នៅពេលនេះធ្វើឲ្យប្រតិបត្តិករមីក្រូហិរញ្ញវត្ថុតូចៗកំពុងតែជួបវិបត្តិក្នុងការទទួលបាននូវប្រភពទុនហិរញ្ញវត្ថុបន្ថែមដើម្បីប្រតិបត្តិការរបស់ខ្លួន ដែលអាចប្រឈមនឹងការក្ស័យធន ខណៈដែលប្រភពទុនរបស់ពួកគេភាគច្រើនជាកម្ចីពីធនាគារពាណិជ្ជធំៗនៅក្នុងស្រុក។
ដើម្បីជាការការពារនិងលើកទឹកចិត្តដល់ប្រតិបត្តិករហិរញ្ញវត្ថុទាំងអស់នៅកម្ពុជា សមាគមមីក្រូហិរញ្ញវត្ថុកម្ពុជា មានគម្រោងស្នើសុំទៅធនាគារជាតិនៃកម្ពុជាឲ្យជួយរកកម្ចីពីក្រៅប្រទេសដើម្បីផ្តល់ទៅឲ្យមីក្រូហិរញ្ញវត្ថុក្នុងស្រុកដែលមានអត្រាការប្រាក់ទាប។
អត្ថបទទាក់ទងដែលគួរអាន ! គ្រឹះស្ថានមីក្រូហិរញ្ញវត្ថុនឹងជួបវិបត្តិធ្ងន់ធ្ងរឈានទៅរកការក្ស័យធន?
លោកឧកញ៉ា ហ៊ួត អៀងតុង ប្រធានសមាគមីក្រូហិរញ្ញវត្ថុកម្ពុជា បានដឹងថា ក្រុមសមាជិករបស់សមាគមមីក្រូហិរញ្ញវត្ថុ បាននិងកំពុងធ្វើការស្វែងរកនិងពិភាក្សាគ្នារៀបចំដាក់លិខិតស្នើទៅធនាគារជាតិនៃកម្ពុជាហើយ។ លោកមានការជឿជាក់ថា នឹងមានដំណោះស្រាយភ្លាមៗ ដែលនឹងអាចធ្វើឲ្យពួកយើងទទួលបានឥណទានពីក្រៅប្រទេសក្នុងអត្រាការប្រាក់មួយទាប។
ការដង្ហោយស្វែងរកអន្តរាគមន៍នេះ ខណៈអត្រាការប្រាក់កម្ចីនៅក្នុងស្រុកដែលពួកគេយកទៅធ្វើអាជីវកម្មបន្ត មានកម្រិតខ្ពស់ ជាហេតុធ្វើឲ្យពួកគេ ព្រមានថា អាចនឹងកាត់បន្ថយបុគ្គលិក ឬក្នុងករណីអាក្រក់ជាងនេះ អាចនឹងក្ស័យធនជាដើម។
លោកឧកញ៉ា ហ៊ួត អៀងតុង បន្តថា បច្ចុប្បន្ន កម្ចីនៅធនាគារពាណិជ្ជក្នុងស្រុក មានអត្រាការប្រាក់ក្នុងមួយឆ្នាំ ចន្លោះពី ៨ ទៅ១២ភាគរយ ដែលជាកម្ចីដែលមានអត្រាការប្រាក់ខ្ពស់ស្រាប់ រួមនឹងថ្លៃប្រតិបត្តិការផ្សេងៗផងនោះ។ ដូច្នេះ ទើបសមាគមត្រៀមដាក់សំណើទៅរាជរដ្ឋាភិបាលក្នុងការជួយសម្រួលទាំងការទទួលបានប្រភពទុន និងទាំងការអនុគ្រោះពន្ធផង។
ជាការអះអាងរបស់ធនាគារជាតិនៃកម្ពុជា គោលដៅនៃការកំណត់ពិដានអត្រាការប្រាក់កម្ចីមិនឲ្យលើសពី១៨ភាគរក្នុង១ឆ្នាំនេះ គឺដើម្បីការពារអតិថិជនពីការទទួលកម្ចីដែលមានការប្រាក់ខ្ពស់ពេក និងដើម្បីជំរុញឲ្យមានការប្រើប្រាស់កម្ចីប្រកបដោយប្រសិទ្ធភាពទៅវិញ។
យ៉ាងណាក៏ដោយ លោកឧកញ៉ា ហ៊ួត អៀងតុង ប្រធានសមាគមមីក្រូហិរញ្ញវត្ថុ បញ្ជាក់ថា ការកំណត់មិនឲ្យមានអត្រាការប្រាក់កម្ចីលើសពី១៨ភាគរយក្នុងមួយឆ្នាំសម្រាប់កម្ចីចេញពីគ្រឹះស្ថានមីក្រូហិរញ្ញវត្ថុ និងប្រតិបត្តិករឥណទាន អាចធ្វើការបានក្នុងទំហំទឹកប្រាក់ជុំវិញ ៥ពាន់ដុល្លារ ប៉ុន្តែ មានការលំបាកសម្រាប់កម្ចីក្រោម១ពាន់ដុល្លារអាមេរិក។
ក្នុងបរិបទនេះដែរ គ្រឹះស្ថានផ្តល់ប្រាក់កម្ចីត្រូវត្រៀមខ្លួនជានិច្ចក្នុងការស្វែងរកយុទ្ធសាស្រ្តដើម្បីរក្សានិរន្តរភាពរៀងៗខ្លួន ដោយអនុវត្តតាមយុទ្ធវិធីរៀងៗខ្លួនដែរ ដោយអ្នកខ្លះព្យាយាមកាត់បន្ថយការចំណាយផ្សេងៗ និងកាត់បន្ថយការផ្តល់កម្ចីខ្នាតតូចៗជាដើម។
ដូច្នេះ យើងរង់ចាំមើលវាសនាអនាគតរបស់គ្រឹះស្ថានមីក្រូហិរញ្ញវត្ថុតូចៗនៅកម្ពុជា នឹងទៅជាយ៉ាងណា?៕
