ការលក់គ្រឿងរណ្ដាប់សែនចិននៅឆ្នាំនេះកាក់កបជាងឆ្នាំមុន ទោះតម្លៃទំនិញឡើងថ្លៃបន្តិចក្តី

លោកស្រី វុធ ពិសី អាជីវករលក់ដូរគ្រឿងរណ្ដាប់សែនចិន នៅក្នុងផ្សារអូឬស្សី បានប្រាប់ខេមបូណូមីស​ថា ការលក់ដូរគ្រឿងរណ្តាប់សែន និងគ្រឿងតុបតែងលម្អផ្ទះនៅឆ្នាំនេះហាក់មានភាពល្អប្រសើរជាងឆ្នាំមុន បើទោះបីតម្លៃទំនិញនៅឆ្នាំនេះមានការកើនឡើងបន្តិចក្តី។

អាជីវកររូបនេះអះអាងថា មានជនជាតិចិន និងអ្នកជាប់សែស្រឡាញចិន បានមកទិញគ្រឿងរណ្តាប់ និងគ្រឿងតុបតែងលម្អផ្ទះនៅតូបរបស់លោកស្រីជាហូរហែតាំងពីអំឡុងខែធ្នូ ឆ្នាំមុខមកម្ល៉េះ។ កត្តានេះធ្វើឱ្យលោកស្រីរំពឹងថា របស់របរគ្រឿងក្នុងតូបរបស់លោកស្រីនឹងអាចលក់អស់នៅឆ្នាំនេះ ខណៈបច្ចុប្បន្នលក់បានប្រមាណ៧០%ហើយ។

មិនខុសគ្នានោះទេ អ្នកស្រី ផូ សុខតុន អាជីវករលក់ដូរគ្រឿងរណ្ដាប់សែនចិន នៅក្នុងផ្សារអូឬស្សីដែរនោះ បានអះអាងថា ការលក់គ្រឿងរណ្តាប់សែន និងគ្រឿងតុបតែងលម្អផ្ទះនៅឆ្នាំនេះហាក់កាក់កបជាងឆ្នាំមុន​។ តែយ៉ាងណាអាជីរកររូបនេះអះអាងថា ឆ្នាំនេះលោកស្រីមិនសូវហ៊ានយកទំនិញមកលក់ច្រើននោះទេ។

ដោយឡែកលោក លត់ លីម៉េង អាជីវករលក់ដូរគ្រឿងរណ្ដាប់សែនចិន នៅក្នុងផ្សារអូឬស្សីមួយរូបដែរនោះ បានគូសបញ្ជាក់ថា ការលក់ដូរគ្រឿងរណ្ដាប់សែន និងគ្រឿងលម្អតុបតែងផ្ទះសម្បែងក្នុងពិធីបុណ្យចូលឆ្នាំប្រពៃណីចិន នៅកន្លែងលោកនៅឆ្នាំនេះ ហាក់មានការធ្លាក់ចុះជាងឆ្នាំមុនបន្តិច ពោលគឺធ្លាក់ចុះប្រមាណ២០% បើធៀបនឹងឆ្នាំមុន ដោយសារអ្នកទិញមួយចំនួនបានកាត់បន្ថយការទិញ ដ្បិតថាស្ថានភាពសេដ្ឋកិច្ចមិនសូវល្អប្រសើរ។អាជីវកររូបនេះកត់សម្គាល់ឃើញថា ជាទូទៅនៅមុនដល់ថ្ងៃសែនចូលឆ្នាំចិនប្រមាណ១សប្តាហ៍ នឹងមានសម្ទុះបញ្ជាទិញច្រើនពីភ្ញៀវច្រើន។

​សូមជម្រាបថា ការប្រារព្ធពិធីបុណ្យចូលឆ្នាំប្រពៃណីចិននៅឆ្នាំនេះ គឺមានការត្រៀមរៀបចំធ្វើឡើងយ៉ាងផុសផុល ដោយប្រជាជនដែលមានដើមកំណើតចិន និងអ្នកជាប់សែស្រឡាយចិនជាច្រើនកំពុងមមាញឹកក្នុងការដើរទិញគ្រឿងរណ្ដាប់សែន និងគ្រឿងលម្អតុបតែងផ្ទះសម្បែងរបស់ពួកគេ ដើម្បីសែនក្នុងពិធីបុណ្យចូលឆ្នាំថ្មីប្រពៃណីចិន ដែលត្រូវធ្វើឡើងចាប់ពីថ្ងៃទី៩-១១ ខែកុម្ភៈ ឆ្នាំ២០២៤៕