងតម្លៃម៉ាស់ឡើងថ្លៃខ្លាំង សូម្បីតែនៅប្រទេសមួយចំនួន ដូចជាចិន ថៃ និងវៀតណាម ជាដើម ក៏ជួបបញ្ហាម៉ាស់ឡើងថ្លៃនេះដែរ ប៉ុន្ដែប្រទេសទាំងនោះ បានដាក់វិធានការជាបន្តបន្ទាប់ ដើម្បីទប់ទល់នឹងបញ្ហានេះ។
អត្ថបទគួរឲ្យចាប់អារម្មណ៍
បើតាមសមាគមរោងចក្រកាត់ដេរកម្ពុជា បានអះអាងថា មកទល់ពេលនេះ វិស័យកាត់ដេរកម្ពុជា ក៏ដូចជាការនាំចេញនៃវិស័យនេះ នៅតែមានសភាពនឹងនដូចធម្មតា ខណៈដែលសមាគមបានបញ្ជាក់ថា ខ្លួនក៏បាននិងកំពុងធ្វើការងារយ៉ាងជាប់លាប់ជាមួយនឹងកម្មករកម្មារិនី ក្នុងការផ្សព្វផ្សាយ និងអប់រំពីការរីករាលដាលនៃវីរុសកូរ៉ូណានេះផងដែរ ហើយមកទល់ពេលនេះ សមាគម ក៏មិនទាន់ទទួលបានព័ត៌មានថា មានកម្មករកម្មារិនីរោងចក្រណាមួយដែលឈប់ធ្វើការ ព្រោះតែភ័យខ្លាចនឹងការឆ្លងនៃវីរុសកូរ៉ូណានេះដែរ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
