រុស្ស៊ី និងវេណេស៊ុយអេឡានឹងចាត់វិធានការរួមគ្នា ដើម្បីឆ្លើយតបនឹងការបង្កកទ្រព្យសម្បត្តិរបស់ពួកគេ

លោក សឺហ្គេ ឡាវរ៉ូវ (Sergey Lavrov) រដ្ឋមន្ត្រីការបរទេសរុស្ស៊ី បាននិយាយនៅទីក្រុងការ៉ាកាសប្រទេសវេណេស៊ុយអេឡា ថា រុស្ស៊ីមានផែនការផ្ទាល់ខ្លួនរបស់ខ្លួន ហើយវ៉េណេស៊ុយអេឡា ក៏មានបំណងចាត់វិធានការមួយចំនួនដែរ។ ដូច្នេះហើយការផ្លាស់ប្តូរបទពិសោធន៍គ្នានៅក្នុងតំបន់នេះ គឺមានប្រយោជន៍ខ្លាំងណាស់ ដើម្បីស្វែងរកយុត្តិធម៌ទាំងអស់គ្នា។ នេះគឺជាទិសដៅសំខាន់ដែលពួកគេត្រូវធ្វើការរួមគ្នា។

នៅក្នុងជំនួបជាមួយនឹងលោក ហ្គីល (Yvan Gil) ដើម្បីផ្លាស់ប្តូរទស្សនគ្នាពីបញ្ហានេះក្នុងពេលធ្វើកិច្ចទស្សនកិច្ចនៅវេណេស៊ុយអេឡា លោក ឡាវរ៉ូវ បាននិយាយថា វេណេហ្ស៊ុយអេឡា បានរងគ្រោះដោយសារគោលនយោបាយរបស់អាម៉េរិក និងសម្ព័ន្ធមិត្តរបស់ខ្លួន ដែលលោកបានពិពណ៌នាថា ជាអំពើ«ព្រៃផ្សៃ និងជញ្ជក់ឈាមគេ»។

លោក ឡាវរ៉ូវ បានបន្ថែមថា ការរឹបអូសយកយន្តហោះ Boeing មួយគ្រឿងដែលជាកម្មសិទ្ធិរបស់ក្រុមហ៊ុនវេណេស៊ុយអេឡា អេមត្រាស៊ឺ (Emtrasur) ពីសំណាក់សហរដ្ឋអាម៉េរិក កាលពីថ្ងៃទី១២ ខែកុម្ភៈ គឺជាទង្វើមួយ ដែលវេណេស៊ុយអេឡា ត្រូវរួមគ្នាជាមួយនឹងរុស្ស៊ី ដើម្បីឆ្លើយតបនឹងបញ្ហានេះ។

រដ្ឋមន្ត្រីការបរទេសរុស្ស៊ី បានបន្ថែមទៀតថា ក្រៅពីការរឹបអូសយកយន្តហោះនេះ ទ្រព្យសម្បត្តិនិងទុនបម្រុងរបស់វេណេស៊ុយអេឡា ក៏ត្រូវបានបង្កកនៅបណ្តាប្រទេសបស្ចិមលោកដូចជាការបង្កកទុនបម្រុងរបស់រុស្ស៊ីអ៊ីចឹងដែរ។ ជាការពិត នេះគឺជាការរំលោភយ៉ាងធ្ងន់ធ្ងរ និងជាក់ស្តែងទៅលើច្បាប់អន្តរជាតិ និងការអនុវត្តនៃប្រតិបត្តិការទំនាក់ទំនងស៊ីវិល័យក្នុងពាណិជ្ជកម្ម ការវិនិយោគ និងវិស័យផ្សេងទៀត។​​​​​​​

លោក ឡាវរ៉ូវ បាននិយាយថា ទំនាក់ទំនងរវាងរុស្ស៊ី និងវេណេស៊ុយអេឡា បានឈានដល់កម្រិតនៃភាពជាដៃគូយុទ្ធសាស្ត្រមានស្ថិរភាព ហើយប្រទេសទាំងពីរបានព្រមព្រៀងគ្នាក្នុងការបង្កើនល្បឿន និងបរិមាណនៃកិច្ចសហប្រតិបត្តិការរបស់ពួកគេក្នុងវិស័យថាមពលនុយក្លេអ៊ែ​ និងផលិតកម្មប្រេងផងដែរ​៕

អត្ថបទ៖ សុខ ជា