ជប៉ុនស្នើឱ្យប្រទេសអារ៉ាប់រួមបង្កើនការផ្គត់ផ្គង់ប្រេង ខណៈដែលវិបត្តិអ៊ុយក្រែនជំរុញឲ្យតម្លៃប្រេងកើនឡើង

រដ្ឋមន្ត្រីការបរទេសជប៉ុន លោក Yoshimasa Hayashi ក្នុងអំឡុងពេលកិច្ចពិភាក្សានៅប្រទេសអារ៉ាប់រួមបានលើកឡើងថា ប្រទេសជប៉ុនមានការព្រួយបារម្ភ ចំពោះការកើនឡើងនៃទីផ្សារប្រេងនាពេលថ្មីៗនេះ ហើយសង្ឃឹមថា ប្រទេសអារ៉ាប់រួម នឹងដើរតួនាទីក្នុងការរក្សាស្ថិរភាពទីផ្សារប្រេងពិភពលោក តាមរយៈការបូមប្រេងកាន់តែច្រើនបន្ថែមទៀត ដើម្បីបំពេញតម្រូវទីផ្សារ ខណៈដែលរុស្ស៊ីកំពុងជាប់គាំងការផ្គត់ផ្គង់ទៅកាន់ប្រទេសមួយចំនួន។ 

ស្របពេលជាមួយគ្នានោះផងដែរ ក្នុងនាមជាប្រទេសនាំចេញប្រេងដ៏សំខាន់មួយទៅកាន់ប្រទេសជប៉ុន រដ្ឋមន្ត្រីក្រសួងការបរទេស អារ៉ាប់រួម បានបង្ហាញពីការតាំងចិត្តរបស់ប្រទេសខ្លួន ក្នុងការសម្របសម្រួលឱ្យកាន់តែស៊ីជម្រៅរវាងប្រទេសទាំងពីរដោយអះអាងថា ទំនាក់ទំនងរវាងអារ៉ាប់រួម និងប្រទេសជប៉ុនជាដៃគូយុទ្ធសាស្ត្រដ៏មានសារៈសំខាន់ដែលមិនអាចខ្វះបាន ហើយខ្លួននឹងធ្វើការសម្របសម្រួលតាមដែលអាចធ្វើទៅបាន។

ជាមួយគ្នានេះ នាយករដ្ឋមន្ត្រីជប៉ុនលោក Fumio Kishida នៅដើមខែនេះក៏បានហៅទូរស័ព្ទជាមួយព្រះអង្គម្ចាស់ ស៊ិក មហាម៉េត ប៊ីនសាយិត អាល់ណាយាន (Sheikh Mohamed bin Zayed Al Nahyan) នៃប្រទេសអារ៉ាប់រួម ដើម្បីស្នើឱ្យ អារ៉ាប់រួម ធ្វើការរួមចំណែកយ៉ាងសកម្ម ដើម្បីជួយរក្សាស្ថិរភាពទីផ្សារប្រេងឆៅ ។

គួរកត់សម្គាល់ថា ការហៅទូរសព្ទម្តងហើយម្តងទៀតរបស់ថ្នាក់ដឹកនាំប្រទេសជប៉ុនទៅកាន់មន្ត្រីជាន់ខ្ពស់អារ៉ាប់រួមនាពេលកន្លងមកនេះ បានគូសបញ្ជាក់ពីការព្រួយបារម្ភរបស់ប្រទេសជប៉ុនអំពីផលប៉ះពាល់នៃតម្លៃប្រេងកាន់តែកើនឡើង នៅក្នុងពេលវេលាកន្លងមកនេះ នៅគ្រាដែលទីក្រុងតូក្យូកំពុងសម្លឹងរកមើលការស្ដារកំណើនសេដ្ឋកិច្ចឡើងវិញ បន្ទាប់ពីការធ្លាក់ចុះសេដ្ឋកិច្ចយ៉ាងខ្លាំង ដែលបណ្តាលមកពីជំងឺរាតត្បាតកូវីត ១៩។

ចាប់តាំងពីរុស្ស៊ីឈ្លានពានអ៊ុយក្រែនមក ក្តីបារម្ភលើការផ្គត់ផ្គង់ថាមពលពីរុស្ស៊ី ដែលជាប្រទេសផលិតប្រេងឆៅ និងឧស្ម័នធម្មជាតិដ៏សំខាន់មួយរបស់ពិភពលោក បានធ្វើឱ្យតម្លៃប្រេងឆៅឡើងថ្លៃរហូតដល់ ១៣០ ដុល្លាក្នុងមួយបារ៉ែល កាលពីសប្ដាហ៍មុន។

គួរជម្រាបថា លទ្ធកម្មប្រេងដែលមានស្ថិរភាព គឺ មានសារៈសំខាន់សម្រាប់ប្រទេសជប៉ុន ដែលខ្វះខាតធនធានប្រេង និងពឹងផ្អែកលើការនាំចូល ដើម្បីបំពេញតម្រូវការប្រើប្រាស់ប្រេងស្ទើរតែទាំងស្រុង។ ការផ្គត់ផ្គង់ប្រេងពីប្រទេសអារ៉ាប់រួមមានចំនួនប្រហែល ៣០% នៃការនាំចូលសរុបរបស់ជប៉ុន៕