វៀតណាមគ្រោងចុះកិច្ចព្រមព្រៀងពាណិជ្ជកម្មសេរីថ្មីមួយទៀត ដើម្បីវាយលុកទីផ្សារអឺរ៉ុបឱ្យកាន់តែខ្លាំង
បន្ទាប់ពីមានកិច្ចព្រមព្រៀងពាណិជ្ជកម្មសេរីជាមួយបណ្តាប្រទេសមួយចំនួនក្នុងប្លុកសហភាពអឺរ៉ុប (EU) រួចមកហើយនោះ ប្រទេសវៀតណាមកំពុងត្រៀមខ្លួនចុះហត្ថ…
នៅក្នុងបទអត្ថាធិប្បាយមួយដែលចុះផ្សាយដោយព័ត៌មាន Nikkei Asia លោក ចូណាថាន ខូប (Jonathan Cobb) ប្រធានជាន់ខ្ពស់ផ្នែកអាកាសធាតុ នៃសមាគមនុយក្លេអ៊ែពិភពលោកបានគូសបញ្ជាក់ថា រដ្ឋាភិបាលក្នុងតំបន់គួរចាប់ផ្តើមកសាងក្របខណ្ឌច្បាប់ ពង្រឹងស្ថាប័ន បណ្តុះបណ្តាលធនធានមនុស្ស និងបង្កើនកិច្ចសហប្រតិបត្តិការតំបន់ចាប់ពីពេលនេះតទៅ ដើម្បីធានាថា ការសម្រេចចិត្តលើគម្រោងថាមពលនេះ ប្រព្រឹត្តទៅដោយរលូន ផ្អែកលើមូលដ្ឋានបច្ចេកទេស និងសេដ្ឋកិច្ចដ៏រឹងមាំ។
ស្ថិតក្នុងបរិបទដែលតំបន់ទាំងមូលកំពុងប្រឈមមុខនឹងវិបត្តិសន្តិសុខថាមពល គម្រោងអភិវឌ្ឍន៍ថាមពលនុយក្លេអ៊ែស៊ីវិលនៅអាស៊ីអាគ្នេយ៍ កំពុងក្លាយជាប្រធានបទក្តៅ និងទទួលបានការចាប់អារម្មណ៍យ៉ាងខ្លាំងពីមហាជន និងបណ្តាប្រទេសនានានៅលើពិភពលោក។ ក្នុងចំណោមប្រទេសទាំង១១នៅក្នុងតំបន់ វៀតណាម ឥណ្ឌូនេស៊ី និងហ្វីលីពីនកំពុងបង្ហាញការចាប់អារម្មណ៍យ៉ាងខ្លាំង និងបានឈានជើងធ្វើសកម្មភាពជាក់ស្តែងរួចទៅហើយ ស្របពេលដែលប្រទេសថៃ ម៉ាឡេស៊ី និងសិង្ហបុរី កំពុងស្ថិតក្នុងដំណាក់កាលសិក្សាស្រាវជ្រាវលើទិដ្ឋភាពបច្ចេកទេស និងបទដ្ឋានសុវត្ថិភាព។
លោក ចូណាថាន ខូប ប្រធានជាន់ខ្ពស់ផ្នែកអាកាសធាតុ នៃសមាគមនុយក្លេអ៊ែពិភពលោកបានអះអាងថា នេះជាពេលវេលដ៏សមស្របបំផុតសម្រាប់តំបន់អាស៊ីអាគ្នេយ៍ ក្នុងការកសាងសមត្ថភាព ដើម្បីឈានទៅដាក់ឱ្យប្រើប្រាស់ថាមពលនុយក្លេអ៊ែ។ ការណ៍នេះធ្វើឡើងចំពេលដែលតំបន់កំពុងប្រឈមនឹងកំណើនតម្រូវការអគ្គិសនីកើនឡើងយ៉ាងកំហុក ប៉ុន្តែបែរជាជួបប្រទះហានិភ័យសន្តិសុខថាមពល ដោយសារការពឹងផ្អែកខ្លាំងពេកលើប្រេងឥន្ធនៈផូស៊ីល។
អ្នកជំនាញរូបនេះយល់ឃើញថា ថាមពលនុយក្លេអ៊ែ គឺជាដំណោះស្រាយដ៏មានប្រសិទ្ធភាពបំផុត ដែលមិនត្រឹមតែជួយពង្រឹងសន្តិសុខថាមពលប៉ុណ្ណោះទេ ប៉ុន្តែថែមទាំងជួយគាំទ្រដល់កិច្ចខិតខំប្រឹងប្រែងកាត់បន្ថយការបំភាយឧស្ម័នកាបូនិក និងបើកផ្លូវឱ្យមានការអភិវឌ្ឍវិស័យឧស្សាហកម្មក្នុងតំបន់ទៀតផង។ ទោះជាយ៉ាងណា លោកបានសង្កត់ធ្ងន់ថា អត្ថប្រយោជន៍ទាំងនេះអាចសម្រេចទៅបាន លុះត្រាតែមានការរៀបចំផែនការយ៉ាងប្រុងប្រយ័ត្ន ការគ្រប់គ្រងហានិភ័យប្រកបដោយទំនុកចិត្ត និងការធានាថ្លៃអគ្គិសនីក្នុងកម្រិតមួយ ដែលសមរម្យសម្រាប់ប្រជាជនក្នុងរយៈពេលវែង។
ដើម្បីឆ្លើយតបឱ្យទាន់ពេលវេលានឹងតម្រូវការថាមពលនាពេលអនាគតលោក ចូណាថាន ខូប បានជំរុញឱ្យរដ្ឋាភិបាលក្នុងតំបន់ពន្លឿនការអភិវឌ្ឍសមត្ថភាពផ្នែកបទប្បញ្ញត្តិ ការពង្រឹងក្របខ័ណ្ឌស្ថាប័នគ្រប់គ្រង និងការបណ្តុះបណ្តាលកម្លាំងពលកម្មជំនាញឱ្យបានរួចរាល់។ បន្ថែមលើនេះតំបន់ចាំបាច់ត្រូវបង្កើតស្ថាប័នត្រួតពិនិត្យ និងគ្រប់គ្រង ដែលមានសមត្ថភាពខ្ពស់ និងមានឯករាជ្យភាពពេញលេញ៕
