ឯកឧត្តម វេង សាខុន រដ្ឋមន្រី្ត ក្រសួងកសិកម្ម រុក្ខាប្រមាញ់ និងនេសាទបានបញ្ជាក់អះអាងថា បញ្ហាចម្បងធំទី១ ដែលរាំងស្ទះដល់ដំណើរការនាំចេញផ្លែស្វាយទៅទីផ្សារប្រទេសចិន គឺដោយសារតែដំណើរការបញ្ជាទិញឧបករណ៍ ដើម្បីសម្អាតសមាសភាពចង្រៃត្រូវបានរាំងស្ទះយឺតយ៉ាវ ក៏ព្រោះតែ ការបញ្ជាទិញសម្ភារទាំងនោះ ចំពេលជាមួយគ្នានឹងដំណាក់កាលនៃការរីករាលដាលជំងឺកូវីដ-១៩។ ម្យ៉ាងទៀត គឺអ្នកជំនាញផ្នែកភូតគាមអនាម័យរបស់ចិនក៏បានផ្អាកដំណើរការនាំចូលមកកម្ពុជាដូចគ្នាដែរ។
អត្ថបទទាក់ទង!
ឯកឧត្តម វេង សាខុន បញ្ជាក់ថា ស្ថិតក្នុងស្ថានភាពបច្ចុប្បន្ននេះដំណើរការនៃការនាំចេញផ្លែស្វាយកម្ពុជាទៅទីផ្សារចិន នូវតែមិនមានភាពរលូននៅឡើយ។ ទោះយ៉ាងណា កម្ពុជានៅតែជំនះក្នុងការនាំចេញដោយពឹងពាក់ការនាំចេញនេះ តាមច្រកប្រទេសវៀតណាម ដែលជាក់ស្តែង កាលពីសប្តាហ៍កន្លងទៅតាមរយៈក្រុមហ៊ុន ហ៊ុនទី បាននាំចេញផ្លែស្វាយទៅចិនប្រមាណជា ១០០តោនហើយ ប៉ុន្តែគ្រាន់តែត្រូវចំណាយប្រាក់ច្រើនប្រមាណជិត ៤ពាន់ដុល្លារ ក្នុងមួយកុងទ័រនឺ សម្រាប់ដំណើរការនៃការដឹកជញ្ជូននេះ។
ឯកឧត្តមបញ្ជាក់ថា គិតមកដល់ថ្ងៃទី១៤ ខែធ្នូ អគ្គនាយកដ្ឋានកសិកម្ម បានទទួលពាក្យស្នើសុំចុះបញ្ជីចម្ការស្វាយ និងទីតាំងវេចខ្ចប់បានចំនួន ៤៨ ក្នុងនោះ មានក្រុមហ៊ុន ម្ចាស់ចម្ការ និងសហគមន៍កសិកម្ម ដែលមានផ្ទៃដីដាំដុះដំណាំស្វាយសរុបចំនួនជាង ២ម៉ឺន៨ពាន់ហិកតា ដើម្បីធ្វើការវាយតម្លៃលើលក្ខណសម្បត្តិគ្រប់បែបយ៉ាង។
របាយការណ៍ពីក្រសួងកសិកម្មបានបង្ហាញថា នៅរយៈពេល១១ ខែឆ្នាំ ២០២០នេះ ផ្លែស្វាយស្រស់ចំនួនជាង ៩ម៉ឺនតោន ត្រូវបាននាំចេញទៅកាន់ទីផ្សារក្រៅប្រទេស ដែលមានកំណើន ជាង៨៣% ធៀបទៅនឹងរយៈពេលដូចគ្នាកាលពីឆ្នាំ២០១៩៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
