ក្រសួងឧស្សាហកម្ម និងពាណិជ្ជកម្មវៀតណាម បានស្នើដល់ភាគីពាក់ព័ន្ធទាំងអស់ ដូចជា ក្រសួងស្ថាប័នរដ្ឋ សមាគមអ្នកនាំចេញ និងផលិតគ្រឿងសមុទ្រវៀតណាម ជាពិសេស អ្នកនាំចេញត្រីប្រាផ្ទាល់តែម្តងត្រូវបន្តសហការផ្តល់ព័ត៌មានសុក្រិត និងច្បាស់លាស់ដល់ នាយកដ្ឋានពាណិជ្ជកម្មអាមេរិកដើម្បីទទួលបានលទ្ធផលល្អនាពេលខាងមុខ។
យោងតាមសមាគមអ្នកនាំចេញ និងផលិតគ្រឿងសមុទ្រវៀតណាម បានគូសបញ្ជាក់ថា ក្នុងត្រីមាសទី ១ដើមឆ្នាំនេះ បញ្ហាមេរោគកូវីដ១៩ បានសាយភាយឥទ្ធិពលអាក្រក់ដល់ ការនាំចេញត្រីប្រា ដោយសម្រេចបានត្រឹមតែជាង ៣៣០លានដុល្លារអាមេរិក ធ្លាក់ចុះប្រមាណ ៣០% ធៀបនឹងពេលដូចគ្នា កាលពីឆ្នាំមុន។
អត្ថបទគួរអាន
សមាគម បន្តថា ក្នុងខែមីនា កន្លងទៅនេះ ការនាំចេញត្រីប្រា ទៅសហរដ្ឋអាមេរិក សម្រេចបាន ២៣លានដុល្លារអាមេរិក កើនឡើង ២៦% ធៀបនឹងរយៈពេលដូចគ្នា កាលពីឆ្នាំមុន។
ទោះបីជាយ៉ាងណាក៏ដោយ ការអភិវឌ្ឍន៍អាជីវកម្មពីខ្នាតតូច ទៅជា ខ្នាតធំ នៅក្នុងវិស័យនេះ គឺនៅមានភាពប្រកួតប្រជែងខ្លាំង ដោយសារតែ ការប្រើប្រាស់បច្ចេកវិទ្យារបស់ សហគ្រាសធំៗ អាចធ្វើឲ្យ ផលិតកម្មត្រីប្រា អាចទទួលទិន្នផលច្រើនជាងមុន ដែលធ្វើឲ្យមានការលំបាក សម្រាប់អ្នកចាប់ផ្តើមពង្រីកអាជីវកម្មថ្មីៗ។
លើសពីនេះ ក្រុមហ៊ុនធំៗមួយចំនួនរបស់វៀតណាម ក៏ទទួលបាននូវការលើកទឹកចិត្ត ចំពោះការនាំចេញត្រីប្រា ទៅកាន់សហរដ្ឋអាមេរិក ដោយអាចនាំចេញបានក្នុងអត្រាពន្ធសូន្យផងដែរ។
គួរជម្រាបដែរថា ត្រីប្រាវៀតណាម មានកាតព្វកិច្ចជាប់ពន្ធការពារការលក់បង្ខូចថ្លៃរបស់ អាមេរិក តាំងពីឆ្នាំ ២០០៣មកម្ល៉េះ ហើយអត្រាពន្ធ ត្រូវបានពិនិត្យ និងកែប្រែជារៀងរាល់ឆ្នាំ ហើយកាលពីចុងឆ្នាំ ២០១៩កន្លងទៅ នាយកដ្ឋានកសិកម្មអាមេរិក ទើបតែប្រកាសទទួលស្គាល់ជាផ្លូវការ សេវាកម្មត្រួតពិនិត្យគុណភាព ត្រីប្រា របស់ប្រទេសវៀតណាម ក្រោយការចរចាគ្នាអស់រយៈពេលជាង ៣ឆ្នាំ ហើយវា សបញ្ជាក់ថា ប្រទេសវៀតណាម មានប្រព័ន្ធត្រួតពិនិត្យគុណភាពល្អ និងអាចបំពេញទៅតាមលក្ខខណ្ឌរបស់ អាមេរិក ដែលជាប្រទេសដ៏តឹងរ៉ឹងបំផុត ក្នុងពិភពលោក៕
None
