បើតាមអ្នកជំនាញផ្នែកពាណិជ្ជកម្មអន្តរជាតិរបស់ថៃ នៅចំពោះមុខភាពមិនប្រាកដប្រជានៃស្ថានការណ៍នយោបាយនៅមីយ៉ាន់ម៉ា ប្រទេសថៃនឹងខាតបង់ប្រាក់រាប់សិបលានបាតក្នុងមួយខែៗ ពីការធ្វើពាណិជ្ជកម្មជាមួយគ្នា ដែលនេះនឹងក្លាយជាបន្ទុកមួយទៀតទៅលើរដ្ឋាភិបាលលោកប្រាយុទ្ធ ស្របពេលដែលសេដ្ឋកិច្ចថៃកំពុងសង្កត់សង្កិនដោយកូវីដ១៩។
ក្រោយរដ្ឋប្រហារ នៅព្រឹកថ្ងៃទី១មករា សហគមន៍អន្តរជាតិបានចេញមកប្រតិកម្ម និងថ្កោលទោសយ៉ាងខ្លាំងទៅលើយោធាមីយ៉ាន់ម៉ា ដែលក្នុងនោះសហរដ្ឋអាមេរិកក្រោមរដ្ឋការរបស់លោក Joe Biden ដែលទើបឡើងកាន់ដំណែងថ្មីៗ ក៏បានអះអាងដែលថាខ្លួននឹងមិនរុញរារក្នុងការដាក់ទណ្ឌកម្មសេដ្ឋកិច្ចជាថ្មីលើមីយ៉ាន់ម៉ានោះទេ។
អត្ថបទគួរអាន
ប្រការនេះ ចោទជាការព្រួយបារម្ភយ៉ាងខ្លាំងពីសេដ្ឋវិទូថៃ ដែលពួកគេព្រមានថាទណ្ឌកម្មសេដ្ឋកិច្ចលើមីយ៉ាន់ម៉ា នឹងប៉ះពាល់ដល់ការវិយោគថៃនៅមីយ៉ាន់ម៉ា ក៏ដូចជាសេដ្ឋកិច្ចថៃទាំងមូល។ មិនមែនតែថៃទេ ដែលរកស៊ីនៅមីយ៉ាន់ម៉ា កម្ពុជាយើងក៏មានក្រុមហ៊ុនធំមួយចំនួន រកស៊ីនៅមីយ៉ាម៉ាផងដែរ តួយ៉ាងធនាគារអេស៊ីលីដា ក៏មានបង្កើតមីក្រូហិរញ្ញវត្ថុនៅមីយ៉ាន់ម៉ាផងដែរ។
ប្រទេសមីយ៉ាន់ម៉ា ត្រូវបានគេមើលឃើញថាស្ថិតនៅក្នុងចំណោមប្រទេស៣ នៅអាស៊ាន ដែលត្រូវបាន IMF ព្យាករថានឹងមានកំណើនសេដ្ឋកិច្ចវិជ្ជមាន ២% នៅឆ្នាំ២០២០ ហើយនៅឆ្នាំ២០២១នេះ ប្រទេសដែលទើបត្រូវបានធ្វើរដ្ឋប្រហារមួយនេះ ក៏ធ្លាប់ត្រូវបានព្យាករថានឹងមានកំណើន៥,៧%ដែរ។
មីយ៉ាន់ម៉ា ក៏មានទំនាក់ទំនងរកស៊ីជាមួយបណ្ដាប្រទេសនៅអាស៊ានដែរ ដោយទំហំពាណិជ្ជកម្មរវាងមីយ៉ាន់ម៉ា និងអាស៊ាន នៅ៩ខែនៃឆ្នាំសារពើពន្ធ២០១៩-២០២០ សម្រេចបានដល់ទៅប្រមាណ ១០ពាន់លានដុល្លារ។ នេះបើតាមរបាយការណ៍ពីក្រសួងពាណិជ្ជកម្មមីយ៉ាន់ម៉ា។
ក្នុងនោះផងដែរ ប្រទេសថៃ សិង្ហបុរី និងម៉ាឡេស៊ី គឺជាប្រទេសដៃគូពាណិជ្ជកម្មធំជាងគេរបស់មីយ៉ាន់ម៉ានៅអាស៊ាន ដែលសរុបទៅទំហំពាណិជ្ជកម្មរវាងមីយ៉ាន់ម៉ា និងប្រទេសទាំង៣នេះ មានជាង ៧ពាន់លានដុល្លារ។ ដោយឡែក នៅ៩ខែឆ្នាំសារពើពន្ធ ២០១៩-២០២០ ចំពោះពាណិជ្ជកម្មរវាងមីយ៉ាម៉ាជាមួយនឹងកម្ពុជាវិញមានតែជិត ២៦លានដុល្លារអាមេរិកប៉ុណ្ណោះ៕
None
