លោក ស្រ៊ុន ពៅ ប្រធានសមាគមចិញ្ចឹមសត្វកម្ពុជា បានអះអាងប្រាប់សារព័ត៌មានខេមបូណូមីសថា ក្នុងរដូវបុណ្យភ្ជុំបិណ្ឌឆ្នាំនេះ តម្លៃមាន់សាច់ ហាក់មានការធ្លាក់ចុះតិចតួច ប៉ុន្ដែតម្លៃជ្រូករស់វិញ ហាក់មានការប្រែប្រួលខ្លាំង ដោយជាធម្មតាមុនរដូវភ្ជុំបិណ្ឌឆ្នាំមុនៗសត្វជ្រូករស់អាច លក់បានតម្លៃ ១២.៥០០រៀល ទៅ ១៣.០០០រៀល ក្នុងមួយគីឡូក្រាម ប៉ុន្តែចូលដល់រដូវភ្ជុំបិណ្ឌនាឆ្នាំនេះវិញ តម្លៃជ្រូករស់បែរជាធ្លាក់មកនៅត្រឹម ៩.០០០រៀលប៉ុណ្ណោះ ក្នុងមួយគីឡូក្រាម។
បញ្ហាកូវីដ-១៩ នៅតែជាបញ្ហាចម្បង ដែលធ្វើឱ្យវិស័យចិញ្ចឹមសត្វនៅកម្ពុជា ជួបបញ្ហាទីផ្សារ នារយៈពេលកន្លងមក គួបផ្សំនឹងប្រមុខរាជរដ្ឋាភិបាលកម្ពុជា បានសម្រេចផ្អាកនូវការប្រារព្ធពិធីភ្ជុំបិណ្ឌ និងកាន់បិណ្ឌ ទៀតនោះ កាន់តែធ្វើឱ្យតម្រូវការសាច់នៅលើទីផ្សារថយចុះ ហើយតម្លៃក៏ថយចុះទៅតាមនោះដែរ។
ប្រធានសមាគមចិញ្ចឹមសត្វកម្ពុជា លោកស្រ៊ុន ពៅ បានបញ្ជាក់ប្រាប់ខេមបូណូមីសថា បច្ចុប្បន្ន កម្ពុជា មានតម្រូវការជ្រូករស់ ប្រមាណ ៧ពាន់ក្បាល ទៅ ៨ពាន់ក្បាល ក្នុងមួយថ្ងៃ ខណៈរដូវបុណ្យភ្ជុំ តម្រូវការជ្រូកហាក់មិនមានការប្រែប្រួលខ្លាំងនោះទេ ក៏ប៉ុន្ដែបើមើលទៅលើតម្លៃវិញគឺធ្លាក់ចុះខ្លាំងជាងរដូវភ្ជុំឆ្នាំមុនៗ។ ចំណែក តម្លៃមាន់សាច់ វិញ លោក ស្រ៊ុនពៅ បានអះអាងថា តម្លៃមិនសូវខុសគ្នា ប៉ុន្មានទេ ប៉ុន្ដែក៏មិនសូវមានទីផ្សារប៉ុន្មានដែរ ដែលមានតម្លៃ ជាមធ្យម ៤,០០០រៀល ក្នុងមួយគីឡូក្រាម។
បន្ថែមលើបញ្ហាកូវីដ-១៩ ការផ្អាកពិធីជួបជុំ និងពិធីបុណ្យភ្ជុំ បញ្ហានាំចូលសត្វខុសច្បាប់ក៏នៅតែជាបញ្ហា សម្រាប់អ្នកប្រកបរបរចិញ្ចឹមសត្វ ក្នុងស្រុកដែរ ដូច្នេះ លោក ស្រ៊ុន ពៅ នៅតែទទូច និងស្នើដល់រាជរដ្ឋាភិបាល និងក្រសួងពាក់ព័ន្ធ ដើម្បីជួយរកដំណោះស្រាយជូនក្រុមអ្នកចិញ្ចឹមសត្វ។
អត្ថបទទាក់ទង
ជុំវិញតម្លៃសាច់នៅលើទីផ្សារនេះដែរ លោក មៀច ពុទ្ធា អ្នកចិញ្ចឹមជ្រូក នៅខេត្តពោធិសាត់ បានបញ្ជាក់ប្រាប់សារព័ត៌មានខេមបូណូមីសថា នៅមុនពិធីបុណ្យភ្ជុំបិណ្ឌមកដល់ ជ្រូករស់អាចលក់បាន ក្នុងតម្លៃ ១ម៉ឺន១ពាន់រៀល ទៅ ១ម៉ឺន២ពាន់រៀល ក្នុងមួយគីឡូក្រាម ប៉ុន្តែក្រោយពេលរដូវដាក់បិណ្ឌចូលមកដល់ តម្លៃជ្រូករស់បែរជានៅត្រឹម ១ម៉ឺនរៀល ប៉ុណ្ណោះ ក្នុងមួយគីឡូក្រាម។ អ្នកខេត្តពោធិ៍សាត់រូបនេះ បានបន្ថែមទៀតថា បើទោះបីជាជ្រូករស់មានតម្លៃថយចុះជាងមុន តែបច្ចុប្បន្ន ក៏មិនសូវមានឈ្មួញចុះទៅទិញដែរ។
មិនខុសគ្នាប៉ុន្មានពីអ្នកចិញ្ចឹមជ្រូក កសិករម្នាក់ទៀត ដែលជាអ្នកចិញ្ចឹមមាន់សាច់ នៅខេត្តកំពង់ស្ពឺឯណោះវិញ ក៏បានរអ៊ូរទាំពីទីផ្សារមាន់សាច់ នាពេលបច្ចុប្បន្នដែរ។ លោក ស៊ាប សុខហៀង បានបញ្ជាក់ថា បច្ចុប្បន្ន មាន់សាច់រាប់ម៉ឺនក្បាលរបស់លោក មិនមានឈ្មួញចុះទៅទិញដោយផ្ទាល់នោះទេ ហើយពលរដ្ឋក៏មិនមានតម្រូវការមាន់សាច់ច្រើនដែរ បើទោះបីជារដូវបុណ្យភ្ជុំក៏ដោយ។ ទន្ទឹមនេះ លោក ស៊ាប សុខហៀង ក៏បានអំពាវនាវឱ្យក្រសួងពាក់ព័ន្ធ ជួយរកដំណោះស្រាយទីផ្សារ ជូនអ្នកចិញ្ចឹមមាន់ក្នុងស្រុកផងដែរ។
សូមបញ្ជាក់ផងដែរថា ពិធីបុណ្យភ្ជុំបិណ្ឌ និងកាន់បិណ្ឌ នាឆ្នាំនេះ ត្រូវប្រារព្ធធ្វើឡើងចាប់ពី ថ្ងៃទី២២ ខែកញ្ញា ដល់ ថ្ងៃទី ៦ខែតុលា ប៉ុន្តែដោយសារជំងឺកូវីដ-១៩ នៅតែបន្តឆ្លងរាលដាលនៅទូទាំងប្រទេសកម្ពុជា ពិសេសជំងឺកូវីដ-១៩ប្រភេទបំប្លែងថ្មីផងនោះ ទើបប្រមុខរាជរដ្ឋាភិបាលកម្ពុជា សម្រេចផ្អាកពិធីបុណ្យភ្ជុំបិណ្ឌ និងកាន់បិណ្ឌ ដើម្បីទប់ស្កាត់ការឆ្លងរាលដាលនៃជំងឺកូវីដ-១៩៕
None
