លោកពូទីនបានថ្លែងប្រាប់ទូរទស្សន៍រដ្ឋរុស្ស៊ី បន្ទាប់ពីកិច្ចពិភាក្សាជាមួយមេដឹកនាំក្នុងប្រទេស តូមិននីស្ថាន ដែលជាអតីតរដ្ឋសមាជិករបស់សហភាពសូវៀតនៅអាស៊ីកណ្តាលថា ស៊ុយអែតនិងហ្វាំងឡង់ បើនិយាយចំពោះរុស្សី គឺគ្មានបញ្ហាជាមួយប្រទេសទាំងពីរនេះទេ ហើយបើពួកគេចង់ចូលណាតូក៏ចូលចុះ វាក៏មិនមែនជារឿងខុសទាស់អ្វីដែរ។
ប៉ុន្ដែអ្វីដែលលោកពូទីនបានសង្កត់ធ្ងន់នោះគឺថា៖ «អ្វីដែលស៊ុយអែត និងហ្វាំងឡង់ត្រូវតែយល់ឲ្យច្បាស់ គឺពួកគេជាមួយនឹងរុស្ស៊ី គ្មានការគំរាមគំហែងនឹងគ្នាពីមុនមកទេ ផ្ទុយទៅវិញក្នុងពេលឥឡូវនេះ បើណាតូហ៊ានដាក់ពង្រាយកម្លាំងយោធា និងបង្កើតហេដ្ឋារចនាសម្ព័ន្ធណាមួយនៅលើប្រទេសទាំងពីរនេះ នោះរុស្សីនឹងត្រូវឆ្លើយតបទៅវិញយ៉ាងស័ក្ដិសម ព្រមទាំងបង្កើតការគំរាមគំហែងទៅលើប្រទេសទាំងពីរនេះវិញ ដូចដែលពួកគេបានធ្វើមកលើរុស្សី»។ នេះបើតាមការអះអាងច្បាស់ៗរបស់លោក ពូទីន។
បុរសខ្លាំងរុស្សីរូបនេះនិយាយថា ទំនាក់ទំនងរវាងរុស្ស៊ី និងស៊ុយអ៊ែត និងហ្វាំឡង់ នឹងមានភាពល្អក់ កករមិនដូចពីមុនតទៅទៀតទេ ហើយភាពតានតឹងនឹងកើតឡើងរវាងគ្នានឹងជៀសមិនរួច ដោយសារប្រទេសទាំងពីរនេះចូលជាសមាជិកណាតូរួចទៅហើយ។
សូមរំលឹកបន្តិចថា ការធ្វើសេចក្តីអត្ថាធិប្បាយរបស់លោកពូទីននេះធ្វើឡើងមួយថ្ងៃ បន្ទាប់ពីសមាជិកមួយរបស់អង្គការណាតូ គឺប្រទេសទួកគីបានដកការវេតូប្រឆាំងរបស់ខ្លួន ហើយបានសម្រេចឲ្យប្រទេសហ្វាំងឡង់និងស៊ុយអែតចូលជាសមាជិកពេញសិទ្ធិនៃអង្គការណាតូ។
ស្របពេលដែលសង្គ្រាមរវាងរុស្សី និងអ៊ុយក្រែនកាន់តែខ្លាំងក្លាទៅៗ និងមិនដឹងពេលណាបិទបញ្ចប់នោះ គេមើលឃើញថា ការប្រឈមមុខយោធាដាក់គ្នាដោយប្រយោលរវាងអង្គការណាតូ និងរុស្សីកាន់តែមានភាពស្រួចស្រាល់ទៅៗ ដែលធ្វើឲ្យសន្តិសុខនៅអឺរ៉ុបទាំងមូលស្ថិតក្នុងភាពមិនច្បាស់លាស់។
អត្ថបទគួរអាន
ក្នុងពេលថ្មីៗនេះដែរ ខណៈពេលដែលមេដឹកនាំអង្គការណាតូទាំង ៣០ ប្រទេសកំពុងជួបប្រជុំគ្នានៅទីក្រុងម៉ាឌ្រីត កងកម្លាំងរុស្ស៊ីបានបង្កើនការវាយប្រហារនៅអ៊ុយក្រែនឥតត្រាប្រណី រួមទាំងការបាញ់ស្រោចដោយមីស៊ីល និងគ្រាប់ផ្លោងយ៉ាងសន្ធឹកសន្ធាប់ទៅលើកងទ័ពអ៊ុយក្រែននៅទីក្រុងមៃកូលីវ (Mykolaiv) ភាគខាងត្បូងប្រទេស និងសមុទ្រខ្មៅផងដែរ។
