នេះបើតាមការចុះផ្សាយដោយសារព័ត៌មានធំៗជាច្រើន។
កូរ៉េខាងជើង បានប្រកាសពីការរកឃើញករណីឆ្លង និងស្លាប់ដោយសារជំងឺកូវីដ១៩ លើកដំបូងកាលពីសប្ដាហ៍មុននេះ ហើយបច្ចុប្បន្នប្រទេសឯកោមួយនេះ កំពុងប្រយុទ្ធប្រឆាំងនឹងការផ្ទុះឡើងនៃជំងឺកូវីដ១៩កាន់តែច្រើនឡើងៗ ខណៈអ្នកជំនាញបានលើកឡើងពីការព្រួយបារម្ភថា មេរោគនេះអាចបំផ្លិចបំផ្លាញធំធេងដល់ទីក្រុងព្យុងយ៉ាង ដ្បិតថាប្រទេសនេះមានការផ្គត់ផ្គង់ផ្នែកវេជ្ជសាស្ត្រខ្សោយ និង មិនមានកម្មវិធីចាក់វ៉ាក់សាំងកូវីដ១៩ដល់ប្រជាជននោះទេ។
ទីភ្នាក់ងារសារព័ត៌មានរដ្ឋ KCNA បានរាយការណ៍ថា នៅក្នុងកិច្ចប្រជុំបន្ទាន់នៃការិយាល័យនយោបាយដែលបានធ្វើឡើងកាលពីថ្ងៃអាទិត្យ លោក គីម ជុងអ៊ុន បានរិះគន់ចំពោះអាកប្បកិរិយាការងារគ្មានការទទួលខុសត្រូវរបស់គណៈរដ្ឋមន្ត្រី និងផ្នែកសុខភាពសាធារណៈជាខ្លាំង ចំពោះការរៀបចំការអនុវត្តផែនការសកម្មភាពក្នុងការទប់ស្កាត់ការរីករាលដាលនៃជំងឺកូវីត ១៩ មិនបានត្រឹមត្រូវ។ រដ្ឋាភិបាលទីក្រុងព្យុងយ៉ាង ក៏បានបញ្ជាឱ្យចែកចាយទុនបម្រុងឱសថជាតិរបស់ខ្លួនដែរ ប៉ុន្តែលោក គីម ជុងអ៊ុន បានអះអាងថា ថ្នាំដែលបញ្ជូនដោយរដ្ឋទាំងនោះ មិនបានទៅដល់ប្រជាជនទាន់ពេលវេលា និងមានដាក់លក់បានត្រឹមត្រូវតាមឱសថស្ថាននោះទេ។
ស្របពេលជាមួយគ្នានោះ លោកគីម ជុងអ៊ុន បានបញ្ជាឱ្យ កងកម្លាំងពិសេស នៃក្រុមគ្រូពេទ្យរបស់កងទ័ពទៅធ្វើការសម្របសម្រួល ដើម្បីធ្វើយ៉ាងណារក្សាស្ថិរភាពនៃការផ្គត់ផ្គង់ថ្នាំឲ្យបានទាន់ពេលវេលា នៅក្នុងទីក្រុងព្យុងយ៉ាង។
អត្ថបទគួរអាន
គួរកត់សម្គាល់ថា ប្រទេសកូរ៉េខាងជើងមានអ្នកស្លាប់ដោយសារមេរោគបំប្លែងថ្មី កូវីដ ១៩ ដោយសារតែប្រជាជនធ្វេសប្រហែសក្នុងការប្រើថ្នាំ កង្វះចំណេះដឹង និង ការយល់ដឹងអំពីវិធីព្យាបាលមេរោគបំប្លែងថ្មីនេះ ។
គិត្រឹមថ្ងៃអាទិត្យទី ១៥ឧសភា ប្រទេសកូរ៉េខាងជើងមានអ្នកស្លាប់ដល់ទៅ ៥០នាក់ហើយ ដោយក្នុងនោះ អ្នកមានចេញការៈរោគគ្រុនក្ដៅខ្លួនសរុបមានជាង១លាន២សែននាក់ ប៉ុន្ដែ អាជ្ញាធរក្រុងព្យុងយ៉ាងមិនបានបញ្ជាក់នោះទេថាតើក្នុងចំណោមអ្នកមានចេញរោគសញ្ញាទាំងនោះ មានប៉ុន្មាននាក់ ដែលបានធ្វើតេស្ដកូវីដ១៩នោះទេ។
កន្លងមក ប្រទេសកូរ៉េខាងជើងនៃរដ្ឋដ៏ឯកោមួយនេះមិនបានទទួលទិញ ឫ ទទួលការផ្តល់ជំនួយវ៉ាក់សាំងពីបណ្តាប្រទេសអន្តជាតិណាឡើយ។
ទោះជាយ៉ាងនេះក្តី នៅពេលដែលកូរ៉ខាងជើងបានប្រកាសពីការផ្ទុះឡើងនៃមេរោគកូវីត ១៩ ក្នុងប្រទេសរបស់ខ្លួនជាលើកដំបូង ប្រធានាធិបតីកូរ៉េខាងត្បូង លោក Yoon Suk-yeol បាននិយាយ នៅក្នុងសន្ទរកថាមួយក្នុងកិច្ចប្រជុំពេញអង្គនៃរដ្ឋសភាថា ប្រសិនបើប្រទេសកូរ៉េខាងជើងឆ្លើយតប ទទួលយកចំពោះជំនួយគាំទ្ររបស់ខ្លួន កូរ៉េខាងត្បូងនឹងផ្តល់ជំនួយមនុស្សធម៌ រួមទាំងវ៉ាក់សាំងបង្ការមេរោគកូវីត ១៩ បរិក្ខារពេទ្យ និង បុគ្គលិកសុខាភិបាលដើម្បីទៅជួយ ភ្លាមតែម្ដង។
ទន្ទឹមនឹងនេះ WHO ក៏បានប្រកាសថាខ្លួនបានត្រៀមជាស្រេចក្នុងការគាំទ្រកូរ៉េខាងជើងប្រយុទ្ធប្រឆាំងនឹងការឆ្លងមេរោគកូវីដ១៩ ផងដែរ។ ប៉ុន្ដែ មកទល់នឹងថ្ងៃទី ១៦ ឧសភានេះ នៅមិនទាន់មានការឆ្លើយតបបែបណាពីរដ្ឋអំណាចក្រុងព្យុងយ៉ាងនៅឡើយទេ៕
អត្ថបទ៖ វ៉ាន់ ស្រីរ័ត្ន
None
