ឯកឧត្តម ចាន់ សេងឡា អគ្គនាយករដ្ឋាករទឹកស្វយ័តសៀមរាប បានគូសបញ្ជាក់ថា គម្រោងពង្រីកសមត្ថភាពប្រព័ន្ធផ្គត់ផ្គង់ទឹកស្អាតសៀមរាប ក្រោមកម្ចីសម្បទានពីរាជរដ្ឋាភិបាលជប៉ុន តាមរយៈទីភ្នាក់ងារសហប្រតិបត្តិការអន្តរជាតិជប៉ុន ប្រចាំកម្ពុជា (JICA) គឺឆ្លើយតបទៅនឹងតម្រូវការរបស់ប្រជាពលរដ្ឋ និងភ្ញៀវទេសចរ។ បើតាមអគ្គនាយករដ្ឋាករទឹកស្វយ័តសៀមរាប បច្ចុប្បន្នខេត្តសៀមរាប មានរោងចក្រប្រព្រឹត្តកម្មទឹកស្អាតចំនួន៣ ដែលមានលទ្ធភាពផ្គត់ផ្គង់ទឹកស្អាតសរុប៩ម៉ឺនម៉ែត្រគីបក្នុងមួយថ្ងៃ ដែលជាកម្ចីសម្បទានពីរាជរដ្ឋាភិបាលជប៉ុន និងប្រទេសបារាំង។
សម្រាប់អគ្គនាយករដ្ឋាករទឹកស្វយ័តសៀមរាប គម្រោងពង្រីកសមត្ថភាពប្រព័ន្ធផ្គត់ផ្គង់ទឹកស្អាតសៀមរាបនេះ បានរួមចំណែកយ៉ាងសំខាន់ក្នុងការធានានូវការផ្គត់ផ្គង់ទឹកស្អាត និងមានសុវត្ថិភាពជូនប្រជាជនក្នុងក្រុងសៀមរាប និងលើកកម្ពស់ឧស្សាហកម្មទេសចរណ៍នៅខេត្តនេះផងដែរ។ ជាមួយគ្នានោះ ដើម្បីឆ្លើយតបនូវតម្រូវការទឹកស្អាតប្រើប្រាស់នៅតំបន់ជុំវិញក្រុងសៀមរាប ដែលជាគោលដៅទេសចរណ៍ផងនោះ រដ្ឋបាលខេត្តសៀមរាប មានផែនការផ្គត់ផ្គង់ទឹកស្អាតប្រើប្រាស់ឲ្យបាន១០០ភាគរយ សម្រាប់ប្រជាពលរដ្ឋប្រមាណ២ម៉ឺនគ្រួសារ ដែលរស់នៅតំបន់អភិវឌ្ឍន៍ជុំវិញក្រុងសៀមរាបនៅត្រឹមឆ្នាំ២០៣០ ខណៈបច្ចុប្បន្នប្រជាពលរដ្ឋប្រមាណ២ពាន់គ្រួសារ បានទទួលផលប្រយោជន៍ពីគម្រោងនេះ។
អត្ថបទគួរអាន
បើតាមរដ្ឋាករទឹកស្វយ័តសៀមរាប គម្រោងពង្រីកសមត្ថភាពប្រព័ន្ធផ្គត់ផ្គង់ទឹកស្អាតសៀមរាប មានចំនួន៣គម្រោង និងចំណាយថវិកាសរុបចំនួន ១៥លានយ៉េន ដោយគម្រោងទី១ ចាប់ផ្ដើមនៅឆ្នាំ២០១២ មានទំហំទឹកប្រាក់ជាង៧លានយ៉េន។ គម្រោងទី២ ចាប់ផ្ដើមនៅឆ្នាំ២០២១ មានទំហំទឹកប្រាក់ជាង៦លានយ៉េន និងគម្រោងទី៣បានចាប់ផ្ដើមនៅឆ្នាំ២០២៣ ជាមួយទំហំទឹកប្រាក់ជាង២លានយ៉េន។ សម្រាប់រោងចក្រប្រព្រឹត្តិកម្មទឹកស្អាតជ្រាវ-សៀមរាប បានសម្ពោធដាក់ឲ្យប្រើប្រាស់ជាផ្លូវការនៅអំឡុងឧសភា ឆ្នាំ២០២៣ ដែលមានលទ្ធភាពផ្គត់ផ្គង់ទឹកស្អាតសម្រាប់ប្រើប្រាស់៦ម៉ឺនម៉ែត្រគីបក្នុងមួយថ្ងៃ។
សូមបញ្ជាក់ថា រាជរដ្ឋាភិបាលកម្ពុជា បានកំណត់គោលនយោបាយលើវិស័យទឹកស្អាត គឺពង្រីកវិសាលភាពនៃការផ្គត់ផ្គង់ទឹកស្អាតនៅទីក្រុង ទីប្រជុំជនឱ្យបាន៩០ភាគរយ នៅត្រឹមឆ្នាំ២០២៣ និង១០០ភាគរយ នៅត្រឹមឆ្នាំ២០២៥។ បច្ចុប្បន្ននេះការផ្គត់ផ្គង់ទឹកស្អាតទូទាំងប្រទេស បានកើនឡើងគួរឱ្យកត់សម្គាល់ ដែលគិតត្រឹមឆ្នាំ២០២២ ចំនួនគ្រួសារទទួលបានទឹកស្អាតប្រើប្រាស់មានជាង១លានគ្រួសារ កើនឡើងជិត៥៤ភាគរយ បើធៀបនឹងឆ្នាំ២០១៨ ដែលមានប្រមាណតែ៧៨ម៉ឺនគ្រួសារ ជាមួយបរិមាណទឹកស្អាតកើនដល់ជិត៤០០លានម៉ែត្រគូប ដែលកាលពីឆ្នាំ២០១៨ មានប្រមាណជាង៣០០លានម៉ែត្រគូប៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
