ក្រុមហ៊ុនអាកាសចរណ៍ហ្វីលីពីនមួយ នឹងទិញយន្តហោះ១៥២គ្រឿង ក្នុងតម្លៃសរុប២៤ពាន់លានដុល្លារ

ក្រុមហ៊ុនអាកាសចរណ៍ Cebu Pacific បាននិយាយកាលពីថ្ងៃអង្គារថា ខ្លួនបានចុះហត្ថលេខាលើអនុស្សរណៈសម្រាប់ការបញ្ជាទិញយន្តហោះចំនួន១៥២គ្រឿង ពីក្រុមហ៊ុន Airbus ដែលនឹងបញ្ចប់រួចរាល់នៅក្នុងត្រីមាសទីបីឆ្នាំនេះ។ នាយកប្រតិបត្តិក្រុមហ៊ុន Cebu Pacific លោក ម៉ៃឃែល សាក់ (Michael Szucs) បាននិយាយថា យន្តហោះទាំងនេះ រួមមាន ប្រភេទ A321neo ចំនួន១០២គ្រឿង និងប្រភេទ A320neo ចំនួន៥០គ្រឿង ហើយការបញ្ជាទិញនេះនឹងផ្តល់ឱ្យក្រុមហ៊ុននូវភាពបត់បែនជាអតិបរមា ដើម្បីពង្រីកចំនួនយន្តហោះស្របតាមលក្ខខណ្ឌទីផ្សារ។

ក្នុងរយៈពេលជាច្រើនឆ្នាំកន្លងមកនេះ សមាជិកសភាហ្វីលីពីន បានស៊ើបអង្កេតលើក្រុមហ៊ុននេះជុំវិញការត្អូញត្អែររបស់អ្នកដំណើរអំពីការកក់សំបុត្រលើសលប់ និងការពន្យារពេលជើងហោះហើរផងដែរ។

លោក សាក់ បាននិយាយថា នៅពេលរួចរាល់ហើយ កិច្ចព្រមព្រៀងនៃការទិញយន្តហោះនេះនឹងក្លាយជាព្រឹត្តិការណ៍ដ៏សំខាន់មួយសម្រាប់ឧស្សាហកម្មអាកាសចរណ៍ក្នុងស្រុក និងជាសក្ខីភាពមួយចំពោះការប្តេជ្ញាចិត្តគ្មានងាករេរបស់ក្រុមហ៊ុននេះដើម្បីគាំទ្រកំណើនរបស់ហ្វីលីពីន។

ក្រុមហ៊ុន Cebu Pacific មានផ្លូវហោះហើរក្នុងស្រុកចំនួន៦៥ និងផ្លូវអន្តរជាតិចំនួន៣៣ជាមួយនឹងយន្តហោះសរុបចំនួន៨៧គ្រឿង ហើយការបញ្ជាទិញយន្តហោះរបស់ក្រុមហ៊ុនបានធ្វើឡើងស្របពេលប្រាក់ចំណូលសុទ្ធរបស់ក្រុមហ៊ុននេះបានកើនឡើងជិត១០៨% ក្នុងត្រីមាសទីមួយឆ្នាំនេះ បើធៀបនឹងរយៈពេលដូចគ្នាកាលពីឆ្នាំមុន៕

អត្ថបទ៖ សុខ មង្គល