សម្ដេចតេជោ ហ៊ុនសែន បានប្រកាសថា នឹងមិនមានការបិទតំបន់ដែលមានហានិភ័យខ្ពស់ទៀតទេ

បើតាមការអះអាងរបស់នាយករដ្ឋមន្ត្រី នៅពេលមានការបើកប្រទេសឡើងវិញនាពេលខាងមុខនេះ រាជរដ្ឋាភិបាលនឹងមិនមានការបិទខ្ចប់នៅតាមតំបន់ហានិភ័យខ្ពស់ទៀតនោះទេ។ ក្នុងករណី មានវិជ្ជមានកូវីដ១៩ទៅលើ កម្មកររោងចក្រ សិស្សានុសិស្ស រួមទាំងអាជីវករផ្សេងៗ គឺតម្រូវឲ្យយកតែបុគ្គលដែលមានវិជ្ជមាន និងអ្នកដែលមានការសង្ស័យយកទៅព្យាបាល និងធ្វើតេស្ដតែប៉ុណ្ណោះ គឺមិនតម្រូវឲ្យបិទទីតាំងទាំងមូលដូចកាលពីមុនទៀតនោះឡើយ។ 

គិតមកទល់ពេលនេះ អាត្រានៃករណីឆ្លងកូវីដ-១៩នៅកម្ពុជាមានការធ្លាក់ចុះគួរឲ្យកត់សម្គាល់ ខណៈដែលការចាក់វ៉ាក់សាំងនៅទូទាំងប្រទេសក៏សម្រេចបានកាន់តែច្រើនផងដែរ ហើយរាជរដ្ឋាភិបាលបានអះអាងថា កម្ពុជាមានវ៉ាក់សាំងគ្រប់គ្រាន់សម្រាប់ចាក់ជូនប្រជាពលរដ្ឋទៅតាមផែនការដែលបានកំណត់។ 

សូមជម្រាបថា ដោយគិតត្រឹមថ្ងៃទី ២២ ខែតុលា ឆ្នាំ២០២២ នេះ កម្ពុជាបានរកឃើញករណីវិជ្ជមានកូវីដ-១៩នៅកម្ពុជាមានចំនួន ១៤៨នាក់ អ្នកជាសះស្បើយចំនួន៣២៧នាក់ និងមានករណីស្លាប់ចំនួន ១១ នាក់បន្ថែម។ ចំណែកការចាក់វ៉ាក់សាំងជូនប្រជាពលរដ្ឋ១៨ឆ្នាំឡើងទៅវិញ មាន១០លាន នាក់ សម្រេចបាន៩៩,៦៧% រីឯអ្នកដែលទទួលការចាក់ដូសទី៣ ឬដូសជំរុញវិញ មានចំនួនជាង ១លាន ៥សែននាក់ហើយ។ នេះបើយោងតាមរបាយការណ៍របស់ក្រសួងសុខាភិបាល៕

អត្ថបទ៖ ហួន ស្រីនីត