ជម្លោះការទូតរវាងរុស្សីនិងអាមេរិក នៅបន្តឆេះងំនៅឡើយទេមកដល់ពេលនេះ។ បើតាមការអះអាងពីលោកឯកអគ្គរដ្ឋទូតរុស្សីប្រចាំនៅអាមេរិក លោក អាណាតូលិ អាន់តូនូវ (Anatoly Antonov) អ្នកការទូតរុស្សីមួយក្រុមធំ ដែលមានគ្នាប្រមាណ ២៧នាក់ បូករួមទាំងក្រុមគ្រួសាររបស់ពួកគេផងនោះ នឹងចាកចេញពីសហរដ្ឋអាមេរិក ត្រឡប់ទៅប្រទេសរុស្សីវិញនៅថ្ងៃទី៣០ មករា ឆ្នាំ២០២២ខាងមុខហើយ។ លោក អាណាតូលិ បានបង្ហាញក្តីបារម្ភពីការបន្តចាកចេញរបស់មន្ត្រីទូតរបស់ខ្លួនព្រោះថា បច្ចុប្បន្ន លោកកំពុងខ្វះមន្ត្រីសម្រាប់បម្រើការងារ ស្រាប់ទៅហើយ។
ភាគីរុស្សីបានឲ្យដឹងថា ចាប់តាំងពីឆ្នាំ២០១៦ គ្រាដែលចំណងការទូតរវាងប្រទេសទាំងពីរចាប់ផ្តើមរង្គោះរង្គើ មកទល់នឹងពេលនេះ មានមន្ត្រីការទូតរុស្សីយ៉ាងហោច ១០០នាក់ហើយ ដែលបានបណ្តេញចេញពីសហរដ្ឋអាមេរិក។
យ៉ាងណាមិញ បើគិតត្រឹមចុងខែតុលាឆ្នាំ២០២១នេះ នៅមានមន្ត្រីជនជាតិរុស្សីប្រមាណជិត ២០០នាក់ទៀត កំពុងបន្តធ្វើការងារនៅក្នុងសហរដ្ឋអាមេរិកនៅឡើយ បូករួមទាំងកងកម្លាំងការងាររុស្សី ធ្វើការនៅអង្គការសហប្រជាជាតិ ក្នុងទីក្រុងញូយ៉កផងដែរ។
អត្ថបទគួរអាន
គួររំឭកថា ទំនាក់ទំនងចាប់តាំងពីពេលក្រោយសង្គ្រាមត្រជាក់រវាងប្រទេសទាំងពីរ បានធ្លាក់ដល់កម្រិតទាបបំផុត ពោលគឺរុស្សី និងសហរដ្ឋអាមេរិក កំពុងមានជម្លោះទាក់ទិននឹងបេសកកម្មការទូតរបស់ខ្លួន ដែលក្នុងនោះ ក៏រួមមានភាពរកាំរកូសទាក់ទងនឹងចំនួនអ្នកការទូត ដែលត្រូវបញ្ជូនទៅធ្វើការនៅក្នុងស្ថានទូត ក្នុងរដ្ឋធានីនៃប្រទេសទាំងពីរផងដែរ។
បន្ថែមពីលើបញ្ហាស្ថានទូតនេះ នៅមានបញ្ហាធំៗពីរទៀត ដែលរុញច្រានឲ្យមហាអំណាចលើពិភពលោកទាំងពីរ មើលមុខគ្នាមិនត្រង់ គឺការចោទប្រកាន់ពីសំណាក់ភាគីអាមេរិកលើរុស្សីថាបាន លូកដៃចូលក្នុងការបោះឆ្នោតរបស់អាមេរិកចំនួនពីរដង និងចុងក្រោយកាលពីខែឧសភា គឺជាការវាយប្រហារតាមអ៊ីនធឺណែតលើក្រុមហ៊ុន និងប្រព័ន្ធបង្ហូរប្រេងនៅឆ្នេរសមុទ្រភាគខាងកើតរបស់អាមេរិក ដែលបានបណ្តាលឲ្យខាតបង់ប្រាក់អស់ជាច្រើនផងដែរ។
សូមជម្រាបថា កាលពីពេលថ្មីៗនេះសហរដ្ឋអាមេរិកបានកំណត់ ដាក់ជនជាតិរុស្ស៊ីដែលស្វែងរកទិដ្ឋាការចូលទឹកដីសហរដ្ឋអាមេរិក ទៅក្នុងបញ្ជីក្របខណ្ឌនៃ "ជនគ្មានផ្ទះសម្បែង" (homeless) ឬជនអានាថា ដើម្បីបានទិដ្ឋាការធ្វើដំណើរចូលទៅសហរដ្ឋអាមេរិក។ ប្រការនេះត្រូវបានថ្កោលទោសយ៉ាងខ្លាំងពីទីក្រុងម៉ូស្កូ៕
None
