លោក ប៉ែន ឡុង ជាម្ចាស់យានដ្ឋានជួសជុលរថយន្តមួយកន្លែង ស្ថិតក្នុងឃុំព្រៃឈរ ស្រុកកំពង់ត្របែក ខេត្តព្រៃវែង ជាប់នឹងផ្លូវជាតិលេខ១ បានធ្វើឲ្យភ្ញាក់ផ្អើលដល់បណ្ដាញសារព័ត៌មាន ទាំងក្នុងស្រុក និងទាំងនៅលើពិភពលោក ជាមួយនឹងការផលិតយន្តហោះដោយខ្លួនឯង។
សារព័ត៌មានធំៗ នៅលើពិភពលោក ដូចជា BBC, Al Jazeera ព្រមទាំងសារព័ត៌មានជាច្រើនទៀត បានចុះមកយកព័ត៌មានអំពីរូបលោក ដល់ផ្ទះរបស់លោកតែម្ដង។
លោក ប៉ែន ឡុង ថា ដោយសារតែស្រលាញ់យន្តហោះតាំងពីក្មេង លោកតែងស្រមៃចង់ផលិតយន្តហោះមួយដោយខ្លួនឯង។ ក្នុងការផលិតយន្តហោះនេះ លោកបានប្រាប់សារព័ត៌មាន Al Jazeera ថា លោកជួបការលំបាកច្រើន ជាពិសេស រឿងលុយកាក់ ពីព្រោះលោកត្រូវសុំលុយពីប្រពន្ធដែលជាអ្នកទុកដាក់លុយសន្សំពីរបរជាជាងជួសជុលរថយន្តរបស់លោក។
លោក ប៉ែន ឡុង ជាងជួសជុលរថយន្ត នៅខែត្រព្រៃវែង ដែលចេះដំឡើងយន្តហោះ។
លោកថា អ្នកភូមិ និងមិត្តភក្ដិខ្លះ ថែមទាំងលួចនិយាយខ្សឹបខ្សៀវថា លោកជាមនុស្សឆ្កួត ប៉ុន្តែ បើតាមការឲ្យដឹងពីលោកមេឃុំ លោក ប៉ែន ឡុង ជាមនុស្សស្លូតបូតត្រឹមត្រូវ គួរឲ្យរាប់អាន។
ជាមេគ្រួសារដែលមានប្រពន្ធ និងកូនពីរនាក់ លោក ប៉ែន ឡុង ឲ្យដឹងថា លោកអាចរៀបចំដំឡើងយន្តហោះទីមួយរបស់លោកបាន គឺដោយសារការរៀនសូត្រតាមរយៈការមើលវីដេអូនៅលើ YouTube។
លោក ប៉ែន ឡុង ក៏មានជំនឿទៅលើការចាប់ជាតិដែរ។ លោកបានប្រាប់សារព័ត៌មាន Al Jazeera ថា លោកជឿថា កាលពីជាតិមុន រូបលោកជាបុរសជនជាតិមូស្លីម ដែលចេះបច្ចេកវិទ្យាផលិតយន្តហោះ។
បើតាមសេចក្ដីសម្ភាសន៍ជាមួយសារព័ត៌មាន Al Jazeera លោក ឡុង បានសាកល្បងធ្វើយន្តហោះជាច្រើនលើកច្រើនសា ដោយលើកទីមួយ លទ្ធផលដែលសម្រេចបាន គឺកូនយន្តហោះប្រើឧបករណ៍បញ្ជា។ បន្ទាប់មក លើកទីពីរ លោកបានធ្វើយន្តហោះមួយទៀត ប៉ុន្តែធ្វើមិនបានល្អ លោកក៏មិនបានសាកល្បងវាទេ គឺទុកវាចោល។
លើកទីបី លោកបានដំឡើងយន្តហោះមួយដែលបើកបរដោយមនុស្ស ប៉ុន្តែ ក្នុងពេលសាកល្បងកាលពីដើមឆ្នាំនេះ គឺហោះបានបន្តិច ក៏ធ្លាក់មកវិញ បែកកង់ និងខូចខាតស្លាប ប៉ុន្តែ រូបលោកមិនមានរបួសអ្វីទេ។ លើកទីបួននេះ គឺលោកធ្វើយន្តហោះសម្រាប់ហោះលើទឹក ដែលលោកថា នឹងចំណាយពេលតិចជាងលើកមុនៗ ក្នុងការស្ថាបនាវា។
រឿងមួយដែលភរិយារបស់លោកព្រួយបារម្ភគឺសុវត្ថិភាពរបស់លោក នៅពេលសាកល្បងបើកយន្តហោះហោះឡើងលើមេឃ។ នៅពេលអ្នកសារព័ត៌មាន Al Jazeera សួរថា លោកមិនខ្លាចគ្រោះថ្នាក់បាត់បង់ជីវិតដោយសារបើកយន្តហោះដែលធ្វើដោយខ្លួនឯងទេ ឬ? លោក ឡុង ឆ្លើយថា រឿងស្លាប់គ្មានអ្នកណាគេចផុតទេ។
លោកថា «ខ្ញុំបានសម្រេចចិត្តហើយ គឺខ្ញុំមិនខ្លាចស្លាប់ដោយសារធ្លាក់យន្តហោះទេ អ្វីដែលសំខាន់ គឺខ្ញុំសម្រេចក្ដីសុបិនរបស់ខ្ញុំ»៕
None
