នៅមិនយូរប៉ុន្មាន បន្ទាប់ពីវាយយកបានក្រុងយុទ្ធសាស្ត្រចុងក្រោយនៃខេត្តលូកហាន់ តំបន់បាសរបស់អ៊ុយក្រែន លោកពូទីនប្រធានាធិបតីរុស្ស៊ីបានដាក់បញ្ជាឱ្យកងទ័ពបន្តធ្វើសង្គ្រាមកុំដកដៃ ដើម្បីសម្រេចតាមគោលដៅដែលបានកំណត់ទុក គឺគ្រប់គ្រងខេត្តដូណេកស៍មួយទៀត នឹងឈានទៅគ្រប់គ្រងដុនបាសទាំងមូល។ជាក់ស្តែងសេចក្តីរាយការណ៍ ពីកងទ័ពអ៊ុយក្រែននៅដូណេកស៍ឱ្យដឹងនៅថ្ងៃទី ៦កក្កដាថា កងទ័ពរុស្ស៊ីកំពុងផ្លោងកាំភ្លើងធំយ៉ាងខ្លាំងចូលតំបន់ដូណេកស៍។
ដូចបានដឹងតាំងតែពីដើមសប្តាហ៍នេះហើយថា ក្រុងលីសីឆាន់ដែលជាក្រុងសំខាន់ចុងក្រោយ របស់ខេត្តលូកហាន់បានធ្លាក់ក្រោមការគ្រប់គ្រងរបស់រុស្ស៊ី។ ពីអំណេះតទៅបុរសខ្លាំងលោកពូទីន បានដាក់បញ្ជាឱ្យកងទ័ពបន្តធ្វើសង្គ្រាមកុំដកដៃឱ្យសោះ ដើម្បីឈានទៅសម្រេចឱ្យបាននូវគោលដៅរបស់ខ្លួន គឺគ្រប់គ្រងតំបន់ដុនបាសទាំងមូល។ តំបន់ដែលរុស្ស៊ីហៅថា ដុនបាស រួមបញ្ជូលខេត្តចំនួនពីររបស់អ៊ុយក្រែនរួមមាន ខេត្តលូកហាន់ និងដូណេក។ រុស្ស៊ីនិយាយថា គោលដៅចង់ដណ្ដើមការគ្រប់គ្រងតំបន់ Donbas ទាំងមូលពីអ៊ុយក្រែន គឺសម្រាប់ ក្រុមផ្តាច់ខ្លួនដែលគាំទ្រដោយទីក្រុងមូស្គូ ហើយដែលរុស្ស៊ីទទួលស្គាល់ថាជាសាធារណរដ្ឋប្រជាមានិតឯករាជ្យ។
គួរជម្រាបថា នៅភាគខាងកើត អ៊ុយក្រែនបានបាត់បង់ទីក្រុងម្តងមួយៗទៅក្នុងដៃកងទ័ពរុស្ស៊ី ប៉ុន្តែបើយើងក្រលេកមើលទៅភាគខាងត្បូងវិញ កងទ័ពអ៊ុយក្រែនកំពុងផ្តោតអាទិភាពវាយដណ្តើមយកទីក្រុង ឃឺសិន(Kherson) ពីរុស្ស៊ីមកវិញ។ សម្រាប់អ៊ុយក្រែន តំបន់ភាគខាងត្បូងជាតំបន់យុទ្ធសាស្រ្តសំខាន់ណាស់ ដែលទីក្រុងកៀវត្រូវការចាំបាច់ ដើម្បីអាចចូលទៅប្រើសមុទ្រខ្មៅបានឡើងវិញ។
គួរបញ្ជាក់ថា សមុទ្រជាផ្លូវដឹកជញ្ជូនសំខាន់ខ្លាំងណាស់របស់អ៊ុយក្រែន ពិសេសសម្រាប់ការនាំចេញស្បៀងអាហារចំបងៗដែលបានដាំដុះ នៅអ៊ុយក្រែនដូចជាស្រូវសាលី ពោត និងគ្រាប់ធញ្ជជាតិផ្សេងៗ។ ការដណ្តើមបានក្រុង Kherson ពីរុស្ស៊ីមកវិញប្រៀបបាននឹងការជួយស្តារស្ថានការណ៍ស្បៀងអាហារសកលមួយផ្នែកដែរ។
អត្ថបទគួរអាន
ដ្បិតតែរុស្ស៊ីបន្តធ្វើសង្គ្រាមមែន តែរដ្ឋមន្ត្រីការបរទេសរុស្ស៊ីអំពាវនាវឱ្យរក្សាច្បាប់អន្តរជាតិ
រដ្ឋមន្ត្រីការបរទេសរុស្ស៊ីលោក Sergei Lavrov កាលពីថ្ងៃពុធបានអំពាវនាវដល់ភាគីទាំងអស់ក្នុងពិភពលោកឱ្យខិតខំប្រឹងប្រែងដើម្បីការពារច្បាប់អន្តរជាតិ ខណៈដែលលោកបានហៅពិភពលោកបច្ចុប្បន្ននេះថា កំពុងវិវឌ្ឍចូលទៅក្នុងស្ថានភាពមួយដ៏ស្មុគស្មាញ។ លោក Lavrov និយាយបែបនេះ នៅក្នុងកិច្ចប្រជុំជាមួយសមភាគីវៀតណាមលោក ប៊ុយ ថាន់ សុន (Bui Thanh Son) នៅទីក្រុងហាណូយ។
ការអត្ថាធិប្បាយរបស់លោក បានធ្វើឡើងខណៈដែលប្រទេសរុស្ស៊ីត្រូវបានប្រទេសលោកខាងលិចចោទប្រកាន់ថាបានបំពានច្បាប់អន្តរជាតិតាមរយៈការឈ្លានពានរបស់ខ្លួនលើអ៊ុយក្រែន។ ក្នុងនោះមេដឹកនាំសហភាពអឺរ៉ុបបានជំរុញទីក្រុងមូស្គូឱ្យគោរពតាមដីការបស់តុលាការយុត្តិធម៌អន្តរជាតិ ដែលប្រាប់រុស្ស៊ីឱ្យដកទ័ពចេញពីអ៊ុយក្រែន។
សូមជម្រាបថា បច្ចុប្បន្នរដ្ឋមន្ត្រីការបរទេសរុស្ស៊ីរូបនេះកំពុងទស្សនកិច្ចនៅក្នុងប្រទេសវៀតណាម មុននឹងចេញដំណើរទៅកោះបាលី ប្រទេសឥណ្ឌូនេស៊ីដើម្បីចូលរួមកិច្ចប្រជុំG20 ក្នុងកំរិតរដ្ឋមន្ត្រីការបរទេស ដែលនឹងធ្វើឡើងក្នុងសប្តាហ៍នេះ៕