អភិបាលក្រុងមៃកូលីវ (Mykolaiv) បាននិយាយថា មីស៊ីលរុស្ស៊ីបានសម្លាប់ជនស៊ីវិលយ៉ាងហោចណាស់ ៥ នាក់នៅក្នុងអគារលំនៅដ្ឋានរបស់គេ ខណៈដែលទីក្រុងម៉ូស្គូវិញ បានប្រាប់ព័ត៌មានក្នុងស្រុករុស្សីថា កងកម្លាំងរបស់ខ្លួនបានវាយប្រហារអ្វី ដែលខ្លួនហៅថា ជាមូលដ្ឋានហ្វឹកហ្វឺនយោធាបរទេសក្នុងតំបន់នោះតែប៉ុណ្ណោះ។
យ៉ាងណាមិញ ប្រធានាធិបតី អ៊ុយក្រែនលោក Zelenskiy បានទទូចប្រាប់អង្គការណាតូម្តងហើយម្តងទៀតថា កងកម្លាំងអ៊ុយក្រែនត្រូវការអាវុធ និងជំនួយបន្ថែមទៀត ហើយត្រូវការលឿនជាងនេះ ដើម្បីបំផ្លាញកងកម្លាំងកាំភ្លើងធំ និងកាំជ្រួចមីស៊ីលរបស់រុស្សី។ លោក ហ្សេលេស្គី បន្ថែមទៀតថា អ៊ុយក្រែន ត្រូវការថវិកាប្រមាណ ៥ពាន់លានដុល្លាក្នុងមួយខែៗដើម្បីប្រយុទ្ធទប់ទល់នឹងរុស្ស៊ី។ លោកបានគូសបញ្ជាក់ទៀតថា មហិច្ឆតារបស់ទីក្រុងម៉ូស្គូនឹងមិនបញ្ឈប់ត្រឹមអ៊ុយក្រែននេះនោះទេ ហើយសង្គ្រាមនេះវានឹងកំណត់លក្ខខណ្ឌនៅអឺរ៉ុប ក៏ដូចជាកំណត់សណ្តាប់ធ្នាប់ពិភពលោកផងដែរ។
មន្ត្រីចារកម្មកំពូលរបស់អាមេរិក លោកស្រីអាវរីល ហៃណេស (Avril Haines) បាននិយាយកាលពីថ្ងៃពុធសប្ដាហ៍នេះថា តាមសេណារីយ៉ូនៃស្ថានភាពសង្គ្រាមនៅអ៊ុយក្រែន ទីក្រុងមូស្គូនឹងដណ្តើមបានតែមួយភាគតូចប៉ុណ្ណោះ ប៉ុន្ដែរុស្សីមិនអាចវាយទម្លាយ និងដណ្តើមកាន់កាប់ភាគច្រើននៃទឹកដីអ៊ុយក្រែនបានទេ។
គួរជម្រាបជាថ្មីម្តងទៀតថា នៅក្នុងកិច្ចប្រជុំកំពូលណាតូថ្មីៗនេះ អង្គការណាតូបានចេញសេចក្តីថ្លែងការណ៍រួមមួយថា ប្រទេសរុស្ស៊ីគឺជា៖ «ការគំរាមកំហែងដ៏ខ្លាំងបំផុត និងដោយផ្ទាល់ចំពោះសន្តិសុខរបស់សម្ព័ន្ធមិត្ត» ហើយក្នុងនោះដែរណាតូ ក៏បានចេញឯកសារស្តីពីគោលគំនិតយុទ្ធសាស្ត្រថ្មីមួយ ដោយនិយាយថា៖ «ឯករាជ្យភាពដ៏រឹងមាំរបស់អ៊ុយក្រែន មានសារៈសំខាន់បំផុតសម្រាប់ស្ថិរភាពនៃតំបន់អឺរ៉ុប-អាត្លង់ទិក»៕
អត្ថបទ៖ ហ៊ុន គន្ធថៃ
