រដ្ឋមន្ត្រីក្រសួងសាធារការមិនចង់លឺលេសដោះសារពីក្រុមហ៊ុនសាងសង់ផ្លូវជាតិលេខ២ យឺតយ៉ាវ

ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនបន្តជំរុញឲ្យក្រុមហ៊ុនកូរ៉េ Hanshin Engineering &Construction Co.,Ltd ដែលទទួលបន្ទុកសាងសង់ផ្លូវជាតិលេខ២ ពន្លឿនប្រតិបត្តិការសាងសង់របស់ខ្លួនបន្ថែមទៀត ដើម្បីឈានទៅបញ្ចប់ការសាងសង់តាមការគ្រោងទុកនៅអំឡុងខែមេសា ឆ្នាំ២០២២។ ការជំរុញម្តងជាពីរដងនេះ ធ្វើឡើងក្រោយ ឯកឧត្តម សង្កេតឃើញពីភាពយឺតយ៉ាវរបស់ក្រុមហ៊ុន ក្នុងការស្ថាបនាផ្លូវជាតិ ដែលភ្ជាប់ពីភ្នំពេញទៅខេត្តតាកែវមួយនេះ ខណៈបច្ចុប្បន្នការសាងសង់ទើបសម្រេចបាន៤៥% ប៉ុណ្ណោះ ក្រោយបើកការដ្ឋានជាង១ឆ្នាំកន្លងមកនេះ។

ទន្ទឹមនឹងនេះ ឯកឧត្តមទេសរដ្ឋមន្ត្រី មិនរំពឹងថា ក្រុមហ៊ុនរបស់កូរ៉េមួយនេះនឹងអាចស្ថាបនាផ្លូវជាតិលេខ២ និងលេខ២២បញ្ចប់តាមការគ្រោងទុកនៅឆ្នាំក្រោយនោះទេ ដោយសារបច្ចុប្បន្នគ្រឿងចក្រសាងសង់ផ្លូវនេះ នៅមានចំនួនតិចតួចនៅឡើយ។ ឯកឧត្តម ស៊ុន ចាន់ថុល បានសង្កត់ធ្ងន់ថា នឹងតាមដានយ៉ាងយកចិត្តទុកដាក់លើដំណើរការសាងសង់របស់ក្រុមហ៊ុននេះ ជាពិសេសនឹងពង្រឹងការចុះទៅត្រួតពិនិត្យឲ្យបានម៉ឺងម៉ាត់ និងញឹកញាប់។

ឯកឧត្តម ស៊ុន ចាន់ថុល សង្កត់ធ្ងន់ថា ឯកឧត្តមនឹងមិនទទួលយកនោះទេ ចំពោះហេតុផលរបស់ក្រុមហ៊ុនដែលមិនសមស្រប ដោយយកវិបត្តិកូវីដ-១៩ ជាលេសធ្វើឲ្យរាំងស្ទះដល់ការដំណើរការសាងសង់របស់ខ្លួន។

ការសាងសង់ផ្លូវជាតិលេខ២ និងផ្លូវលេខ២២នេះ គ្រោងចំណាយថវិកាប្រមាណ ៥៦លានដុល្លារអាមេរិក ក្រោមកម្ចីឥណទានពីរាជរដ្ឋាភិបាលសាធារណរដ្ឋកូរ៉េ និងថវិកាបដិភាគរបស់រាជរដ្ឋាភិបាលកម្ពុជាប្រមាណ៨លាន៥សែនដុល្លារអាមេរិក។ ក្នុងនោះផ្លូវជាតិលេខ២មានប្រវែងសរុបជាង ៦២គីឡូម៉ែត្រ និងផ្លូវជាតិលេខ ២២ មានប្រវែងសរុបជិត១០គីឡូម៉ែត្រ។ គម្រោងផ្លូវថ្នល់នេះ ឆ្លងកាត់រាជធានី-ខេត្តចំនួន៣ រួមមានខេត្តកណ្តាល រាជធានីភ្នំពេញ និងខេត្តតាកែវ៕