មហាសេដ្ឋី គិត ម៉េង បោះទុន ២៣០លានដុល្លារសង់អគារពាណិជ្ជកម្មភ្លោះ ៦២ជាន់

បើតាម​គម្រោង​ផែនការ អគារ Royal One នេះ នឹងធ្វើការ​សាងសង់​ដោយក្រុម​ហ៊ុន​សំណង់​ចិន Huashi Group ជាក្រុម​ហ៊ុន​សំណង់​ធំ​មក​​ពីប្រទេស​ចិន មានបទពិសោធន៍​ខ្ពស់​ក្នុងការ​សាងសង់​អគារធំៗ​ខ្ពស់ៗ​ខ្នាត​អន្តរជាតិ ដែលនឹង​ចំណាយ​​ពេលវេលា​សាងសង់ ៥ឆ្នាំ​ដើម្បី​បញ្ចប់​​គម្រោង​​ទាំងមូល ។

Royal One គឺជា​អគារភ្លោះ​ពាណិជ្ជកម្ម មានកម្ពស់ ៦២ ជាន់​ឡើង​ទៅលើ និង ៦ជាន់​ផ្សេង​ទៀតទៅ​ក្រោមដី ដោយ​ត្រូវ​​សាងសង់​​ឡើង​នៅ​លើ​ផ្ទៃ​ដី​​ទំហំ ៤.០៣៦​​ម៉ែត្រ​ការ៉េ។

នេះគឺជាការ​វិនិយោគ​ថ្មីមួយ ប្រចាំដើម​ឆ្នាំ២០១៩​នេះ របស់​មហាសេដ្ឋីអ្នកឧកញ៉ា គិត ម៉េង ដែល​សាធារណជន​​ទូទៅ​ស្គាល់​យ៉ាងច្បាស់ថា ជាអ្នកជំនួញ​ខ្មែរ​មួយរួប បានធ្វើការ​វិនិយោគ​​គ្រប​​ដណ្ដប់​​លើ​វិស័យ​​សំខាន់ៗ​ជា​ច្រើន​ក្នុង​សេដ្ឋកិច្ច​របស់​កម្ពុជា មានដូចជា ​វិស័យ​ទូរគមនាគមន៍ ការ​ដឹក​ជញ្ជូន ថាមពល ប្រព័ន្ធ​ផ្សព្វផ្សាយ ធនាគារ​និង​ហិរញ្ញវត្ថុ ធានា​រ៉ាប់រង សណ្ឋាគារ និង​រមណីយ​ដ្ឋាន ការ​អប់រំ អភិវឌ្ឍន៍​អចលន​ទ្រព្យ ការជួញ​ដូរ​ទំនិញ និង​កសិកម្ម​ជា​ដើម។

«Royal One» គឺជា អគារ​ភ្លោះ​​ប្រភេទ​អគារ​ពាណិជ្ជកម្ម​ចម្រុះ ​ខុនដូ ផ្សារទំនើប សណ្ឋាគារ ក្លិបកំសាន្ត ក្លិបហាត់ប្រាណ ភោជនីយដ្ឋាន និង មជ្ឈមណ្ឌលកំសាន្តផ្សេងៗ ។ វានឹងផុស​លេចរូបរាង​ឡើងនៅ​ដង​មហាវិថី​សហព័ន្ធ​រុស្ស៊ី ​កែង​គ្នារវាង​និង​មហាវិថី​ព្រះមុនីវង្ស ស្ថិតនៅក្នុង​តំបន់​​​ពាណិជ្ជ​កម្ម​​ប្រជុំដោយអគារខ្ពស់ៗដូចជា អគារកាណា​ឌីយ៉ា អគារ វឌ្ឍនៈថៅវើរ និង អគារ Exchange Square ជាដើម។

វិស័យ​សំណង់​នៅកម្ពុជា​បានកើនឡើង​យ៉ាងឆាប់រហ័ស​ក្នុងរយៈពេល​ជិត​២ ទសវត្សរ៍​មកនេះ រាជរដ្ឋាភិបាល​កម្ពុជា តាមរយៈ​ក្រសួងរៀប​ចំដែនដី​នគរូបនីយកម្ម និងសំណង់ បានសម្រេចចេញ​លិខិត​អនុញ្ញាត​សាងសង់​សំណង់​នៅទូទាំង​ប្រទេស ប្រមាណ​ជាង ៤៣.១៣៦ គម្រោង ស្មើ​នឹង​តម្លៃទុន​វិនិយោគ​សរុប ជាង ៤៣.៣៧០ លាន​ដុល្លារអាមេរិក ក្នុងនោះ​គម្រោង​អគារខ្ពស់ៗ​ចាប់ពី​៥ជាន់​ឡើង​ទៅមាន​ជាង ១.២០០អគារ និងលំនៅដ្ឋាន លក្ខណៈបុរី​ចំនួន​ ២៣៥ ទីតាំង។

សូមជម្រាប​ផងដែរថា នៅឆ្នាំ២០១៨ កន្លងមក​នេះ តម្លៃទុន​វិនិយោគ​លើវិស័យសំណង់​មានការថយចុះ​ប្រមាណ​ជាង ១៨ភាគរយ ដែលមាន​តម្លៃទុន​វិនិយោគ​ត្រឹមជាង ៥ពាន់​លាន​ដុល្លារ ខណៈឆ្នាំ​២០១៧ តម្លៃទុន​វិនិយោគ​មាន​រហូតជាង ៦ពាន់​លាន​ដុល្លារ។ ចំណែក​ចំនួន​គម្រោង ​ស្នើ​សុំច្បាប់​សាងសង់​នៅក្នុង​វិស័យ​សំណង់ ក៏បង្ហាញ​ពីតួរលេខ​ថយចុះ​ដែរ ដែលមាន​ចំនួនគម្រោង​សរុប​ជាង ២.៨៦៧ គម្រោង បើធៀបនឹង​ឆ្នាំ​២០១៧ មាន​៣ពាន់​គម្រោង។

ក្នុងឆ្នាំ២០១៨ នោះដែរ មាន​សំណង់លំនៅ​ដ្ឋាន​ចំនួន ២.៤២០ គម្រោង ទុនវិនិយោគ​ប្រមាណជាង ១.៨០០​លានដុល្លារ ស្មើ​នឹងជាង ១,៨​ម៉ឺន​ខ្នង និងគម្រោង​អគារ​ខ្ពស់ៗ​ចាប់ពី ៥ជាន់​ឡើង​ទៅ​នៅក្នុង​រាជធានី​ភ្នំពេញ​នៅឆ្នាំ​២០១៨ នេះដែរ គឺមាន​ចំនួន ១១០អគារ ខណៈ​បណ្តុំ​លំនៅដ្ឋាន​លក្ខណៈ​បុរី មានចំនួន ២៨ទីតាំង និងក្រុមហ៊ុន​សិក្សា​គម្រោង​ប្លង់ និងសាងសង់​ដែលបានចុះ​បញ្ជី​មានចំនួន​សរុប ៣០១ ក្រុមហ៊ុន។ ក្នុងនោះ ក្រុមហ៊ុន​ក្នុង​ស្រុក មាន ១៨៦​ក្រុមហ៊ុន និងបរទេស ១១៥ ក្រុមហ៊ុន ពោលបើ​ធៀបនឹង​ឆ្នាំ ២០១៧ មានការកើន​ឡើង ២៦​ក្រុមហ៊ុន៕