រីឯភាគីរុស្ស៊ីឯណោះវិញ បានសន្យាថា ខ្លួននឹងកាត់បន្ថយប្រតិបត្តិការយោធានៅជុំវិញទីក្រុងកៀវ និងទីក្រុងមួយចំនួនទៀតក្នុងប្រទេសអ៊ុយក្រែន។ តើរុស្ស៊ីពិតជានឹងបន្ធូរដៃក្នុងសង្គ្រាមនេះ ដូចការសន្យាដែរទេ0x017d7 ចុះអ៊ុយក្រែនវិញ ពិតជាយល់ព្រមមិនចូលរួមជាមួយសម្ព័ន្ធយោធាណាមួយមែនទេ ឬគ្រាន់តែនិយាយ ហើយចុងក្រោយរត់ទៅចូលរួមជាមួយណាតូដដែល?
អ៊ុយក្រែនយកអព្យាក្រឹតភាពមកផ្តូរនឹងការធានាសន្តិសុខជាតិ
អ៊ុយក្រែនបានស្នើពីអព្យាក្រឹតភាពរបស់ប្រទេស ជាថ្នូរនឹងការធានាសន្តិសុខ មានន័យថា ខ្លួននឹងមិនចូលរួមសម្ព័ន្ធភាពយោធា មិនទទួលយកមូលដ្ឋានយោធាបរទេសមកនៅក្នុងទឹកដីខ្លួន និងមិនឲ្យមានការដាក់ពង្រាយកងទ័ពបរទេសនៅលើទឹកដីអ៊ុយក្រែនទេ។ រីឯសមយុទ្ធយោធានៅលើទឹកដីក្នុងអ៊ុយក្រែន អាចប្រព្រឹត្តទៅដោយមានការយល់ព្រមពីប្រទេសអ្នកធានា។
យ៉ាងណាក៏ដោយ អ៊ុយក្រែន ក៏បានដាក់លក្ខខណ្ឌខ្លះដែរ ពោលទីក្រុងកៀវបានទាមទារឲ្យមានការធានាសន្តិសុខសម្រាប់អ៊ុយក្រែន ខណៈដែល អព្យាក្រឹតភាពរបស់អ៊ុយក្រែនអាចចូលជាធរមានបានលុះត្រាតែ មានបទឈប់បាញ់ពេញលេញជាមុនសិន។ ប្រទេសប៉ូឡូញ អ៊ីស្រាអែល តួកគី និង កាណាដា អាចស្ថិតក្នុងចំណោមប្រទេសអ្នកធានាសន្តិសុខសម្រាប់អ៊ុយក្រែន។
យ៉ាងណាមិញ វាពិបាកបន្តិចសម្រាប់ឲ្យប្រទេសដទៃហ៊ានចេញមុខមកធានា សន្តិសុខសម្រាប់អ៊ុយក្រែន ពោលគឺការទាមទារនេះ វាល្អហើយសម្រាប់ប្រទេសសាមីខ្លួន តែវាទំនងជាការទាមទារខ្ពស់ពេក សម្រាប់ប្រទេសអ្នកធានា។ បើតាមមន្ត្រីប្រតិភូរបស់អ៊ុយក្រែនបានបញ្ជាក់ថា អ៊ុយក្រែនចង់ឲ្យមានការធានាពីប្រទេសសមាជិកក្រុមប្រឹក្សាសន្តិសុខទាំង៥ ដែលក្នុងនោះមានរុស្ស៊ី ហើយបន្ថែមប្រទេសអាល្លឺម៉ង់ និង តួកគីដែរ។ ដូចទៅនឹង ការធានាសន្តិសុខដែលអ៊ុយក្រែនចង់បាន គឺទីក្រុងកៀវចង់បានគំរូ ដូចមានចែងក្នុងមាត្រាទី៥ របស់ធម្មនុញ្ញអង្គការណាតូ ពោលគឺប្រទេសអ្នកធានានឹងត្រូវលូកដៃ អន្តរាគមន៍យោធាជួយអ៊ុយក្រែន ប្រសិនបើសន្តិសុខរបស់អ៊ុយក្រែនរងការគំរាមកំហែងពីរុស្ស៊ីទៀត។ ក្នុងន័យនេះ បើមានប្រទេសចេញមុខធានាការពារអ៊ុយក្រែន នោះវាប្រៀបដូចជាឲ្យអ្នកធានា ត្រូវប្រកាសសង្គ្រាមផ្ទាល់ជាមួយប្រទេសដែលគំរាមកំហែងសន្តិសុខអ៊ុយក្រែនអញ្ចឹងដែរ ឬ អាចនិយាយបានថាប្រឈមមុខនឹងរុស្ស៊ីនេះតែម្តង។
រុស្ស៊ីសន្យាបន្ថយប្រតិបត្តិការយោធាជុំវិញក្រុងកៀវនិងក្រុងមួយចំនួនទៀតតែមិនបញ្ជាក់ច្បាស់លាស់ទេ
