នាយករដ្ឋមន្ត្រីថៃលោកប្រាយុទ្ធចាន់អូចា បានសម្រេចថា នឹងបើកប្រទេសទទួលភ្ញៀវទេសចបានចាក់វ៉ាក់សាំងរួចចាប់ពីថ្ងៃទី ១ ខែវិច្ឆិកាតទៅ ដោយមិនតម្រូវឲ្យធ្វើចត្តាឡីស័កអ្វីទាំងអស់។ ជុំវិញនឹងការបើកប្រទេសទទួលទេសចរបរទេសនេះដែរ សាកលវិទ្យាល័យ សួន ឌូសីត រាចឆាបាត របស់ថៃបានធ្វើការស្ទង់មតិលើប្រជាជនថៃជាង១ពាន់៣រយនាក់ នៅទូទាំងប្រទេសក្នុងការបើកប្រទេសទទួលភ្ញៀវទេសចរបរទេសឡើងវិញគឺវាឆាប់ពេក។ ក្នុងនោះដែរមានសំណួរសួរថា តើប្រទេសថៃ ពិតជារួចរាល់ក្នុងការបើកទទួលទេសចរបរទេសដោយមិនចាំបាច់ធ្វើចត្តាឡីស័កមែនដែរទេ? លទ្ធផលនៃការស្ទង់មតិបង្ហាញថា មានជាង៦០% នៃ អ្នកដែលត្រូវបានស្ទង់មតិបានឆ្លើយបដិសេធ និង មានជិត ៤០% ឆ្លើយយល់ស្រប។
ដោយឡែក សម្រាប់សំណួរដែលសួរថា តើពួកគេយល់ស្របឲ្យបើកប្រទេសឡើងវិញ ចាប់ពីថ្ងៃទី០១ ខែវិច្ឆិកាតទៅដែរឬទេ? មានជិត៦០% បានឆ្លើយបដិសេធ និងមានជាង៤០% បានឆ្លើយយល់ស្រប។
ប្រទេសថៃ មានផែនការនឹងបើកខេត្តក្រុងចំនួន៥បន្ថែមទៀត បន្ទាប់ពីកោះភូកេតដើម្បីទទួលភ្ញៀវទេសចរបរទេស ខណៈដែលក្នុងដំណាក់កាលដំបូងនេះ ថៃគ្រោងនឹងបើកទទួលភ្ញៀវទេសចរបរទេសពីប្រទេសចំនួន៥ ដោយមិនតម្រូវឲ្យធ្វើចត្តាឡីស័កនោះឡើយ។ ប្រទេសទាំង៥នោះ រួមមាន អាមេរិក ចិន អង់គ្លេស អាល្លឺម៉ង់ និងសិង្ហបុរី។
អត្ថបទគួរអាន
សូមបញ្ជាក់ថា បច្ចុប្បន្ន ថៃ គឺមានករណីឆ្លងកូវីដ១៩ ប្រចាំថ្ងៃច្រើនជាងគេបំផុតក្នុងចំណោមប្រទេសអាស៊ាន ដោយបច្ចុប្បន្ន ក្នុងមួយថ្ងៃថៃមានអ្នកកូវីដ១៩ជាង១ម៉ឺននាក់ ដែលនាំឲ្យចំនួនអ្នកឆ្លងសរុបនៅក្នុងប្រទេសថៃ បានកើនដល់ជិត១លាន៨សែននាក់ហើយ និងចំនួនអ្នកស្លាប់សរុបជិត២ម៉ឺននាក់។
ដោយឡែក ចំនួនចាក់វ៉ាក់សាំងនៅក្នុងប្រទេសថៃសរុបមានជាង៦៣លានដូសហើយ ក្នុងនោះ អ្នកបានចាក់គ្រប់ចំនួន២ដូសមាន ២៥លាននាក់ ស្មើនឹងប្រមាណ ជិត៣៦% នៃចំនួនប្រជាជនសរុប៕
None
