ការឆបោកតាមអនឡាញធ្វើឱ្យតំបន់អាស៊ីប៉ាស៊ីហ្វិកខាតបង់ចន្លោះពី៨៨ ទៅជាង១១៤ពាន់លានដុល្លារ

របាយការណ៍ថ្មីមួយរបស់ការិយាល័យអង្គការសហប្រជាជាតិ ស្តីពី គ្រឿងញៀន និងឧក្រិដ្ឋកម្ម បានឱ្យដឹងថា កាលពីឆ្នាំ២០២៥ ការឆបោកតាមប្រព័ន្ធអនឡាញ ដែលជាបទល្មើសបច្ចេកវិទ្យាបានបង្កវិនាសកម្មដល់សេដ្ឋកិច្ច និងហិរញ្ញវត្ថុរបស់បណ្តាប្រទេសនានាក្នុងតំបន់អាស៊ី និងប៉ាស៊ីហ្វិកក្នុងទំហំទឹកប្រាក់យ៉ាងហោចណាស់ពី៨៨ពាន់លានដុល្លារទៅជាង១១៤ពាន់លានដុល្លារ។ ឧក្រិដ្ឋកម្មនេះមិនត្រឹមតែមានទ្រង់ទ្រាយធំប៉ុណ្ណោះទេ ប៉ុន្តែវិសាលភាព នៃផលប៉ះពាល់របស់វា ក៏កាន់តែរីករាលដាលខ្លាំងឡើងៗផងដែរ។ ដើម្បីឆ្លើយតបទៅនឹងវិធានការបង្ក្រាបរបស់រដ្ឋាភិបាលនានាក្នុងតំបន់ ក្រុមឧក្រិដ្ឋជនឆ្លងដែនទាំងនោះបានអភិវឌ្ឍយុទ្ធសាស្ត្រយ៉ាងឆាប់រហ័សដើម្បីគេចផុតពីការអនុវត្តច្បាប់។
តាមសេចក្តីរាយការណ៍ ក្រុមឧក្រិដ្ឋជននៅអាស៊ីអាគ្នេយ៍ ដែលជាចំណុចកណ្តាល នៃប្រតិបត្តិការឆបោកតាមអ៊ីនធឺណិត និងដឹកនាំភាគច្រើនដោយក្រុមឧក្រិដ្ឋជនមានដើមកំណើតចិន កំពុងបង្កើនល្បឿនបន្សាំខ្លួនទៅនឹងការបង្ក្រាប ព្រមទាំងធ្វើពិពិធកម្មប្រភពចំណូល កេងប្រវ័ញ្ចតាមរយៈអំពើពុករលួយ និងទាញយកប្រយោជន៍ពីបច្ចេកវិទ្យាបញ្ញាសិប្បនិម្មិត (AI) កាន់តែខ្លាំងឡើង។
លោកស្រី ដែលហ្វីន ស្កានស៍ (Delphine Schantz) អ្នកតំណាងការិយាល័យអង្គការសហប្រជាជាតិ ស្តីពី គ្រឿងញៀន និងឧក្រិដ្ឋកម្មប្រចាំតំបន់អាស៊ីអាគ្នេយ៍ និងប៉ាស៊ីហ្វិក បានលើកឡើងថា បណ្តាញឧក្រិដ្ឋជន ដែលធ្លាប់តែធ្វើសកម្មភាពខុសច្បាប់ក្នុងដែនដីកម្រិតណាមួយ ពេលនេះកំពុងពង្រីកខ្លួនកាន់តែខ្លាំងទៅកាន់ទីផ្សារងងឹតជាច្រើនទៀត។ លោកស្រី បានបន្ថែមថា គំរូប្រតិបត្តិការរបស់ពួកគេមានលក្ខណៈស្រដៀងទៅនឹងការផ្តល់សិទ្ធិអាជីវកម្ម របស់សាជីវកម្មធំៗ ប៉ុន្តែសកម្មភាពប្រចាំថ្ងៃរបស់ពួកគេ គឺការលាងលុយកខ្វក់ ការជួញដូរមនុស្ស ការរត់ពន្ធជនអន្តោប្រវេសន៍ និងការលួចប្រមូលទិន្នន័យ ដែលទាំងអស់នេះត្រូវបានតភ្ជាប់គ្នាយ៉ាងជំពាក់ជំពិន។
បើយោងតាមការិយាល័យអង្គការសហប្រជាជាតិ ស្តីពី គ្រឿងញៀន និងឧក្រិដ្ឋកម្ម ជនរងគ្រោះត្រូវបានកំណត់អត្តសញ្ញាណថា មានប្រភពមកពីយ៉ាងហោចណាស់៨០ប្រទេស និងដែនដី ដោយភាគច្រើនរស់នៅទូទាំងតំបន់អាស៊ី មជ្ឈិមបូព៌ា និងអាហ្វ្រិក។ បច្ចុប្បន្នមានសញ្ញាបង្ហាញថា ប្រតិបត្តិករនៃបទល្មើសនេះ កំពុងស្វែងរកការជ្រើសរើសបុគ្គលិកបន្ថែមពីខាងក្រៅតំបន់អាស៊ី ដើម្បីពង្រីកទីផ្សារគោលដៅថ្មីៗ។
ជាមួយគ្នានេះ ក៏មានការព្រមានផងដែរថា ក្រុមឧក្រិដ្ឋជនកំពុងព្យាយាមភ្ជាប់ទំនាក់ទំនងទៅកាន់បណ្តាញឧស្សាហកម្មនានា ដោយតម្រង់ទិសដៅលើបុគ្គល ដែលមានជំនាញភាសាបារាំង អាល្លឺម៉ង់ ប៉ូឡូញ ហូឡង់ អេស្ប៉ាញ អ៊ីតាលី ស៊ុយអែត ន័រវេស និងអង់គ្លេស៕

ដោយៈ សរ សុជាតិ