គណបក្សភឿថៃ ដែលកំពុងកាន់អំណាច បានសម្រេចចិត្តនៅក្នុងសន្និបាតរបស់គណបក្សកាលពីថ្ងៃសុក្រ ដោយជ្រើសរើសលោកស្រី ផៃថងថាន ស៊ីណាវ៉ាត្រា ដែលជាកូនស្រីរបស់អតីតនាយករដ្ឋមន្ត្រី ថាក់ស៊ីន ស៊ីណាវ៉ាត្រា ធ្វើជាមេដឹកនាំថ្មីរបស់គណបក្ស ដោយសង្ឃឹមថា វានឹងពង្រីកការគាំទ្រក្នុងចំណោមយុវជនជំនាន់ក្រោយបន្ថែមទៀត។ បន្ទាប់ពីទទួលការតែងតាំង លោកស្រី ផៃថងថាន បានប្តេជ្ញាចិត្តនៅក្នុងសុន្ទរកថានឹងធ្វើឱ្យគណបក្សនេះក្លាយជាគណបក្សលេខ១ម្តងទៀត នៅក្នុងប្រទេសថៃ។
លោកស្រី ផៃថងថាន ដែលស្ថិតក្នុងវ័យ៣៧ឆ្នាំ គឺជាបេក្ខជននាយករដ្ឋមន្ត្រី១រូប ក្នុងចំណោមបេក្ខជននាយករដ្ឋមន្ត្រីបីរូបរបស់គណបក្សភឿថៃ នៅក្នុងការបោះឆ្នោតសកល កាលពីខែឧសភា ដោយដើរតួរយ៉ាងសំខាន់ក្នុងការឃោសនា ទោះបីជាអំឡុងពេលនោះលោកស្រី កំពុងតែស្ថិតនៅក្នុងដំណាក់កាលមាតុភាព បន្ទាប់ពីសម្រាលកូនក៏ដោយចុះ។
នៅក្នុងការបោះឆ្នោត គណបក្សភឿថៃ ទទួលបានត្រឹមលេខ២ប៉ុណ្ណោះ បន្ទាប់ពីគណបក្សឆ្ពោះទៅមុខ ប៉ុន្តែអាចដណ្តើមតួនាទីជាគណបក្សកាន់អំណាចបានដោយសារតែប្រព័ន្ធច្បាប់ ដែលតាក់តែងឡើងដោយក្រុមមន្រ្តីយោធាដ៏មានឥទ្ធិពលរបស់រាជាណាចក្រមួយនេះ។
លោកស្រី ផៃថងថាន បានចូលកាន់តំណែងនេះបន្តពីលោក ជុណាន ស្រ៊ីកែវ ( Cholnan Srikaew ) អាយុ៦២ឆ្នាំ ដែលទទួលបន្ទុកការចរចារ ដើម្បីបង្កើតរដ្ឋាភិបាលចម្រុះក្រោយសម្ព័ន្ធភាពជាមួយនឹងគណបក្សឈ្នះឆ្នោតមិនអាចបង្កើតរដ្ឋាភិបាលបាន ក៏លាលែងដោយសារតែការសន្យាថា មិនបង្កើតរដ្ឋាភិបាលជាមួយនឹងគណបក្សយោធានិយម។
អត្ថបទគួរអាន
សាធារណមតិខ្លះបានលើកឡើងថា ការលាលែងនេះជាខ្សែបន្ទាត់នយោបាយ ដែលគណបក្សភឿថៃត្រូវការ ពោលគឺមានឱកាសកាន់អំណាចហើយ ក៏ត្រូវការការឈ្នះនៅក្នុងការបោះឆ្នោតលើកក្រោយបន្តទៀត ដូច្នេះហើយទើបបានជាមានការសម្រេចចិត្តឱ្យលោក ជុណាន ចុះចេញពីតំណែង ដើម្បីបំពេញតាមការសន្យា និងទុកឱ្យលោកស្រី ផៃថងថាន ដែលពីមុនធ្លាប់ជាបេក្ខជននាយករដ្ឋមន្រ្តីនៅក្រៅរង្វង់មជ្ឈដ្ឋានដឹកនាំប្រទេស មកដឹកនាំមជ្ឈដ្ឋាននយោបាយ ដើម្បីអាចទប់ទល់នឹងដៃគូប្រកួតប្រជែងចាស់ គឺលោក ភីថា លីមចារឿនរ៉ាត ដែលនៅពេលនេះក៏បានដកខ្លួនពីមេដឹកនាំបក្ស ប៉ុន្តែនៅតែសកម្មនៅក្នុងជីវិត និងអាជីពព្រមទាំងជីវភាពនយោបាយដដែល។
គណបក្សភឿថៃ មើលឃើញថា យុវជនដែលមានអាយុចាប់ពី២០ទៅ៣០ឆ្នាំ គឺជាកម្លាំងចលករនយោបាយដ៏មាននិន្តរភាព ប្រសិនបើភឿថៃ ចង់នៅបន្តជាគណបក្សកាន់អំណាចអណត្តិក្រោយ ពីព្រោះការបោះឆ្នោតកាលពីខែឧសភា គណបក្សឆ្ពោះទៅមុខ គឺបានដណ្តើមជ័យជំនៈដោយសារតែទទួលបានការគាំទ្រពីយុវជន។
ដោយឡែកសាធាណៈមតិខ្លះទៀតក៏បានលើកឡើងថា ការតែងតាំងលោកស្រី ផៃថងថាន អាចជាជំហានដ៏មានសក្ដានុពលមួយឆ្ពោះទៅរកការវិលមកវិញខាងនយោបាយសម្រាប់លោក ថាក់ស៊ីន ស៊ីណាវ៉ាត្រា ដែលបច្ចុប្បន្នកំពុងជាប់ពន្ធនាគារពីបទពុករលួយ និងបទចោទប្រកាន់ផ្សេងទៀត។ លោក ថាក់ស៊ីន ដែលត្រូវបានគេចាត់ទុកជាម្ចាស់បក្ស បានវិលត្រឡប់មកថៃវិញកាលពីខែសីហា ក្រោយនិរទេសខ្លួនទៅរស់នៅក្រៅប្រទេសអស់១៥ឆ្នាំ៕
ដោយៈ សរ សុជាតិ
None
