លោកប្រធានាធិបតី ចូ បៃឌិន ស្នើសភាដាក់ពន្ធអប្បបរមា ២៥% លើមហាសេដ្ឋីគ្រាក់ៗនៅអាមេរិក

បណ្តាញព័ត៌មាន Bloomberg News បានរាយការណ៍កាលពីថ្ងៃពុធទី៨មីនាថា ផែនការចំណាយដែលបានស្នើឡើងដោយ លោក Joe Biden ក៏នឹងកើនឡើងជិតទ្វេដងនៃពន្ធបង្កើនដើមទុនសម្រាប់ការវិនិយោគពី ២០ ទៅជិត ៤០ភាគរយ ហើយនឹងបង្កើនការយកពន្ធលើប្រាក់ចំណូលពីម្ចាស់សាជីវកម្ម និងអ្នកមានទ្រព្យសម្បត្តិនៅអាមេរិក។

តាមការរំពឹងទុកការស្នើរបស់រដ្ឋបាលលោក Joe Biden ទៅសភានេះ នឹងបង្កការរិះគន់ និងការចរចាដ៏ស្វិតស្វាញរវាងសេតវិមាន និងសភា ដែលកំពុងតែខ្វែងគំនិតគ្នានៅលើបញ្ហានេះ ស្រាប់ទៅហើយនោះ។

ផែនការនេះកើតឡើងនៅពេលដែលគណបក្សសាធារណរដ្ឋ ដែលកំពុងគ្រប់គ្រងសភា និងសេតវិមានកំពុង ជាប់គាំងការសម្រេចពាក់ព័ន្ធនឹង ពិដាននៃបំណុលសាធារណៈរបស់អាមេរិក ដែលពេលនេះបានឡើងដល់តម្លៃ ៣១ ទ្រីលានដុល្លារហើយនោះ។ ប៉ុន្ដែ សភា នៅមិនទាន់មានការអនុម័តឲ្យមានការដំឡើងពិដានបំណុលនោះឡើយ។

លោក Kevin McCarthy ប្រធានសភាជាន់ទាបដែលមកពីគណបក្សសាធារណៈរដ្ឋបានអះអាងថា ពិដាននៃបំណុលមិនគួរត្រូវបានដំឡើងដោយគ្មានការកាត់បន្ថយការចំណាយសំខាន់ៗ ហើយបានច្រានចោលការអំពាវនាវឱ្យដំឡើងពន្ធខ្ពស់។

ជុំវិញបញ្ហានេះ លោក Joe Biden បាននិយាយថា ផែនការរបស់លោកនឹងកាត់បន្ថយឱនភាពថវិការជិត ៣ ទ្រីលានដុល្លារក្នុងរយៈពេល ១០ ឆ្នាំ ដែលភាគច្រើនតាមរយៈការដំឡើងពន្ធ។

ក្នុងអំឡុងពេលថ្លៃសុន្ទរកថា របស់លោកនៅសភា កាលពីខែកុម្ភៈ លោក Joe Biden បានអំពាវនាវឱ្យសភាគាំទ្រការដំឡើងពន្ធខ្ពស់លើអ្នកមានទ្រព្យសម្បត្តិស្ដុកស្ដម្ភនៅអាមេរិក។លោកប្រធានាធិបតីបានទទូចថា ការដំឡើងពន្ធដែលស្នើឡើងនេះ នឹងប៉ះពាល់ដល់ប្រជាជនអាមេរិកមួយចំនួនតូចប៉ុណ្ណោះ៕

អត្ថបទ ៖ រស សុជាតិ