ទោះយ៉ាងណា អ្នកជំនាញកសិកម្ម ក៏ដូចជាមន្ត្រីជាន់ខ្ពស់ក្រសួងកសិកម្មយល់ឃើញថា បញ្ហាខ្វះទឹកធ្វើស្រែប្រាំងនេះ នឹងមិនបង្កឲ្យមានផលប៉ះពាល់ដល់សមត្ថភាពនាំចេញ និងសន្ដិសុខស្បៀងនោះឡើយ។
លោក ច័ន្ទ សុផល នាយកមជ្ឈមណ្ឌលសិក្សាគោលនយោបាយ បានយល់ឃើញថា ការខ្វះខាតទឹកសម្រាប់បង្កបង្កើនផលស្រូវនៅរដូវប្រាំងនេះ ពុំអាចប៉ះពាល់ដល់ សន្តិសុខស្បៀងនោះទេ។ ពុំអាចប៉ះពាល់ក៏ដោយសារតែបច្ចុប្បន្នកសិករផលិតស្រូវបានច្រើនខែ តាមរយៈប្រព័ន្ធទឹកដែលមានស្រាប់។ ទន្ទឹមគ្នានេះ លោកកត់សម្គាល់ថា ការខ្វះទឹកធ្វើស្រូវប្រាំងឆ្នាំនេះ គឺអាចខ្វះតែសម្រាប់អ្នកធ្វើស្រែប្រាំងលើសពីសមត្ថភាពនៃអាងស្តុកទឹកនៅកន្លែងណាមួយប៉ុណ្ណោះ ហើយបញ្ហានេះក៏ពុំអាចប៉ះពាល់ដល់ការផ្គត់ផ្គង់ស្រូវនោះដែរ។
ជុំវិញការខ្វះខាតទឹកធ្វើស្រែប្រាំងឆ្នាំនេះ អ្នកជំនាញកសិកម្ម លោក ច័ន្ទ សុផល បានលើកឡើងថា ដំណោះស្រាយរយៈពេលវែង គឺត្រូវពិនិត្យរកតំបន់ថ្មីៗបន្ថែមទៀតដើម្បីបង្កើតអាងទឹកនិងតំបន់ស្ទាក់ទឹកភ្លៀងសម្រាប់ស្តុកទុកប្រើប្រាស់។ ក្រៅពីនោះ ក៏ត្រូវបង្កើតប្រព័ន្ធប្រឡាយទឹកបន្ថែមទៀត ដើម្បីអូសទឹកពីទន្លេ ដែលមានស្រាប់សម្រាប់យកទៅប្រើប្រាស់ផងដែរ។
អត្ថបទគួរអាន
ជាមួយគ្នានេះ ឯកឧត្តម ឃឹម ហ្វីណង់ អនុរដ្ឋលេខាធិការ និងជាអ្នកនាំពាក្យ ក្រសួងកសិកម្ម រុក្ខាប្រមាញ់ និងនេសាទ បានបង្ហាញការរំពឹងទុកថា ការបង្កបង្កើនផលស្រូវប្រាំងក្នុងឆ្នាំនេះនឹងមិនមានផលប៉ះពាល់ដល់សន្តិសុខស្បៀងនោះឡើយ ហើយទិន្នផលស្រូវក៏នឹងមិនមានការថយចុះនោះដែរ។ អ្នកនាំពាក្យរូបនេះ គូសបញ្ជាក់ថា តំបន់ដែលខ្វះខាតទឹកភាគច្រើន គឺជាតំបន់ដែលតែងតែប្រឈមនឹងការខ្វះខាតទឹកដូចរាល់ឆ្នាំ និងពុំបានចាត់បញ្ចូលក្នុងផែនការប្រចាំឆ្នាំកន្លងមកនោះទេ។
យោងទិន្នន័យពីក្រសួងកសិកម្ម រុក្ខាប្រមាញ់ និងនេសាទ គិតត្រឹមខែមករា ឆ្នាំ២០២៤ ផ្ទៃដីដាំដុះស្រែប្រាំងក្នុងឆ្នាំនេះ មានចំនួនជាង៧១ម៉ឺនហិកតា ខណៈនៅក្នុងផែនការមានត្រឹមតែជាង ៤១ម៉ឺនហិកតាប៉ុណ្ណោះ។
បើតាមក្រសួងធនធានទឹក និងឧតុនិយម បានឱ្យដឹងថា ចាប់ពីខែកុម្ភៈ ដល់ដើមខែឧសភា អាកាសធាតុកើនកម្ដៅជាលំដាប់ នឹងក្តៅខ្លាំងនៅក្នុងខែមេសា ដល់ដើមខែឧសភា ជាមួយនឹងសីតុណ្ហភាពមធ្យមអតិបរមា ៣៨អង្សាសេ និងសីតុណ្ហភាពអតិបរមានៅក្នុងថ្ងៃខ្លះអាចឡើងដល់ ៤១ អង្សាសេ និងបានស្នើដល់អាជ្ញាធរដែនដី ព្រមទាំងសាធារណជន ចូលរួមសហការថែរក្សា និងប្រើប្រាស់ទឹកដោយសន្សំសំចៃក្នុងកម្រិតខ្ពស់បំផុត ជាពិសេសបណ្តាតំបន់ជនបទដាច់ស្រយាល នៅឆ្ងាយពីប្រភពទឹក៕
None
