តាមសេចក្តីរាយការណ៍របស់សារព័ត៌មានថៃ បានឲ្យដឹងថា លោក ភីថា លីមចារឿនរ៉ាត មេដឹកនាំគណបក្សឆ្ពោះទៅមុខ បានអំពាវនាវដល់សាធារណជនឱ្យជួយលោក និងគណបក្សរបស់លោកនៅក្នុងការធ្វើឲ្យព្រឹទ្ធសមាជិក តែងតាំងដោយយោធាផ្លាស់ប្តូរបេះដូងរបស់ពួកគេ ប៉ុន្តែលោកបានអះអាងផងដែរថា ប្រសិនបើបរាជ័យក្នុងការក្លាយជាមេដឹកនាំរដ្ឋាភិបាលចម្រុះ លោកនឹងបើកផ្លូវឱ្យ គណបក្ស ភឿថៃ ដែលជាគណបក្សទទួលការគាំទ្រពីប្រជាជនលំដាប់ទី២នោះ ចូលមកបន្ដដឹកនាំក្រុមចម្រុះ ទាំង៨គណបក្សវិញ ដើម្បីព្យាយាមបង្កើតរដ្ឋាភិបាលថ្មី។
លោក បាននិយាយថា “សមាជិកសភានៃគណបក្សឆ្ពោះទៅមុខទាំងអស់ត្រៀមខ្លួនជាស្រេច ដើម្បីគាំទ្របេក្ខភាពនាយករដ្ឋមន្ត្រីរបស់គណបក្សភឿថៃ”។
ពាក់ព័ន្ធនឹងការបោះឆ្នោតសម្រាប់តំណែងនាយករដ្ឋមន្រ្តីនៅក្នុងសភានៅថ្ងៃទី ១៩ ខែ កក្កដា លោកភីថា បាននិយាយថា ប្រជាពលរដ្ឋគួរតែផ្ញើសារទៅកាន់សមាជិកព្រឹទ្ធសភា តាមគ្រប់មធ្យោបាយ ដែលអាចធ្វើបាន ដើម្បីបញ្ចុះបញ្ចូលព្រឹទ្ធសមាជិកថៃឱ្យគាំទ្រលោក។
លោកបានអះអាងថា នៅពេលនេះ គណបក្សឆ្ពោះទៅមុខកំពុងតែប្រយុទ្ធនៅក្នុងសមរភូមិតស៊ូមតិ ដើម្បីបង្កើត "រដ្ឋាភិបាលរបស់ប្រជាជន" ។
អត្ថបទគួរអាន
លោកបានថ្លែងថា សមរភូមិទីមួយគឺការបោះឆ្នោតជុំបន្ទាប់នៅក្នុងសភា ដើម្បីជ្រើសរើសនាយករដ្ឋមន្ត្រីថ្មី ហើយទីពីរ គឺជាការជំរុញរបស់គណបក្សក្នុងការកែប្រែរដ្ឋធម្មនុញ្ញ និងដកសមាជិកព្រឹទ្ធសភាពីអំណាច ដើម្បីជ្រើសរើសនាយករដ្ឋមន្ត្រី។
លោកបានបញ្ជាក់នៅក្នុងសម្រង់សំដីដើមថា “ ក្នុងសមរភូមិទាំងពីរ យើងមិនអាចឈ្នះបានទេ លុះត្រាតែយើងអាចប្តូរចិត្តសមាជិកព្រឹទ្ធសភាឲ្យឈរជាមួយប្រជាជន” ។
លោកបានបន្តថា «គណបក្សឆ្ពោះទៅមុខ និងរូបលោក តែម្នាក់ឯង មិនអាចផ្លាស់ប្តូរចិត្តសមាជិកព្រឹទ្ធសភា ដើម្បីត្រួសត្រាយផ្លូវសម្រាប់រដ្ឋាភិបាលប្រជាជនបានទេ។ យើង ត្រូវការកម្លាំងពីអ្នកទាំងអស់គ្នាក្នុងបេសកកម្មនេះ។»
សូមរំឭកថា នៅក្នុងការបោះឆ្នោតកាលពីថ្ងៃទី១៣ ខែ កក្កដា លោកភីថា បានបរាជ័យក្នុងការទទួលបានការគាំទ្រភាគច្រើនពីសមាជិកសភាចំនួន ៥០០ នាក់ និងសមាជិកព្រឹទ្ធសភា ដែលតែងតាំងដោយយោធាចំនួន២៥០រូប ដោយលោកទទួលបានត្រឹមតែ៣២៤ សម្លេង ខណៈដែលបេក្ខនាយករដ្ឋមន្រ្តី គឺត្រូវការការគាំទ្រយ៉ាងហោចណាស់ ៣៧៥ សម្លេង នៃសម្លេងឆ្នោតសរុបចំនួន ៧៤៩ សំឡេងប៉ុណ្ណោះ។
នៅក្នុងការបោះឆ្នោតជុំទីមួយនេះ ក្នុងចំណោមសមាជិកសភានិងព្រឹទ្ធសភាដែលមានវត្តមាន ៧០៥ រូប សម្លេងប្រឆាំង គឺមាន ១៨២ សម្លេង និង អនុប្បវាទ ១៩៩ សម្លេង ។
នៅក្នុងពេលបច្ចុប្បន្ននេះ ក្រុមចម្រុះ៨បក្សដែលគាំទ្រលោក ភីថា គឺមានសមាជិកសភាទាំងអស់សរុប ៣១៣ រូប នៅក្នុងនោះ គណបក្សឆ្ពោះទៅមុន របស់លោក ភីថា មាន ១៥១ រូប ហើយគណបក្សភឿថៃ ដែលគេស្គាល់ថា ថៃក្រហមនោះ គឺមាន ១៤១ រូប នៅក្នុងសភា៕
ដោយៈ សរ សុជាតិ
