លោក ពិន សុភន កសិករម្នាក់រស់នៅភូមិទួលស្វាយ ឃុំអង្គប្រាសាទ ស្រុកគីរីវង់ ខេត្តតាកែវ បានបញ្ចាក់ប្រាប់ខេមបូណូមីសថា តម្លៃស្រូវបានចាប់ផ្តើមឡើងថ្លៃបន្តិចឡើងវិញហើយ នៅប៉ុន្មានថ្ងៃចុងក្រោយនេះ ដោយស្រូវបាយទន់ ឬ ហៅថា OM លក់ចេញ ៧៧០រៀលក្នុង១គីឡូក្រាម ខណៈស្រូវបាយរឹង ឬហៅថា អ៊ីអ៊ែ ៨៥ លក់ចេញ ៧១០រៀលក្នុង១គីឡូក្រាម។ ក៏ប៉ុន្តែតម្លៃនេះ នៅទាបនៅឡើយទេ បើធៀបនឹងតម្លៃស្រូវពីមុន ដែល ស្រូវ OM អាចលក់ចេញក្នុងរង្វង់ ១ពាន់រៀលក្នុង១គីឡូក្រាម និង អ៊ីអ៊ែ៨៥លក់ចេញក្នុងរង្វង់ ៩០០រៀលក្នុង១គីឡូក្រាម។
ពាក់ព័ន្ធទៅនឹងបញ្ហានេះដែរ លោក ញាន ឈួន ឈ្មួញកណ្តាលទិញស្រូវពីកសិករយកទៅលក់នៅប្រទេសវៀតណាមបានអះអាងដូចគ្នាថា តម្លៃស្រូវនៅក្បែរព្រំដែនវៀតណាមបានហក់ឡើងថ្លៃជាបន្តបន្ទាប់នៅប៉ុន្មានថ្ងៃចុងក្រោយនេះ។ ក្នុងនោះ ប្រភេទស្រូវបាយទន់ ឬ OM លោកទិញពីកសិករក្នុងតម្លៃ៧៧០រៀលក្នុង១គីឡូក្រាម ខណៈស្រូវបាយរឹង ឬ អ៊ីអ៊ែ៨៥ ទិញក្នុងតម្លៃ ៧១៥រៀលក្នុង១គីឡូក្រាម។
ការរើបឡើងវិញនូវតម្លៃស្រូវក្នុងស្រុកគិរីវង់ខេត្តតាកែវមួយនេះ ត្រូវបានឈ្មួញកណ្តាលរូបនេះ កត់សម្គាល់ឃើញថា គឺបន្ទាប់ពីមានការជួយសម្របសម្រួលពីអាជ្ញាធរប្រចាំការនៅច្រកព្រំដែនអន្តរជាតិកម្ពុជា-វៀតណាម ភ្នំដិន ដែលធ្វើឲ្យការដឹកជញ្ជូនស្រូវពីកម្ពុជាទៅប្រទេសវៀតណាមមានភាពងាយស្រួល និង ចំណាយពេលតិចជាងមុន។ កត្តានេះ ក៏បានជួយសម្រួលមិនឲ្យមានការកកស្ទះឡានដឹកស្រូវ និង ដឹកទំនិញលើផ្លូវជាតិលេខ២ នៅព្រំដែនរវាងប្រទេសទាំងពីរ ដូចប៉ុន្មានថ្ងៃមុនផងដែរ។
អត្ថបទទាក់ទង
បើតាមលោក ញាន ឈួន ក្រោយមានការកកស្ទះឡានដឹកស្រូវពីកម្ពុជាទៅវៀតណាមខ្លាំង តម្លៃស្រូវ OM បានធ្លាក់ចុះរហូតដល់៧៤០រៀលក្នុង១គីឡូក្រាម ខណៈស្រូវអ៊ីអ៊ែរ ៨៥ ធ្លាក់មកត្រឹម៦៨០រៀលក្នុងគីឡូក្រាម។
ជុំវិញបញ្ហាស្រូវធ្លាក់ថ្លៃនេះដែរ លោក លន់ យ៉េង អគ្គលេខាធិការនៃសហព័ន្ធស្រូវអង្ករកម្ពុជាបានបញ្ជាក់ប្រាប់ ខេមបូណូមីស ថា ក្រុមហ៊ុន និងរោងម៉ាស៊ីនកិនស្រូវ ដែលជាសមាជិករបស់សហព័ន្ធ បានជួយទិញស្រូវពីកសិករជាហូរហែ ដើម្បីជួយសម្រួលដល់ការកកស្ទះ និងធានាតម្លៃស្រូវកុំឲ្យមានការធ្លាក់ចុះខ្លាំង។ ប៉ុន្តែលោកមិនអាចក្តោបតួលេខជាក់លាក់ពីចំនួន ដែលក្រុមហ៊ុន និងរោងម៉ាស៊ីនបានទិញនោះទេ។ ពាក់ព័ន្ធរឿងតម្លៃស្រូវ អគ្គលេខាធិការសហព័ន្ធស្រូវអង្ករកម្ពុជារូបនេះអះអាងថា តម្លៃស្រូវនៅតាមរោងម៉ាស៊ីននៅមួយរយៈចុងក្រោយនេះ ពុំមានការប្រែប្រួលអ្វីគួរឲ្យកត់សម្គាល់នោះទេ។
គួររំលឹកថា រាជរដ្ឋាភិបាលកម្ពុជាសម្រេចផ្អាកធ្វើដំណើរចេញចូលរវាងកម្ពុជា-វៀតណាមបណ្តោះអាសន្នរយៈពេល១ខែ ដើម្បីទប់ស្កាត់ និងបង្ការការឆ្លងរីករាលដាលនៃជំងឺកូវីដ-១៩ ប្រភេទថ្មីដែលតា ដែលកំពុងអុកឡុកលើសកលលោក។ វិធានការរឹតបន្តឹងនៅតាមព្រំដែននេះ បានបង្កឲ្យមានការកកស្ទះឡានដឹកទំនិញ និងឡានដឹកស្រូវយ៉ាងខ្លាំង ដែលធ្វើឲ្យតម្លៃស្រូវនៅខេត្តជាប់ព្រំដែនវៀតណាម មានការធ្លាក់ចុះជាបន្ដបន្ទាប់៕
None
