មានក្រុមហ៊ុនចំនួន ៥៧ រួមទាំងក្រុមហ៊ុនឯកជនផលិតម៉ាសមុខ Iris Ohyama Inc. និង ក្រុមហ៊ុនSharp Corp. នឹងទទួលបានទឹកប្រាក់សរុបប្រមាណ៥៣៦ លានដុល្លារអាមេរិកដែលជាប្រាក់ឧបត្ថម្ភធនពីរាជរដ្ឋាភិបាលជប៉ុន ដើម្បីមានលទ្ធភាពអាចរើរោងចក្រចេញពីប្រទេសចិន ត្រឡប់ទៅប្រទេសជប៉ុនវិញ ឬប្រទេសក្នុងតំបន់អាស៊ីអាគ្នេយ៍ផ្សេងទៀត។ នេះបើតាមការអះអាងរបស់ក្រសួងសេដ្ឋកិច្ច ពាណិជ្ជកម្ម និងឧស្សាហកម្មជប៉ុន។
ក្រុមហ៊ុនចំនួន ៣០ផ្សេងទៀត នឹងទទួលបានថវិកាដើម្បីរើទៅកាន់ប្រទេសវៀតណាម, មីយ៉ាន់ម៉ា, ថៃ និងប្រទេសតំបន់អាស៊ីអាគ្នេយ៍ផ្សេងទៀត។ នេះបើយោងតាមសេចក្ដីប្រកាសព័ត៌មានមួយដាច់ដោយឡែក ប៉ុន្ដែមិនមានបញ្ជាក់លម្អិតពីចំនួនទឹកប្រាក់ជាក់លាក់នោះទេ។
អត្ថបទទាក់ទង!
តាមការរាយការណ៍របស់កាសែត Nikkei បានឲ្យដឹងដែរថា រាជរដ្ឋាភិបាលជប៉ុន នឹងចំណាយសរុបដល់ទៅ ៧០ពាន់លានយេន ឬស្មើនឹងប្រមាណ ជាង ៦៥០ លានដុល្លារអាមេរិក នៅជុំនេះ ទាក់ទងនឹងការជួយឲ្យរោងចក្រជប៉ុនរើចេញពីប្រទេសចិន។ ការចំណាយ គឺបានមកពីកញ្ចប់ថវិកាសរុប ២៤៣,៥ ពាន់លានយេន ដែលរាជរដ្ឋាភិបាល បានរៀបចំទុកនៅក្នុងខែមេសា ដើម្បីកាត់បន្ថយការពឹងផ្អែកខ្លាំងលើខ្សែចង្វាក់ផ្គត់ផ្គង់ពីចិន ដោយថវិកានេះ មានគោលបំណងជួយក្រុមហ៊ុនជប៉ុន ឲ្យរើរោងចក្រពីចិន មកកាន់ជប៉ុនវិញ ឬទៅកាន់ប្រទេសផ្សេងទៀតក្រៅពីចិន។
នៅពេលដែលទំនាក់ទំនងរវាងអាមេរិក និងចិនកាន់តែយ៉ាប់យ៉ឺនហើយសង្គ្រាមពាណិជ្ជកម្មកាន់តែអាក្រក់ទៅៗនោះ មានការពិភាក្សាគ្នាកាន់តែច្រើននៅអាមេរិក និងកន្លែងផ្សេងទៀត អំពីវិធីសាស្ត្រ “បំបែក” សេដ្ឋកិច្ច និងក្រុមហ៊ុន ចេញពីប្រទេសចិន។ ក្នុងនោះ ប្រទេសជប៉ុនបានសម្រេចចិត្តស្រដៀងគ្នាទៅនឹងគោលនយោបាយរបស់តៃវ៉ាន់នៅក្នុងឆ្នាំ២០១៩ ដែលមានគោលបំណងនាំយកការវិនិយោគពីប្រទេសចិនត្រឡប់មកប្រទេសកំណើតវិញ។ មកទល់ពេលនេះ មិនមានប្រទេសណាផ្សេងទៀតទេ ដែលបានអនុវត្តគោលនយោបាយច្បាស់លាស់ដើម្បីលើកទឹកចិត្ត ដល់ការរើរោងចក្រនេះទេ។
ប្រទេសចិន គឺជាដៃគូពាណិជ្ជកម្មដ៏ធំបំផុតរបស់ប្រទេសជប៉ុន ក្រោមកាលៈទេសៈធម្មតា ហើយក្រុមហ៊ុនជប៉ុនមានការវិនិយោគយ៉ាងច្រើនសន្ធឹកសន្ធាប់នៅក្នុងប្រទេសចិន។ ការផ្ទុះឡើងនៃ មេរោគរាតត្បាត បានធ្វើឲ្យខូចទំនាក់ទំនងសេដ្ឋកិច្ចរវាងប្រទេសទាំងពីរ។ រាជរដ្ឋាភិបាលរបស់លោកនាយករដ្ឋមន្ត្រីជប៉ុន Shinzo Abe បានព្យាយាមជាច្រើនឆ្នាំដើម្បីធ្វើឲ្យមានភាពប្រសើរឡើងនៃទំនាក់ទំនងជាមួយប្រទេសចិន បន្ទាប់ពីមានកុបកម្មប្រឆាំងនឹងជប៉ុនក្នុងឆ្នាំ២០១២ ប៉ុន្ដែ ដោយសារតែមេរោគរាតត្បាត និងជម្លោះដែនកោះ និងតំបន់ផលិតឧស្ម័នក្នុងសមុទ្រចិនខាងកើត បានធ្វើប៉ះទង្គិចដល់កិច្ចខិតខំប្រឹងប្រែងទាំងនោះ៕
None
