ថវិកាជាតិឆ្នាំ២០២២ ត្រូវបានគិតគូ និងរៀបចំឡើង ដើម្បីតម្រង់ការប្រើប្រាស់ធនធានក្នុងការបន្តប្រយុទ្ធប្រឆាំងការពារអាយុជីវិតប្រជាពលរដ្ឋ រក្សាលំនឹងសេដ្ឋកិច្ចសង្គម និងជីវភាពរស់នៅរបស់ប្រជាជន ក៏ដូចជាដើម្បីស្តារ និងជំរុញសេដ្ឋកិច្ចឡើងវិញ។ ការបន្តប្រតិបត្តិការ និងជំរុញការអនុវត្តកម្មវិធីកំណែទ្រទ្រង់របស់រាជរដ្ឋាភិបាល ក៏ជាគោលបំណងមួយផងដែរ នៃការអនុម័តច្បាប់ថវិកានេះផងដែរ។ គម្រោងចំណាយថវិកាជាតិសម្រាប់ឆ្នាំ២០២២ មានចំនួនជាង ៣៤ទ្រីលានរៀលស្មើប្រមាណជាង៨ពាន់៥រយលានដុល្លារ ធៀបនឹងផលិតផក្នុងស្រុកសរុបគឺមានប្រហែលជិត២៨%។
សេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២២ ដែលទទួលបានការអនុម័តទាំងស្រុងពីកិច្ចប្រជុំពេញអង្គគណៈរដ្ឋមន្ត្រីនៅព្រឹកថ្ងៃទី២២ តុលា គម្រោងចំណាយថវិកាជាតិជាង ៣៤ទ្រីលានរៀលស្មើប្រមាណជាង៨ពាន់៥រយលានដុល្លារ ធៀបនឹងផលិតផក្នុងស្រុកសរុបគឺមានប្រហែលជិត២៨%។ ទំហំនៃការចំណាយនេះ មានការកើនឡើងជាង ៨% បើធៀបនឹងការចំណាយថវិកាជាតិឆ្នាំ២០២១។ រីឯ ចំណូលថវិកាជាតិនៅឆ្នាំ២០២២វិញ ត្រូវបានគម្រោងជាង២៥ទ្រីលានរៀល ស្មើនឹងប្រមណ ៦ពាន់៣រយលានដុល្លារអាមេរិក ឬស្មើនឹងជាង២០%នៃផលិតផលក្នុងស្រុក។ ចំណូលថវិការដ្ឋដែលបានគ្រោងទុកនេះ គឺមានការកើនឡើងជាង១៩% បើធៀបនឹងច្បាប់ថវិកាឆ្នាំ២០២១។ ជាលទ្ធផលអតិរេកថវិកាចរន្ដ អាចរក្សាបានក្នុងកម្រិតប្រមាណជិត៣% នៃផលិតផលក្នុងស្រុកសរុបនៅឆ្នាំ២០២២ និងមានឱនភាពថវិកាសរុបស្មើនឹងជាង (ដក)-៧% នៃផលិតផលក្នុងស្រុកសរុប។ ដើម្បីបំពេញបន្ថែម ឱនភាពថវិកានេះ រដ្ឋាភិបាលនឹងបន្ដស្វែងរកហិរញ្ញប្បទានក្រៅប្រទេស ក្នុងទំហំជិត៥%នៃផលិតផលក្នុងស្រុកបន្ថែមទៀត រួមទាំងប្រភពហិរញ្ញវត្ថុពីមូលនិធិទ្រទ្រង់ថវិកាទំហំជាង១%នៃផលិតផលក្នុងស្រុកសរុប និងប្រាក់បញ្ញើរដ្ឋាភិបាលប្រមាណ៥០០លានដុល្លារផងដែរ។ ប្រភពហិរញ្ញវត្ថុបន្ថែមទៀតនោះ ដែលរដ្ឋាភិបាលទាញយកមកបង្គ្រប់ការចំណាយនៅឆ្នាំក្រោយនេះ គឺរាជរដ្ឋាភិបាលនឹងធ្វើការបោះផ្សាយលក់មូលបត្ររដ្ឋជាលើកដំបូងក្នុងទំហំប្រមាណ ៣០០លានដុល្លារអាមេរិកផងដែរ។
អត្ថបទទាក់ទង!
ថវិកាឆ្នាំ២០២២ ត្រូវបានគិតគូរ និងរៀបចំឡើងក្នុងបរិការណ៍ដែលកម្ពុជា ក៏ដូចជាពិភពលោក ទាំងមូលកំពុងស្ថិតនៅកណ្តាលនៃវិបត្តិជំងឺកូវីដ-១៩ នៅឡើយ ដែលតម្រូវឱ្យរាជរដ្ឋាភិបាលតម្រង់ការប្រើប្រាស់ ធនធានដើម្បីទ្រទ្រង់ដល់កិច្ចខិតខំប្រយុទ្ធនឹងជំងឺកូវីដ-១៩ និងស្តារ និងជំរុញសេដ្ឋកិច្ចឱ្យបន្តស្ថិតនៅលើគន្លងនៃកំណើនខ្ពស់ និងរស់រវើកឡើងវិញ ព្រមទាំងស្តារជីវភាពរបស់ប្រជាជនទូទៅ ក៏ដូចជាដើម្បី សម្រេចឲ្យបាននូវគោលដៅសំខាន់ៗ នៃកម្មវិធីនយោបាយ, យុទ្ធសាស្ត្រចតុកោណ-ដំណាក់កាលទី៤ និង ផែនការយុទ្ធសាស្ត្រអភិវឌ្ឍន៍ជាតិឆ្នាំ២០១៩-២០២៣។
សូមបញ្ជាក់ថា នៅឆ្នាំ២០២២ខាងមុខ រាជរដ្ឋាភិបាលកម្ពុជារំពឹងថា កំណើនសេដ្ឋកិច្ចកម្ពុជានឹងកើនក្នុងរង្វង់៤,៨% ដែលធ្វើឲ្យផលិតផលក្នុងស្រុកសរុបមានក្នុងទំហំជាង៣០ពាន់លានដុល្លារអាមេរិក ខណៈដែលផលិតផលក្នុងស្រុកសរុបសម្រាប់មនុស្សម្នាក់វិញត្រូវបានរំពឹងថា នឹងកើនដល់ ១.៨៤២ ដុល្លារអាមេរិក កើនពី១.៧៣០ដុល្លារអាមេរិកកាលពីឆ្នាំ២០២១៕
None
