ក្រុមហ៊ុនផលិតប្រេងធំៗរកបានប្រាក់ចំណេញកប់ក្តោង ស្របពេលតម្លៃប្រេងកើនឡើង

នេះបើតាមការចុះផ្សាយដោយទីភ្នាក់ងារសារព័ត៌មានបារាំង AFP។

ក្រុមហ៊ុនផលិតប្រេងធំៗចំនួន៣ រួមមាន ក្រុមហ៊ុនអាមេរិក ExxonMobil ក្រុមហ៊ុន TotalEnergies របស់បារាំង និងក្រុមហ៊ុនយក្សរបស់ចក្រភពអង់គ្លេស Shell និង BP បានប្រកាសកាលពីសប្តាហ៍មុនថា ប្រាក់ចំណេញក្នុងឆ្នាំ២០២១សរុបមានចំនួនជិត ៦៧ពាន់លានដុល្លារអាមេរិក។ ក្នុងនោះ ExxonMobil ចំណេញ ២៣ពាន់លានដុល្លារក្នុងឆ្នាំ២០២១ Shell ចំណេញ២០ពាន់លានដុល្លារ ក្រុមហ៊ុន TotalEnergies ចំណេញ ១៦ពាន់លានដុល្លារ។

ប្រាក់ចំណេញនេះ បានកត់សម្គាល់ឃើញពីការផ្លាស់ប្តូរដ៏ធំពីឆ្នាំ២០២០ គ្រាដែលពួកគេបានប្រកាសពីការខាតបង់នៅពេលដែលជំងឺរាតត្បាតបានលេចឡើង ដែលជំរុញឱ្យមានការបិទទ្វារប្រទេស និងជើងហោះហើរ នាំឱ្យសេដ្ឋកិច្ចពិភពលោកមានការផ្អាកសកម្មភាព និងបណ្តាលឱ្យតម្លៃប្រេងឆៅធ្លាក់ចុះ។

ប៉ុន្តែនៅឆ្នាំ២០២១ តម្លៃប្រេង និងឧស្ម័នបានកើនឡើងយ៉ាងខ្លាំងវិញ ដោយបានហក់ឡើងដល់ ជាង៧០ដុល្លារឯណោះក្នុងមួយធុងបារ៉ែល ខណៈដែលប្រេងឆៅអាមេរិកសំខាន់ៗម្តងម្កាល បានកើនឡើងដល់កម្រិតខ្ពស់បំផុតក្នុងរយៈពេលប្រាំពីរឆ្នាំចុងក្រោយ ពិសេសកាលពីខែមករា ស្របពេលដែលបច្ចុប្បន្នវាមានតម្លៃប្រហែល ៩០ដុល្លារអាមេរិកក្នុងមួយធុងបារ៉ែល។ ទន្ទឹមនឹងនេះ តម្លៃឧស្ម័នក៏បានឡើងដល់កំណត់ត្រាខ្ពស់បំផុតផងដែរនៅតំបន់អឺរ៉ុប។

តម្លៃប្រេងបានហក់ឡើងវិញគួរកត់សម្គាល់បន្ទាប់ពីវិបត្តិកូវីដ១៩បានធូរស្បើយ ធ្វើឲ្យក្រុមហ៊ុនផ្តើមមើលឃើញពីប្រាក់ចំណេញឡើងវិញក៏ពិតមែន ប៉ុន្តែអ្នករងគ្រោះពិតប្រាកដគឺ ពលរដ្ឋសាមញ្ញទូទាំងពិភពលោក ដែលពឹងផ្អែកលើការប្រេងសម្រាប់ជីវភាពប្រចាំថ្ងៃ។ ភាគីច្រើននៃពួកគេកំពុងបង្កើនការចំណាយលើថ្លៃឥន្ធននៈ ដែលបន្តកើនឡើងពីមួយខែទៅមួយខែ ស្របពេលដែល អ្នកជំនាញព្យាករប្រេងឆៅអាចមានតម្លៃដល់១០០ដុល្លារក្នុងមួយធុងបារ៉ែលនៅក្នុងឆ្នាំនេះ៕