នៅក្នុងកិច្ចសម្ភាសពិសេសជាមួយខេមបូណូមីស លោក សុខ វឿន អនុប្រធានក្រុមប្រឹក្សាភិបាលសមាគមមីក្រូហិរញ្ញវត្ថុកម្ពុជា និងជាប្រធានអគ្គនាយកគ្រឹះស្ថានមីក្រូហិរញ្ញវត្ថុ LOLC បានឱ្យដឹងថា ការការពារអតិថិជនបានចាប់ផ្ដើមតាំងពីការរៀបចំផលិតផល និងសេវារបស់ធនាគារ ដើម្បីធ្វើយ៉ាងណាឱ្យសមស្របជាមួយការប្រើប្រាស់របស់ពួកគេ។ ក្រៅពីនេះ ការផ្ដល់ចំណេះដឹងផ្នែកសេវាក្នុងវិស័យធនាគារ និងមីក្រូហិរញ្ញវត្ថុ ក៏ជារឿងសំខាន់ដែរ ដែលអ្នកបម្រើសេវាតែងធ្វើឡើងប្រកបដោយវិជ្ជាជីវៈ និងឆ្លើយតបទាន់ពេលវេលានៅគ្រប់ដំណាក់កាលនិងមានតម្លាភាព។
បើតាមអ្នកជំនាញក្នុងវិស័យហិរញ្ញវត្ថុរូបនេះ យន្តការការពារក្នុងវិស័យធានាគារ និងមីក្រូហិរញ្ញវត្ថុ នឹងផ្ដល់ផលប្រយោជន៍ច្រើនដល់អតិថិជន ព្រោះពួកគេអាចថ្លឹងថ្លែងពីការប្រើប្រាស់សេវាតាមគោលដៅប្រកបដោយប្រសិទ្ធភាពខ្ពស់។ បើតាមលោក សុខ វឿន ក្រៅពីការការពារដល់អតិថិជន យន្តការនេះ ក៏បានក្លាយជាផ្នែកដ៏សំខាន់ក្នុងការការពារដល់វិស័យធានាគារ និងមីក្រូហិរញ្ញវត្ថុ តាមរយៈការធ្វើឱ្យស្ថាប័នមានភាពរឹងមាំ និងការពារបាននូវហានីភ័យមួយចំនួនធំផងដែរ។
បើតាមការបញ្ជាក់របស់លោក សុខ វឿន កិច្ចការពារអតិថិជនក្នុងវិស័យធានាគារ និងមីក្រូហិរញ្ញវត្ថុ ត្រូវបានធ្វើឡើងជាបន្តបន្ទាប់ក្រោយពេលទទួលបានឥណទាន។ កិច្ចការពារនេះ ត្រូវបានចេញជារូបរាងកាលពីឆ្នាំ២០១៤ ក្នុងពេលដែលស្ថាប័នឯករាជ្យមួយនៅសហរដ្ឋអាម៉េរិក មានសិទ្ធទទួលខុសត្រូវលើការផ្ដល់សញ្ញាបត្រឱ្យទៅគ្រឹះស្ថាន ឬធនាគារណាដែលបានបំពេញលក្ខខណ្ឌគ្រប់គ្រាន់ ខណៈក្រោយមកស្ថាប័នហិរញ្ញវត្ថុនៅកម្ពុជា ក៏ចាប់ផ្ដើមទទួលបានសញ្ញាបត្រដែលមានការទទួលស្គាល់នេះជាបន្តបន្ទាប់៕
អត្ថបទ៖ បូ ដូឡា
