តម្លៃជ្រូករស់បច្ចុប្បន្នបានរើបឡើងបន្តិច តែកសិករនៅតែប្រឈមការខាត
ស្របពេលពិធីបុណ្យចូលឆ្នាំថ្មីប្រពៃណីចិន និងវៀតណាមខិតជិតចូលមកដល់ យើងសង្កេតឃើញតម្លៃជ្រូករស់នៅកម្ពុជា ដែលបានធ្លាក់ថ្លៃចុះដល់៦ពាន់រៀលក្នុងមួយ…
របាយការណ៍ពុំទាន់ធ្វើសវនកម្មរបស់កំពង់ផែស្វយ័តភ្នំពេញបានបង្ហាញថា នៅក្នុងរយៈពេលពេញមួយឆ្នាំ២០២៣ កំពង់ផែស្វយ័តភ្នំពេញរកចំណូលសរុបបានជាង៣៧លានដុល្លារ មានការថយចុះជិត១០% បើធៀបនឹងរយៈពេលដូចគ្នាកាលពីឆ្នាំ២០២២ ដែលមានចំនួនជាង៤១លានដុល្លារ។ ក្នុងនោះប្រាក់ចំណូលបានពីប្រតិបត្តិការកំពង់ផែស្វយ័តភ្នំពេញមានចំនួនជាង២៩លានដុល្លារ ថយចុះ៨% បើធៀបនឹងឆ្នាំ២០២២ ខណៈចំណូលពីអាជ្ញាធរផែសម្រេចបានជិត៥លានដុល្លារកើនឡើង១១%។ ទន្ទឹមនឹងប្រាក់ចំណូលសរុបមានការថយចុះ ប្រាក់ចំណេញសុទ្ធរបស់កំពង់ផែនេះ ក៏មានការថយចុះគួរឱ្យកត់សម្កាល់ផងដែរ។ ជាក់ស្តែងនៅពេញមួយឆ្នាំ២០២៣ កំពង់ផែនេះទទួលបានប្រាក់ចំណេញតែជាង៩លានដុល្លារប៉ុណ្ណោះថយចុះជាង៣៦% បើធៀបនឹងឆ្នាំ២០២២ ដែលមានជាង១៤លានដុល្លារ។
ជុំវិញការបញ្ហានេះឧកញ៉ា ស៊ិន ចន្ធី ប្រធានសមាគមភស្តុភាកម្មកម្ពុជាយល់ឃើញថា ការធ្លាក់ចុះប្រាក់ចំណូលរបស់កំពង់ផែស្វយ័តក្រុងភ្នំពេញនេះ គឺវាស្របគ្នានឹងការធ្លាក់ចុះនៃការធ្វើពាណិជ្ជកម្មរវាងកម្ពុជានិងអន្តរជាតិដែរ។ បើតាមអ្នកជំនាញរូបនេះ ការថយចុះការបញ្ជាទិញពីទីផ្សារអឺរ៉ុប ដែលបណ្តាលមកពីបញ្ហាវិបត្តិសេដ្ឋកិច្ចសកល បញ្ហាអតិផរណា និងបញ្ហាសង្រ្គាមនានានៅបន្តអូសបន្លាយជាដើម បានធ្វើឱ្យសកម្មភាពនៃវិស័យដឹកជញ្ជូននៅឆ្នាំ២០២៣ ហាក់មានការថយចុះបន្តិចបើធៀបនឹងឆ្នាំ២០២២។ ការលែងកកស្ទះទំនិញនៅកំពង់ផែស្វយ័តក្រុងព្រះសីហនុ ក៏ជាមូលហេតុធ្វើឱ្យប្រាក់ចំណូល និងប្រាក់ចំណេញរបស់កំពង់ផែស្វយ័តភ្នំពេញមានការធ្លាក់ចុះផងដែរ។
គួរជម្រាបថា នៅពេញមួយឆ្នាំ២០២៣ កំពង់ផែស្វយ័តភ្នំពេញទទួលបានបរិមាណកុងតឺន័រឆ្លងកាត់ប្រមាណជិត៤០ម៉ឺនTEUs ធ្លាក់ចុះចំនួនជាង៥% ខណៈបរិមាណនាវាឆ្លងកាត់សរុបវិញ ទទួលបានជាង៣ពាន់៨រយជើង កើនឡើងប្រមាណ២%។ ប៉ុន្ដែអ្វីដែលគួរឱ្យកត់សម្គាល់នោះ គឺបរិមាណនាវាទេសចរណ៍ឆ្លងកាត់កំពង់ផែនេះមានកំណើនរហូតដល់ទៅជាង១៧៥%ឯណោះ ដោយមាននាវាធ្វើដំណើរដល់៥៦៧ជើង។ ដោយឡែកចំពោះបរិមាណទំនិញ-ប្រេងឥន្ធនៈឆ្លងកាត់កំពង់ផែនេះនៅក្នុងឆ្នាំ២០២៣វិញ បានកើនឡើង២,៥% ដោយមានចំនួនជាង៤លានតោន៕
None
