ការចល័តទ័ពទៅភាគខាងកើតអ៊ុយក្រែន ពីសំណាក់កងទ័ពរុស្ស៊ីដូចនេះធ្វើឡើង នៅបន្ទាប់ពីភាគីរុស្ស៊ីបានសន្យាថា ខ្លួននឹងបន្ថយដៃវាយប្រហារលើរដ្ឋធានីកៀវ និង តំបន់មួយចំនួន ប៉ុន្តែចុងក្រោយបែរជា មកវាយប្រហារនៅតំបន់ភាគខាងកើតវិញម្តង។ ការសន្យានេះទៀតសោត បានធ្វើឡើងក្នុងជំនួបចរចាជុំទី០៤ កាលពីថ្ងៃអង្គារក្នុងសប្តាហ៍នេះ។
ការឈ្លានពានរបស់រុស្ស៊ីទៅលើប្រទេសជិតខាងរបស់ខ្លួន គឺអ៊ុយក្រែន ពេលនេះបានចូលដល់សប្តាហ៍ទី៥ហើយ។ សង្គ្រាមនេះរុញច្រានមនុស្ស៤លាននាក់ បានចាកចេញពីផ្ទះសម្បែង របស់ពួកគេ ខណៈមនុស្សរាប់ពាន់នាក់ទៀតបានស្លាប់។ ជាមួយគ្នានេះ វាក៏បានធ្វើឱ្យតម្លៃប្រេងពិភពលោកកើនឡើង និងបានរាលដាលនាំភ្លើងឲ្យក្តៅដល់ទំនាក់ទំនងរវាងរុស្ស៊ីជាមួយនឹងលោកខាងលិចថែមទៀត ហើយត្រូវបានគេមើលឃើញថា ជាស្ថានការណ៍អាក្រក់បំផុតរាប់ចាប់តាំងពីសម័យសង្គ្រាមត្រជាក់មក។
ដើម្បីជួយសម្រួលស្ថានភាពប្រេងពិភពលោក សហរដ្ឋអាមេរិកកំពុងពិចារណាលើការបញ្ចេញស្តុកប្រេងបម្រុងរបស់ខ្លួនចំនួន ១៨០លានបារ៉ែល ដើម្បីទប់ទល់នឹងការឡើងថ្លៃ ដែលកំពុងជំរុញអត្រាអតិផរណានៅជុំវិញពិភពលោក។ ទីភ្នាក់ងារថាមពលអន្តរជាតិ អាយ អេ អ៊ី (IAE) នឹងបើកកិច្ចប្រជុំបន្ទាន់មួយនៅថ្ងៃសុក្រសប្តាហ៍នេះ ក្នុងគោលដៅស្វែងរកដំណោះស្រាយ និងដាក់ចេញវិធានការបន្ថែម។
សហគមន៍អន្តរជាតិខំប្រឹងប្រែងតាមវិធីរបស់គេ ខណៈអ្នកនៅក្នុងប្រទេសអ៊ុយក្រែន ដែលកំពុងត្រូវបានគេឈ្លានពាននោះ ក៏ខិតខំទប់ទល់តាមលទ្ធភាពរបស់ខ្លួន និងមានការជួយជ្រោមជ្រែងពីអ្នកខាងក្រៅផងដែរ។ ការតស៊ូដ៏ស្វិតស្វាញរបស់កងកម្លាំងអ៊ុយក្រែនបានរារាំងរុស្ស៊ីពីការដណ្តើមយកទីក្រុងសំខាន់ៗរបស់ខ្លួន រួមទាំងរដ្ឋធានីកៀវ ជាកន្លែងដែលទាហានរុស្ស៊ីត្រូវបានរារាំងអស់រយៈពេលជាច្រើនសប្តាហ៍ រហូតដល់ខ្លួនដកថយបន្តិចម្តងៗ។
នៅក្នុងសារវីដេអូ ដូចដែលលោក ហ្សេលេនស្គី តែងធ្វើរាល់ដង លោកបានហៅការបន្ធូរដៃពីទាហានរុស្ស៊ីនៅក្រុងកៀវ និង ឆេននីហីវ ថាមិនមែនជាចេតនាល្អរបស់ពួកគេនោះទេ។ តាមពិតទៅវា ដោយសារតែទ័ពរុស្ស៊ីនៅតំបន់ទាំងនោះបានចាញ់ប្រៀប និងមិនអាចទប់ទល់នឹងកងទ័ពការពាររបស់អ៊ុយក្រែនបាន។
អត្ថបទគួរអាន
ប្រធានាធិបតីអ៊ុយក្រែនរូបនេះបានបន្ថែមថា អ៊ុយក្រែន បានឃើញពីការបង្កើនកម្លាំងទ័ពរុស្ស៊ីសម្រាប់ការវាយប្រហារ ចេញមុខព្រួញពីតំបន់ Donbas សំដៅមកភាគខាងកើតប្រទេស ហើយលោកអះអាងថា ទ័ពអ៊ុយក្រែនកំពុងត្រៀមលក្ខណៈសម្រាប់ការវាយប្រហារហើយដែរ។
យ៉ាងណាក៏ដោយ នៅទីក្រុងកំពង់ផែម៉ារីយ៉ូប៉ូល ដែលរងការខូចខាតយ៉ាងដំណំឯណោះវិញ ក៏នៅតែបន្តស្ថិតក្រោមការប្រយុទ្ធដ៏ក្តៅគគុកដដែល។ បើតាមសេចក្តីរាយការណ៍ចុងក្រោយ ទីក្រុងនេះ ត្រូវបានទ័ពរុស្ស៊ីគ្រប់គ្រងបានពាក់កណ្តាលហើយ ខណៈមនុស្សជាង១៧ម៉ឺននាក់កំពុងជាប់គាំងនៅក្នុងទីក្រុងមួយនេះនៅឡើយហើយកំពុងខ្វះខាតស្បៀងអាហារយ៉ាងខ្លាំង។
គួរជម្រាបថា ក្រុងកៀវបានចោទប្រកាន់ទីក្រុងម៉ូស្គូថា មិនបានគោរពទាំងស្រុងតាមការសន្យានោះទេ ពោលគឺមិនបានធ្វើតាមអ្វីដែលខ្លួនបានសន្យាក្នុងការចរចាទល់មុខគ្នាជុំទី៤ ដែលទើបបិទបញ្ចប់កាលពីថ្ងៃអង្គារសប្តាហ៍នេះឡើយ។
យ៉ាងណាក៏ដោយ នៅថ្ងៃសុក្រសប្តាហ៍នេះ គេនឹងមានកិច្ចចរចាតាមអនឡាញម្តងទៀត រវាងភាគីជម្លោះទាំងពីរ។ ប៉ុន្តែភាគីរៀងៗខ្លួន សុទ្ធតែមិនមានក្តីសង្ឃឹមឡើយ សម្រាប់ការចរចាលើកក្រោយៗនេះ។ អ៊ុយក្រែនបានស្វែងរកបទឈប់បាញ់ដោយមិនមានការដោះដូរទឹកដី ឬអធិបតេយ្យភាពរបស់ខ្លួន ទោះបីជាទីក្រុងកៀវបានស្នើឱ្យទទួលយកអព្យាក្រឹតភាព ជាថ្នូរនឹងការធានាសន្តិសុខជាតិក៏ដោយ៕
None
