គេនៅចាំថា ប្រធានាធិបតីចិន លោក ស៊ី ជីនពីង នាពេលថ្មីៗនេះ បានចេញមុខថ្លែងទៅកាន់អង្គការសហប្រជាជាតិដោយបានសន្យាថា ប្រទេសចិននឹងលែងសាងសង់គម្រោងរោងចក្រថាមពលអគ្គិសនី ដើរដោយធ្យូងថ្មថ្មីៗ នៅក្រៅប្រទេសតទៅទៀតហើយ ដើម្បីចូលរួមដល់ការ ការពារបរិស្ថាន និងការប្រែប្រួលអាកាសធាតុ។
យ៉ាងហោចណាស់ មានប្រទេសចំនួន ៥នៅអាស៊ី ត្រូវបានគេមើលឃើញថា ទំនងជាអាចនឹងរងផលប៉ះពាល់ខ្លាំងជាងគេ ពីផែនការលែងសាងសង់រោងចក្រថាមពលដើរដោយធ្យូងថ្មនៅក្រៅប្រទេសរបស់ចិន ដោយសារតែប្រទេសទាំង៥នេះ នាពេលកន្លងមកនេះ បានបន្ថែមនូវលទ្ធភាពក្នុងការប្រើប្រាស់ធ្យូងថ្ម សម្រាប់ផលិតជាថាមពលអគ្គិសនី ផ្គង់ផ្គង់នៅក្នុងបណ្ដាញថាមពលជាតិរបស់ខ្លួន។ ប្រទេសទាំង៥នោះ រួមមាន វៀតណាម ឥណ្ឌូនេស៊ី ប៉ាគីស្ថាន បង់ក្លាដេស និង កម្ពុជា។ នេះបើតាមការរាយការណ៍ដោយសារព័ត៌មាន South China Morning Post។
វៀតណាម
បើទោះបីជាកន្លងមកនេះ វៀតណាមបានលុបចោលប្រហែលពាក់កណ្ដាលនៃផែនការរោងចក្រថាមពលដើរដោយធ្យូងថ្មរបស់ខ្លួនតាំងពីឆ្នាំ២០១៦មកក៏ដោយចុះ ប៉ុន្ដែ ប្រទេសនេះ ថ្មីៗនេះ ក៏បានបង្កើនការដំឡើងលទ្ធភាពធ្យូងថ្មរបស់ខ្លួនសម្រាប់គោលដៅឆ្នាំ២០៣០ នៅក្នុងសេចក្ដីព្រាងផែនការថាមពលផងដែរ ពោលគឺ វៀតណាមបានដាក់ចេញផែនការនេះ តាំងពីមុនពេលដែលលោកប្រធានាធិបតីចិន ស៊ី ជីនពីង បានថ្លែងនៅអង្គការសហប្រជាជាតិកាលពីថ្ងៃទី ២១ កញ្ញាទៅទៀត។
តាមទិន្នន័យពីមជ្ឈមណ្ឌលនវានុវត្តន៍ និងអភិវឌ្ឍន៍បៃតងរបស់វៀតណាមបានឲ្យដឹងថា នៅប្រទេសនេះ មានសំណើគម្រោងថាមពលធ្យូងថ្មចំនួន១៨គម្រោង ដែលនឹងមានសមត្ថភាពផលិតថាមពលអគ្គិសនីបានដល់ទៅ ជាង២០ជីហ្គាវ៉ាត់ម៉ោង គឺទំនងជាមិនអាចទទួលបានហិរញ្ញវត្ថុគ្រប់គ្រាន់តាមការព្រមព្រៀងនោះទេ បន្ទាប់ពីប្រទេសចិនបានប្រកាសថានឹងលែងសាងសង់រោងចក្រថាមពលដើរដោយធ្យូងថ្មថ្មីៗតទៅទៀត។ គម្រោងរោងចក្រថាមពលធ្យូងថ្មនៅវៀតណាម បានប្រឈមនឹងការអូសបន្លាយពេលវេលាផងដែរ ខណៈដែលប្រទេសនេះ មានកំណើនតម្រូវការថាមពលជាមធ្យមជាង៩% គិតចាប់ពីឆ្នាំ២០១៦ ដល់ឆ្នាំ២០២០។
អត្ថបទគួរអាន
ឥណ្ឌូនេស៊ី
