លោក ងួន ឡាយ ប្រធានសមាគមម្រេចកំពតបានគូសបញ្ជាក់ថា ការពង្រីកទីផ្សារម្រេចកំពតកំពុងចាប់ផ្តើមមានសន្ទុះកើនឡើងខ្លាំងនៅសហគមអឺរ៉ុប។ បច្ចុប្បន្នសន្ទុះនៃទីផ្សារម្រេចកំពត នៅចុងឆ្នាំ២០២០នេះ ឃើញមានភាពល្អប្រសើរឡើងវិញ ហើយសង្ឃឹមជឿជាក់ថា នៅឆ្នាំ២០២១ នឹងកាន់តែល្អជាងនេះទៀត ដោយសារតែមានវត្តមានក្រុមហ៊ុន EU Land បានចុះកិច្ចសន្យាទិញម្រេចចំនួន១០ តោនរួចហើយ ពីសហគមម្រេចកំពត និងក្នុងពេលជាមួយនេះ ក៏ក្រុមហ៊ុនចំនួន ៤ផ្សេងទៀតក៏បានចុះកិច្ចសន្យាទិញម្រេចកំពតពីប្រជាកសិករសម្រាប់ឆ្នាំ២០២១ ផងដែរ។
អត្ថបទទាក់ទង!
លោក ងួន ឡាយ អះអាងទៀតថា ម្រេចកំពតកំពុងចាប់ផ្តើមមានសញ្ញាល្អឡើងវិញ ត្រង់ថា មកដល់ពេលនេះ គឺមានអ្នកបញ្ជាទិញម្រេចកំពត ដើម្បីត្រៀមទុកសម្រាប់ការនាំចេញមានបរិមាណជាច្រើនតោននៅចំពោះមុខផ្ទាល់ ប៉ុន្តែមិនទាន់ដឹងច្បាស់អំពីចំនួនទិញពិតប្រាកដនៅឡើយទេ តែក្រុមហ៊ុនអ្នកបញ្ជាទិញទាំងនេះ សុទ្ធតែបានបង្ហាញពីភាពប្រាកដប្រជារបស់ខ្លួនជាមួយប្រជាកសិករផ្ទាល់តែម្តង។ ជាមួយគ្នានេះ ក្នុងនាមជាសមាគមពេលនេះ ក៏កំពុងបំផុសចលនាឲ្យប្រជាកសិករពង្រឹងសកម្មភាពដាំម្រេចឡើងវិញ តែមិនបានធ្វើការពង្រីកផ្ទៃដីដាំម្រេចបន្ថែមនោះឡើយ។
លោកងួន ឡាយ បន្តថា ម្រេចកំពតនៅឆ្នាំ២០២១ សន្ទុះនៃការនាំចេញអាចនឹងច្រើនជាង ៧០តោន លើសឆ្នាំកន្លងទៅ ខណៈនៅឆ្នាំនេះមានវត្តមានក្រុមហ៊ុន EU Land ជាទីផ្សារថ្មីសម្រាប់ម្រេចកំពត។
ប្រធានសមាគមម្រេចកំពតអះអាងទៀតថា ផលិតផលម្រេចកំពត ដែលបាននាំចេញក្នុងឆ្នាំនេះ គឺមិនមានការថយចុះនោះឡើយ ខណៈតម្រូវការទីផ្សារនាំចេញរាល់ឆ្នាំមានជុំវិញ ៧០ ទៅ៨០តោន ប៉ុន្តែមកដល់ពេលនេះការនាំចេញម្រេចកំពតបានជាង ៦០ តោនរួចហើយ ហើយរំពឹងថា ការនាំចេញនៅរក្សាបានក្នុងបរិមាណ លើស ៧០ តោនដូចឆ្នាំទៅមិញដែរ បើទោះបីឆ្នាំនេះម្រេចកំពតជួបបញ្ហាកូវីដ ១៩ ធ្វើឲ្យបាត់បង់ចំណែកទីផ្សារពីសំណាក់ទេសចរ ប្រមាណ៣០ភាគរយក៏ដោយចុះ។
លោកងួន ឡាយ បានឲ្យដឹងទៀតថា តម្លៃម្រេចដែលប្រើឈ្មោះម្រេចកំពតនៅរក្សាតម្លៃដដែលរយៈពេល ៥ ឆ្នាំមកហើយ គឺមិនមានការកើនឡើង ឬធ្លាក់ចុះនោះទេ ពោលគឺម្រេចខ្មៅ ១គីឡូក្រាមថ្លៃ១៥ ដុល្លារ ម្រេចក្រហម ២៥ដុល្លារ និងម្រេចស ថ្លៃ២៨ដុល្លារ ខណៈម្រេចមិនបានប្រើឈ្មោះម្រេចកំពតវិញគឺមានតម្លៃ ចន្លោះពី ៧ពាន់រៀល ទៅ១ម៉ឺនរៀលក្នុងមួយគីឡូក្រាម៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