អនុរដ្ឋមន្ត្រីការពារជាតិរុស្ស៊ី លោក Alexander Fomin បានប្រាប់អ្នកយកព័ត៌មាន ថា ការសម្រេចចិត្តមួយត្រូវបានធ្វើឡើង ដើម្បីកាត់បន្ថយសកម្មភាពយោធានៅក្នុងទិសដៅជុំវិញក្រុងកៀវ និង តំបន់ ឈីនីហ៊ីវ(Chernihiv) និងក្រុងមួយចំនួនទៀត។ យ៉ាងណាក៏ដោយរុស្ស៊ីមិនបានបញ្ជាក់ថា ក្រុងដទៃទៀត មានក្រុងឬតំបន់ណាខ្លះនោះទេ។ ពិសេសភាគីរុស្ស៊ីមិនបាននិយាយអំពីតំបន់ផ្សេងទៀត ដែលមានការប្រយុទ្ធគ្នាខ្លាំងនោះទេ ដូចជានៅទីក្រុង Mariupol តំបន់ សុំមី (Sumy) ក្រុងខាកៀវ(Kharkiv) និង តំបន់ ខឺសុន(Kherson) ជាដើម។
អត្ថបទគួរអាន
យ៉ាងណាក៏ដោយ បើតាមការអះអាងពីមន្ទីរបញ្ជកោនអាមេរិកអះអាងថា ចាប់ពីថ្ងៃអង្គារ ប្រទេសរុស្ស៊ីបានចាប់ផ្តើមចល័តកងទ័ពតិចតួចបំផុត ចេញពីទីតាំងជុំវិញទីក្រុងកៀវ ពិតមែន ប៉ុន្តែវាត្រូវបានគេមើលឃើញថា ជាការផ្លាស់ប្តូរទីតាំងច្រើនជាងការដកថយ ឬការដកខ្លួនចេញពីសង្គ្រាមតែម្តងក៏មានទាន់ដឹងច្បាស់ដែរពេលនេះ។ អ្នកវិភាគព្រឹត្តិការណ៍អន្តរជាតិមួយចំនួនបានកត់សម្គាល់ថា ការសន្យារបស់រុស្ស៊ីក្នុងការកាត់បន្ថយការប្រយុទ្ធនេះ គឺភាគច្រើនជាតំបន់ដែលខ្លួនបាននិងកំពុងតែចាញ់ប្រៀបអ៊ុយក្រែនទៅវិញទេ។
ក្រោយឃើញពីការបន្ទន់ឥរិយាបថបន្តិចរបស់រុស្ស៊ី ទោះធ្វើបានដូចតាមការសន្យា ឬមិនបានក្តី ប៉ុន្តែប្រធានាធិបតីអ៊ុយក្រែន លោក ហ្សេលេនស្គី បានហៅកិច្ចចរចាលើកនេះថា បានផ្តល់សញ្ញាវិជ្ជមាន ប៉ុន្តែលោកមិនទាន់ជឿជាក់លើការសន្យាតែមាត់ ឬមានតែលើក្រដាសនោះទេ ចាំមើលតទៅទៀតសិន។
លោកហ្សេលេនស្គី បន្តថាទោះបីរុស្ស៊ីបន្ធូរដៃវាយប្រហារក៏ដោយ ក៏មិនមែនបានន័យថា អ៊ុយក្រែនបន្ធូរដៃការពារនោះដែរ ពោលកងទ័ពអ៊ុយក្រែន នៅតែបន្តវាយរុស្ស៊ីឲ្យដកថយ ដើម្បីការពារទឹកដីរបស់ខ្លួន។
ប្រធានាធិបតីអ៊ុយក្រែនរូបនេះ បានរំលឹកឡើងវិញថា សម្រាប់កិច្ចព្រមព្រៀងសន្តិភាពណាមួយអាចដំណើរការទៅបាន ទាល់តែទាហានរុស្ស៊ីចាកចេញ និងមិនអាចមានការសម្របសម្រួលណាមួយ ជាការដោះដូរជាមួយអធិបតេយ្យភាព និងបូរណភាពទឹកដីរបស់អ៊ុយក្រែនឡើយ។
ប្រធានាធិបតីអ៊ុយក្រែន ក៏បានអំពាវនាវឱ្យមានការដាក់ទណ្ឌកម្មកាន់តែតឹងរ៉ឹងប្រឆាំងនឹងរុស្ស៊ី និងបានបញ្ជាក់ថា ការដាក់ទណ្ឌកម្មបច្ចុប្បន្ននឹងត្រូវដកចេញវិញ លុះត្រាតែសង្គ្រាមបញ្ចប់ ហើយយុត្តិធម៌ត្រូវបានស្ដារឡើងវិញសម្រាប់អ៊ុយក្រែន។
សរុបមក យើងមិនទាន់ដឹងច្បាស់បានទេថា សម្បទានរបស់អ៊ុយក្រែននឹងអាចទៅជួយបញ្ចុះបញ្ចូលរុស្ស៊ីឲ្យឈប់ធ្វើសង្គ្រាមឈ្លានពានអ៊ុយក្រែន ឬមួយយ៉ាងណាទេ? អ៊ុយក្រែនយល់ព្រម ប្រកាន់ជំហរអព្យាក្រឹត្យ ដោយមិនចូលរួមក្នុងបក្សសម្ព័ន្ធយោធាណាមួយ ដូចជាអង្គការណាតូជាដើម គឺអាចឆ្លើយតបនឹងការចង់បានរុស្ស៊ីកន្លងមកមួយចំណុចហើយ ប៉ុន្តែសម្បទានរបស់អ៊ុយក្រែននឹង មិនប្រាកដថា ទៅជំរុញឲ្យរុស្ស៊ី ឈប់ធ្វើសង្គ្រាមឈ្លានពានអ៊ុយក្រែនដែរ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