ប្រទេសឥណ្ឌូនេស៊ី ជាកំពូលប្រទេសនាំចេញប្រភេទធ្យូងថ្មក្ដៅធំជាងគេ ក្នុងពិភពលោក ដែលមានការពឹងផ្អែកលើការប្រើប្រាស់ធ្យូងថ្មផលិតជាថាមពលអគ្គិសនីដល់ទៅ ៦០% នៃថាមពលដែលប្រើប្រាស់នៅក្នុងប្រទេសនេះ ខណៈការអភិវឌ្ឍថាមពលស្អាត ឬហៅថា Clean Energy វិញ គឺជួបបញ្ហាជាយូរមកហើយ ដោយសារតែផែនការយកពន្ធរបស់រដ្ឋ។ សម្រាប់ឥណ្ឌូនេស៊ី ធ្យូងថ្មក៏ជាប្រភពដ៏សំខាន់មួយនៃហិរញ្ញវត្ថុសម្រាប់យុទ្ធនាការនយោបាយ និងប្រាក់ចំណូលសាធារណៈ។ ខណៈដែលក្រុមហ៊ុនជប៉ុន និងប្រទេសលោកខាងលិចមានការវិនិយោគលើវិស័យនេះ តាំងពីដើមមកនៅឥណ្ឌូនេស៊ី វត្តមានក្រុមហ៊ុនចិនក៏មានច្រើនដែរនៅប៉ុន្មានឆ្នាំចុងក្រោយនេះ ដោយសារតែអាជ្ញាធរឥណ្ឌូនេស៊ីមានកម្មវិធីជំរុញការផ្គត់ផ្គង់ថាមពលតាំងពីឆ្នាំ២០០៦មក ហើយវិនិយោគិនចិនបានបន្ដនិយោគកាន់តែច្រើនឡើងៗ។ បើទោះបីជា ការឈប់សាងសង់រោងចក្រថាមពលធ្យូងថ្មថ្មីៗបន្ថែម ធ្វើឲ្យប៉ះពាល់ដល់ឧស្សាហកម្មធ្យូងថ្ម និងការផ្គត់ផ្គង់ថាមពលនៅឥណ្ឌូនេស៊ីក៏ដោយ ប៉ុន្ដែ បើតាមអ្នកជំនាញបានគូសបញ្ជាក់ថា វាក៏ជាឱកាស និង ក្ដីសង្ឃឹមសម្រាប់ការអភិវឌ្ឍថាមពលកកើតឡើងវិញនៅក្នុងប្រទេសនេះផងដែរ។
ប៉ាគីស្ថាន
ការប្រើប្រាស់ធ្យូងថ្មផលិតជាថាមពលអគ្គិសនីនៅប៉ាគីស្ថាន គឺចាប់ផ្ដើមកម្រើកឡើងនៅក្រោយឆ្នាំ២០១៥ នៅគ្រាដែលការវិនិយោគពីប្រទេសចិនបានលេចឡើង តាមរយៈគម្រោងច្រករបៀងសេដ្ឋកិច្ចចិន-ប៉ាគីស្ថាន។ នេះបើតាមការអះអាងរបស់អ្នកជំនាញស្រាវជ្រាវនៃប្រទេសប៉ាគីស្ថាន គឺលោក ហានី អ៊ីសាត។ អ្នកជំនាញរូបនេះ អះអាងថា ចិនមិនត្រឹមតែផ្ដល់នូវប្រភពមូលធន សម្រាប់ការពង្រីកការអភិវឌ្ឍរ៉ែធ្យូងថ្ម និង ថាមពលនៅប៉ាគីស្ថានប៉ុណ្ណោះទេ ប៉ុន្ដែ ចិនក៏បាននាំមកនូវបច្ចេកវិទ្យាក្នុងការរុករករ៉ែថែមទៀតផង។ បច្ចុប្បន្ន ក៏មានគម្រោងរោងចក្រថាមពលធ្យូងថ្មមួយចំនួន នៅប្រទេសប៉ាគីស្ថាននេះ ទំនងជាមិនអាចទទួលបានហិរញ្ញវត្ថុគ្រប់គ្រាន់សម្រាប់សាងសង់នោះទេ។ ប៉ុន្ដែ រដ្ឋាភិបាលប៉ាគីស្ថានក៏មានផែនការជំរុញការអភិវឌ្ឍវិស័យថាមពលកកើតឡើងវិញផងដែរ។
អត្ថបទគួរចាប់អារម្មណ៏
បង់ក្លាដេស
ប្រទេសនេះ គឺមានការពឹងផ្អែកខ្លាំងណាស់ ទៅលើការផ្គត់ផ្គង់ហ្គាសធម្មជាតិក្នុងស្រុកសម្រាប់ផលិតជាថាមពលអគ្គិសនី ហើយក៏មានផែនការក្នុងការប្រើប្រាស់ធ្យូងថ្មបន្ថែមផងដែរ។ ប៉ុន្ដែ ក្រុមអ្នកវិភាគអន្តរជាតិមើលឃើញថា រោងចក្រថាមពលធ្យូងថ្មនៅបង់ក្លាដេស ទំនងជាមិនដំណើរការនោះទេ ដោយសារតែរដ្ឋាភិបាល មានផែនការក្នុងការបង្កើនការប្រើប្រាស់ថាមពលកកើតឡើងវិញ។ កន្លងមក បង់ក្លាដេសទទួលបានសំណើគម្រោងថាមពលធ្យូងថ្មច្រើននៅក្នុងតម្រូវការ នៃមូលនិធិសាធារណៈ ជាងប្រទេសផ្សេងទៀត ហើយក្នុងសំណើទាំងនោះ គឺត្រូវបានស្នើឡើងដោយស្ថាប័នហិរញ្ញវត្ថុ និង សហគ្រាសចិន។ នេះបើតាមទិន្នន័យពីស្ថានប័នតាមដានថាមពលសកលលោករបស់អាមេរិក។
