រដ្ឋមន្ត្រីការបរទេសសិង្ហបុរី លោក វីវៀន បាឡាគ្រីសណាន់ នៅថ្ងៃចន្ទដើមសប្ដាហ៍នេះបានឱ្យដឹងថា ប្រទេសសិង្ហបុរីនឹងដាក់ទណ្ឌកម្មលើប្រទេសរុស្ស៊ី ដោយវិធានការនេះ នឹងរួមបញ្ចូលនូវការដាក់ការត្រួតពិនិត្យការនាំចេញទំនិញរបស់សិង្ហបុរីទៅរុស្ស៊ី និងការបិទខ្ទប់ប្រតិបត្តិការធនាគារ និងហិរញ្ញវត្ថុរបស់រុស្ស៊ីមួយចំនួនផងដែរ។ នេះបើយោងតាមការចុះផ្សាយដោយសារព័ត៌មាន CNA។
Story: រដ្ឋមន្ត្រីការបរទេសសិង្ហបុរី លោក វីវៀន បាឡាគ្រីសណាន់បាននិយាយថា សិង្ហបុរីកម្រធ្វើសកម្មភាព ក្នុងការដាក់ទណ្ឌកម្មលើប្រទេសផ្សេងទៀតណាស់ ក្នុងករណីដែលគ្មានសេចក្តីសម្រេច ឬការណែនាំពីក្រុមប្រឹក្សាសន្តិសុខអង្គការសហប្រជាជាតិ។ ទោះជាយ៉ាងណាក៏ដោយ ដោយសារភាពធ្ងន់ធ្ងរដែលមិនធ្លាប់មានពីមុនមកនៃការវាយប្រហាររបស់រុស្ស៊ីលើអ៊ុយក្រែន និងការប្រើសិទ្ធិវេតូ (រារាំង) ពីសំណាក់រុស្ស៊ីចំពោះសេចក្តីព្រាងដំណោះស្រាយក្រុមប្រឹក្សាសន្តិសុខនោះ ធ្វើឱ្យសិង្ហបុរីមានបំណងធ្វើសកម្មភាពរួមគ្នា ជាមួយបណ្តាប្រទេសដែលមានគំនិតដូចគ្នាជាច្រើនទៀត ដើម្បីដាក់ទណ្ឌកម្ម និងការដាក់កម្រិតសមស្របប្រឆាំងនឹងរុស្ស៊ី។
អត្ថបទគួរអាន
លោកបាឡាគ្រីសណាន់ក៏បានកត់សម្គាល់ផងដែរថា ប្រទេសសិង្ហបុរី គឺជាអ្នកសហឧបត្ថម្ភគាំទ្រមួយក្នុងចំណោមសមាជិកសហឧបត្ថម្ភគាំទ្រចំនួន ៨២ នៃដំណោះស្រាយក្រុមប្រឹក្សាសន្តិសុខអង្គការសហប្រជាជាតិ ដើម្បីថ្កោលទោសការឈ្លានពានរបស់រុស្ស៊ីលើអ៊ុយក្រែន។ ប៉ុន្ដែ នៅទីបំផុត សេចក្ដីព្រាងដំណោះស្រាយរបស់ក្រុមប្រឹក្សាសន្ដិសុខមិនត្រូវបានអនុម័តទេ ដោយសាររុស្ស៊ី ដែលជាសមាជិកអចិន្ត្រៃយ៍នៃក្រុមប្រឹក្សា បានបោះឆ្នោតវេតូ ខណៈសមាជិក ៣ រូបផ្សេងទៀត ដែលមានដូចជា ចិន ឥណ្ឌា និង អេមីរ៉ាតអារ៉ាប់រួម បានបោះឆ្នោតអនុប្បវាទ។
តើសិង្ហបុរីនឹងធ្វើអ្វីខ្លះក្នុងការដាក់ទណ្ឌកម្មប្រឆាំងនឹងរុស្ស៊ី?
សិង្ហបុរីនឹងចាប់ផ្ដើមបង្កើនការប្រុងប្រយ័ត្នត្រួតពិនិត្យការនាំចេញរបស់ខ្លួន លើទំនិញណា ដូចជាអាវុធដែលមានលទ្ធភាពអាចប្រើយកទៅវាយប្រហារលើប្រជាជនអ៊ុយក្រែន ហើយក្រៅពីនេះ សិង្ហបុរីក៏នឹងបិទខ្ទប់ប្រតិបត្តិការធនាគារ និងហិរញ្ញវត្ថុមួយចំនួន ដែលទាក់ទងជាមួយប្រទេសរុស្ស៊ីផងដែរ ខណៈវិធានការជាក់លាក់នឹងត្រូវបានប្រកាសក្នុងពេលឆាប់ៗនេះ។ ជាមួយគ្នានេះ សិង្ហបុរីនឹងបន្តធ្វើការជាមួយដៃគូអន្តរជាតិ ដើម្បីប្រកាន់ជំហររឹងមាំប្រឆាំងនឹងសង្គ្រាមឈ្លានពានរុស្ស៊ីទៅលើអ៊ុយក្រែន ក៏ដូចជាការបញ្ចប់អំពើហិង្សា និងកាត់បន្ថយភាពតានតឹង ខណៈរដ្ឋមន្រ្តីការបរទេសសិង្ហបុរីបាននិយាយថា ការឈ្លានពានរបស់រុស្ស៊ីលើអ៊ុយក្រែន គឺជាការរំលោភយ៉ាងច្បាស់លាស់ និងធ្ងន់ធ្ងរលើបទដ្ឋានអន្តរជាតិ និងជាគំរូដែលមិនអាចទទួលយកបាននោះឡើយ៕
អត្ថបទ ស៊ើង និមល់
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
