គោលបំណង នៃការផ្លាស់ប្តូររូបរាងស្លាកសញ្ញាថ្មី របស់ធនាគារ អេស៊ីលីដា ភីអិលស៊ី ត្រូវបាន បណ្ឌិត អុិន ចាន់នីបញ្ជាក់ថា ស្លាកសញ្ញាថ្មី ធនាគារ អេស៊ីលីដា ភីអិលស៊ី ជា "និមិត្តរូបបក្សីសួគ៌" ឈរនៅចំកណ្តាលរង្វង់មូលពណ៌ខៀវទឹកប៊ិក ដែលបង្ហាញពីភាពរឹងមាំ និងវឌ្ឍនភាពប្រកបដោយចីរភាព។
ម្យ៉ាងវិញទៀត និមិត្តសញ្ញាថ្មីនេះ ក៏ស្របតាម ទស្សនៈ បេសកកម្ម យុទ្ធសាស្ត្រ និងការអភិវឌ្ឍបច្ចេកវិទ្យាហិរញ្ញវត្ថុទាន់សម័យជាសកល។ ចំណែកពណ៌នៃស្លាកសញ្ញាថ្មី គឺមានបីពណ៌ គឺពណ៌ស ពណ៌មាស និងពណ៌ខៀវទឹកប៊ិក។
លោកបណ្ឌិតបានបន្តថា «ចំពោះអត្ថន័យនៃស្លាកសញ្ញាថ្មីនេះ គឺពណ៌នីមួយៗ មានពោរពេញដោយអត្ថន័យ ដោយក្នុងនោះ ពណ៌ស គឺចង់សំដៅដល់អភិសមាចារ ដែលមានន័យតម្លាភាព ភាពស្មោះត្រង់ និងសុចរិតភាព ចំណែកពណ៌មាស ជាពណ៌ដែលបង្ហាញពី គុណតម្លៃ និងគុណភាព និងពណ៌ ខៀវទឹកប៊ិក យើងចង់បង្ហាញពីការ សាមគ្គីភាព ស្ថិរភាព និងសុវត្ថិភាព។ ដូច្នេះពណ៌ទាំងបីបញ្ចូលគ្នាប្រៀបទៅនឹងគ្រាប់ពូជ និងធនធានដែលបានរីកដុះដាល និងអភិវឌ្ឍក្នុងវិស័យហិរញ្ញវត្ថុ ប្រកបដោយចីរភាព។ ស្លាកសញ្ញាថ្មីនេះ នឹងរៀបចំដាក់ឲ្យប្រើប្រាស់ ជាផ្លូវការចាប់ពីខែមករា ឆ្នាំ២០២១ ខាងមុខនេះ»។
អត្ថបទទាក់ទង!
បណ្ឌិត អុិន ចាន់នី បានមានប្រសាសន៍បន្ថែមទៀតថា «យើងមានសេចក្តីរីករាយ ដែលបានរួមចំណែកកសាងនូវប្រយោជន៍សម្រាប់ជាតិប្រកបដោយកតញ្ញូ និងកតវេទី។ នេះជាស្នាដៃបានកើតឡើងពីធនធានមនុស្សដែលជាកម្មករនិយោជិតជនជាតិខ្មែរ និងមានការគាំទ្រយ៉ាងពេញទំហឹងពីរាជរដ្ឋាភិបាលជាពិសេស ធនាគារជាតិនៃកម្ពុជា អតិថិជន និងសាធារណជន ដែលបានកសាងសមិទ្ធផលជាប្រយោជន៍យ៉ាងច្រើនជាបន្តបន្ទាប់»។
ចំពោះទំហំទឹកប្រាក់ក្នុងការចំណាយប្តូរផ្លាស់និមិត្តសញ្ញាថ្មីរបស់ធនាគារអេស៊ីលីដានេះដែរ មិនត្រូវបានប្រធាននាយកប្រតិបត្តិ ធនាគារ អេស៊ីលីដា ភីអិលស៊ី បញ្ជាក់ច្បាស់លាស់នោះទេ ដោយលោកគ្រាន់តែបញ្ជាក់ថា មានទំហំតិចតួចប៉ុណ្ណោះ ដោយសារតែក្នុងអាណត្តិដែលលោកបានធ្វើការនេះ គឺបានផ្លាស់ប្តូរនិមិត្តសញ្ញា៣ទៅហើយ ដោយការប្តូរចំនួន ២លើកមុនបានចំណាយច្រើន ព្រោះត្រូវការព្រីនបោះពុម្ពឯកសារ ខណៈដែលការប្តូរលើកទី៣នេះ គឺប្រើប្រាស់ឌីជីថលភាគច្រើន ទើបការចំណាយអស់តិច។
ស្របគ្នាជាមួយនឹងផ្លាស់ប្តូរនិមិត្តសញ្ញាថ្មីនេះ
រូប App
អេស៊ីលីដាទាន់ចិត្តក៏បានផ្លាស់ប្តូរមកជា ACLEDA
Mobile ផងដែរ ដែល Appថ្មីនេះ នឹងជួយឲ្យប្រើប្រាស់កាន់តែមានភាពងាយស្រួលជាងមុន
ខណៈដែលការប្រើប្រាស់ Appនេះ ក៏លែងបង់ថ្លៃសេវាប្រចាំខែទៀតហើយ
ពោលគឺឥតគិតថ្លៃចំពោះការប្រើប្រាស់ App ACLEDA Mobile នេះ។
គួរបញ្ជាក់ថា ធនាគារ អេស៊ីលីដា ភីអិលស៊ី មានក្រុមហ៊ុនបុត្រសម្ព័ន្ធចំនួន ០៤ (បួន) គឺអេស៊ីលីដា ស៊ីឃ្យួរឹធី ភីអិលស៊ី, វិទ្យាស្ថាន ពាណិជ្ជសាស្ត្រ អេស៊ីលីដា, ធនាគារ អេស៊ីលីដា ឡាវ លីមីធីត, និងស្ថាប័ន មីក្រូហិរញ្ញវត្ថុ អេស៊ីលីដា មីយ៉ាន់ម៉ា និងព្រមទាំងមានការិយាល័យតំណាងនៅសាធារណរដ្ឋសហភាពមីយ៉ាន់ម៉ា។
បណ្ឌិត អុិន ចាន់នី ប្រធាននាយកប្រតិបត្តិ ធនាគារ អេស៊ីលីដា ភីអិលស៊ី
គិតត្រឹមដំណាច់ខែកញ្ញា ឆ្នាំ២០២០ នេះ ធនាគារ អេស៊ីលីដា ភីអិលស៊ី មានទ្រព្យសកម្មសរុបចំនួន ២៦,១០ ទ្រីលានរៀល (ឬ ៦,៣៧ ប៊ីលានដុល្លារអាមេរិក) សមតុល្យ ឥណទានសរុបចំនួន ១៦,៩៩ ទ្រីលានរៀល (ឬ ៤,១៤ ប៊ីលានដុល្លារអាមេរិក) និងប្រាក់បញ្ញើសន្សំសរុបចំនួន ១៨,៥៦ ទ្រីលានរៀល (ឬ ៤,៥៣ ប៊ីលានដុល្លារអាមេរិក) និងចំនួនអ្នកចុះឈ្មោះប្រើប្រាស់សេវាធនាគារ ឌីជីថល អេស៊ីលីដា ទាន់ចិត្ត ច្រើនជាង ១,៦២លាននាក់ គិតត្រឹមដំណាច់ខែកញ្ញា ឆ្នាំ២០២០៕
None