អ្នកជំនាញពីស្ថាប័នដដែលនេះ បានគូសបញ្ជាក់ថា ការផ្អាកលែងសាងសង់រោងចក្រថាមពលធ្យូងថ្មថ្មីៗតទៅទៀតរបស់ចិន គឺទំនងជានឹងកាត់បន្ថយលទ្ធភាពរោងចក្រធ្យូងថ្មថ្មីៗ នៅបង់ក្លាដេសដល់៩០% ដែលវាបានធ្វើឲ្យប្រទេសនេះ រងផលប៉ះពាល់យ៉ាងខ្លាំងផងដែរ។
កម្ពុជា
ប្រទេសកម្ពុជា ហាក់បីដូចជាមានការដើរបញ្ច្រាសនិន្នាការក្នុងតំបន់បន្ដិច ដែលរដ្ឋាភិបាលបានសម្រេចបង្កើនការប្រើប្រាស់ធ្យូងថ្មសម្រាប់គម្រោងផ្គត់ផ្គង់ថាមពលរបស់ខ្លួន ក្រោយពីឆ្នាំ២០១៩កន្លងទៅមានគ្រោះរាំងស្ងួតបណ្ដាលឲ្យកម្ពុជាមានជួបបញ្ហាកង្វះខាតថាមពលប្រើប្រាស់ ព្រោះថា បើគិតក្នុងឆ្នាំ២០១៨ កម្ពុជាមានប្រហែល៥០% គឺជាថាមពលដែលបានមកពីវារីអគ្គិសនី។
កាលពីឆ្នាំ២០២០
រាជរដ្ឋាភិបាលកម្ពុជាក៏បានអនុម័តគម្រោងរោងចក្រថាមពលធ្យូងថ្មធំៗចំនួន២
និងបានចុះអនុស្សរណៈយោគយល់គ្នាជាមួយនឹងប្រទេសឡាវ
ដើម្បីទិញថាមពលពីរោងចក្រថាមពលធ្យូងថ្មចំនួន២ពីប្រទេសក្បែរខាងមួយនេះផងដែរ។
នាយកប្រចាំប្រទេសនៃស្ថាប័ន EnergyLab Cambodia លោកស្រី ប្រាយជេត ម៉ាកអ៊ីនតូស (Bridget McIntosh) បាននិយាយថា ការវិនិយោគ និងអាជីវកម្មរបស់ចិន គឺមានជាប់ពាក់ព័ន្ធស្ទើរតែទាំងអស់នៅក្នុងប្រតិបត្តិការ ឬគម្រោងសាងសង់ជិតរួចរាល់នៃរោងចក្រថាមពលធ្យូងថ្មសរុបទំហំប្រមាណ ១,៥ជីហ្គាវ៉ាត់ម៉ោងរបស់កម្ពុជា។ ហើយវាទំនងជានៅមានថាមពលប្រមាណ ៣,១ជីហ្គាវ៉ាត់ម៉ោងទៀត នៃថាមពលធ្យូងថ្មរបស់កម្ពុជា អាចនឹងមានរួមបញ្ចូលការវិនិយោគ និងអភិវឌ្ឍដោយក្រុមហ៊ុនចិន។
សូមបញ្ជាក់ថា បច្ចុប្បន្នបញ្ហាថាមពលនេះ កំពុងកើតមានជាសកលទៅហើយ រួមទាំងប្រទេសចិនផងដែរ កំពុងមានការខ្វះខាតអគ្គិសនីប្រើប្រាស់។ ជាក់ស្ដែង បើទោះបីជា ទើបតែបានប្រកាសថា នឹងឈប់បង្កើតរោងចក្រថាមពលធ្យូងថ្មថ្មីៗនៅក្រៅប្រទេសនៅចំពោះមុខអង្គការសហប្រជាជាតិក៏ដោយ ប៉ុន្ដែ ប្រទេសចិន ថ្មីៗនេះ ក៏បានជំរុញឲ្យរោងចក្ររបស់ខ្លួនផលិតធ្យូងថ្មបន្ថែមឲ្យបានដល់ប្រមាណ ១០០លានតោន ដើម្បីបំពេញតម្រូវការដែលកំពុងខ្វះខាតខ្លាំងនាពេលបច្ចុប្បន្ននេះ។ ក្រៅតែពីប្រទេសតំបន់អាស៊ី នៅប្រទេសលោកខាងលិច ពិសេសនៅអឺរ៉ុបក៏ប្រឈមនឹងវិបត្តិថាមពលនេះដូចគ្នាដែរ៕
