ចិនមានពលរដ្ឋជាង ៦០០លាននាក់ហើយ បានទទួលបានការចាក់វ៉ាក់សាំងបង្ការកូវីដ-១៩

បើតាមគណៈកម្មការសុខាភិបាលជាតិរបស់ចិន គិតមកដល់បច្ចុប្បន្ននេះ ប្រជាជនចិនទាំងក្មេងទាំងចាស់ប្រមាណ ៦២២លាននាក់ហើយ ដែលទទួលបានការចាក់វ៉ាក់សាំង ហើយបើគេរាប់ជាចំនួនវ៉ាក់សាំងវិញ គឺមានដល់ ៨៤៥លានដូស ដោយហេតុថា មានពលរដ្ឋខ្លះទទួលបាន១ដូស ខ្លះទៀតទទួលបានទាំងពីរដូស។ ប៉ុន្តែ អាជ្ញាធរសុខាភិបាលចិនពុំបានបង្ហាញពីទិន្នន័យ ពលរដ្ឋចិនដែលទទួលបានវ៉ាក់សាំងទាំងពីរដូស ថាមានចំនួនប៉ុន្មាននោះទេ។

អ្វីដែលគួរឲ្យចាប់អារម្មណ៍នោះ គឺនៅត្រង់ថា ចិនបានក្លាយជាប្រទេសទី១ ដំបូងគេបំផុតដែលបានអនុញ្ញាតឲ្យប្រើប្រាស់វ៉ាក់សាំង Sinovac សម្រាប់កុមារអាយុចាប់ពី៣ឆ្នាំដល់ ១៧ឆ្នាំ។ ប៉ុន្តែគេនៅមិនទាន់ដឹងនៅឡើយទេថា ដំណើរការចាក់វ៉ាក់សាំង សម្រាប់កុមារនឹងចាប់ផ្តើមឡើង នៅពេលណា។ 

ក្រៅពី Sinovac ក៏មានដែរវ៉ាក់សាំងមួយទៀតរបស់ចិនគឺ Sinopharm ដែលអជ្ញាធរចិន អះអាងថាវ៉ាក់សាំងរបស់ខ្លួនមួយប្រភេទនេះ ក៏មានប្រសិទ្ធភាពសម្រាប់ការពារកុមារពីជំងឺកូវីដ-១៩ផងដែរ។ ប៉ុន្តែគេមិនបានបញ្ជាក់ថា តើវ៉ាក់សាំងរបស់ Sinopharm អាចទទួលភ្លើងខៀវពីអាជ្ញាធរដែរ ឬយ៉ាងណានោះទេ។ មន្ត្រីសុខាភិបាលចិនគ្រាន់តែបានបញ្ជាក់ថា Sinopharm ក៏កំពុងស្ថិតក្នុងការត្រួតពិនិត្យដើម្បីទទួលបានការអនុញ្ញាតប្រើប្រាស់លើកុមារដូចគ្នា។

សូមបញ្ជាក់ថា រដ្ឋាភិបាលក្រុងប៉េកាំង រំពឹងថា អាចចាក់វ៉ាក់សាំងដល់ប្រជាជនខ្លួនបាន ៧០%នៃពលរដ្ឋគោលដៅ ក្នុងចំណោមប្រជាជនទាំង ១ពាន់៤រយលាននាក់របស់ខ្លួន នៅត្រឹមដំណាច់ឆ្នាំ២០២១ខាងមុខនេះ ខណៈដែលនៅរៀងរាល់ថ្ងៃបើគេគិតជាមធ្យម ចិនមានលទ្ធភាពអាចចាក់វ៉ាក់សាំងបាន ១៧លានដូសក្នុងមួយថ្ងៃ។

តាមទិន្នន័យដែលរៀបរៀងដោយសារព័ត៌មាន Bloomberg បានបង្ហាញថា គិតមកទល់ពេលនេះ ការចាក់វ៉ាក់សាំងនៅទូទាំងពិភពលោកសម្រេចបានជាង២ពាន់៣រយលានដូសហើយ នៅក្នុងប្រទេស១៧៨ប្រទេស។ បន្ទាប់ពីចិនដែលឈរកំពូលតារាងដែលមានការចាក់វ៉ាក់សាំងច្រើនជាងគេបំផុតនោះ សហរដ្ឋអាមេរិកក៏កំពុងសម្រុកចាក់វ៉ាក់សាំងកាន់តែច្រើនផងដែរ ដោយមកទល់ពេលនេះ អាមេរិកសម្រេចបានការចាក់វ៉ាក់សាំងជាង៣០០លានដូសហើយ បន្ទាប់មក គឺអឺរ៉ុបប្រកៀកប្រកិតនឹងសហរដ្ឋអាមេរិកដែរដែលមានជិត៣០០លានដូស និងឥណ្ឌាវិញចាក់បាន២៥០លានដូស៕