ក្រសួងវប្បធម៌ សង្កេតឃើញថា មានអ្នកប្រើប្រាស់គេហទំព័រ និងបណ្តាញទំនាក់ទំនងសង្គមមួយចំនួន ពិសេសអាជីវករតាមប្រព័ន្ធអនឡាញ អ្នកនិពន្ធបទភ្លេង ទំនុកច្រៀង និងអ្នកសម្តែងក្រៅប្រព័ន្ធ បានផ្សព្វផ្សាយរូបភាព សារជាអក្សរឬសំលេង និងវីដេអូប្រកបដោយអសីលញាណ ប្រាសចាកក្រមសីលធម៌បង្កឲ្យមានផលប៉ះពាល់យ៉ាងធ្ងន់ធ្ងរដល់វប្បធម៌ ទំនៀមទំលាប់ ប្រពៃណី អត្តសញ្ញាណ និងកិត្យានុភាពជាតិ។
ក្រសួងបានសង្កត់ធ្ងន់ថា ការផ្សព្វផ្សាយរូបភាព សារជាអក្សរឬសំលេង និងវីដេអូប្រកបដោយអសីលញាណ ដែលមានចរិត អាសអាភាស ស្រើបស្រាល អុជអាល បំបែកបំបាក់ ប្រកាន់ពូជសាសន៍ ពណ៌សម្បុរ វានាំឲ្យប៉ះពាល់យ៉ាងធ្ងន់ធ្ងរដល់សង្គម នឹងត្រូវប្រឈមមុខជាកំហិត ចំពោះមុខច្បាប់។
ក្នុងន័យនេះ ក្រសួងវប្បធម៌ អន្តរក្រសួង និងស្ថាប័នពាក់ព័ន្ធ នឹងដាក់ពាក្យប្តឹងទៅកាន់តុលាការ បើសិនជា បុគ្គលឬក្រុមណាមួយ នៅតែបន្តប្រព្រឹត្តដោយអនុលោមទៅតាមក្រមព្រហ្មទណ្ឌ និងច្បាប់ស្តីពីការបង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទ អាស្រ័យទៅតាមស្ថានភាពបទល្មើស ដែលអ្នកប្រើប្រាស់គេហទំព័រ និងបណ្តាញទំនាក់ទំនងសង្គមបានប្រព្រឹត្ត។
អត្ថបទគួរអាន
គួរជម្រាបថា ក្រសួងបានចេញសេចក្តីណែនាំយ៉ាងម៉ឺងម៉ាត់ដូច្នេះ បន្ទាប់ពីគេសង្កេតឃើញថា មានអ្នកលក់អនឡាញ និងអ្នកសម្តែងក្រៅប្រព័ន្ធមួយចំនួនតាមបណ្តាញសង្គមហ្វេសបុក និងយូធូប តែងបង្ហោះវីដេអូ និងរូបភាព ស្ទើរតែអាក្រាតខ្លួន ដើម្បីគ្រាន់តែអាចលក់ផលិតដាច់ និងចង់បានអ្នកចូលមើលច្រើន ដែល ទង្វើនេះ ត្រូវបានមហាជនមើលឃើញថា វាបានធ្វើឲ្យប៉ះពាល់យ៉ាងខ្លាំងដល់សីលធម៌ និងតម្លៃរបស់ស្ត្រីខ្មែរ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
