អតិផរណាស្រីលង្ការ កើនឡើងដល់ទៅជាង ៥០% ខណៈដែលប្រទេសនេះ ក៏កំពុងស្នើសុំជំនួយពីអង្គការមូលនិធិរូបិយវត្ថុអន្តរជាតិ (IMF) ដើម្បីដោះស្រាយវិបត្តិសេដ្ឋកិច្ចដែលកំពុងដួលរលំនេះ ប៉ុន្ដែ IMF ក៏បានជំរុញឲ្យប្រទេសនេះ ធ្វើយ៉ាងណាទប់ទល់នឹងតម្លៃទំនិញដែលចេះតែបន្ដហក់ឡើងកាន់តែខ្លាំង និងអំពើពុករលួយក្នុងប្រទេសផងដែរ។
បើយោងតាមនាយកដ្ឋានជំរឿននិងស្ថិតិប្រទេសស្រីលង្កាបានឲ្យដឹងថា វាជាលើកដំបូងហើយដែលអត្រាអតិផរណាប្រទេសស្រីលង្កាបានកើនឡើងជាង ៥០%។ ទិន្នន័យនេះត្រូវបានបង្ហាញឡើង នៅតែប៉ុន្មានម៉ោងប៉ុណ្ណោះ បន្ទាប់ពីអង្គការមូលនិធិរូបិយវត្ថុអន្តរជាតិ បានជំរុញឱ្យប្រទេសស្រីលង្កាគ្រប់គ្រងអតិផរណារបស់ខ្លួន និងដោះស្រាយអំពើពុករលួយដ៏ធ្ងន់ធ្ងរ ដើម្បីសង្គ្រោះការដួលរលំនៃសេដ្ឋកិច្ចជាតិឡើងវិញ។
មន្ត្រី IMF បានបញ្ចប់ការពិភាក្សាដោយផ្ទាល់រយៈពេល ១០ ថ្ងៃជាមួយអាជ្ញាធរស្រីលង្កាក្នុងទីក្រុង Colombo កាលពីសប្ដាហ៍មុន នេះបន្ទាប់ពីប្រទេសស្រីលង្កា បានដាក់ស្នើសុំថវិកាបន្ថែមសម្រាប់សង្គ្រោះសេដ្ឋកិច្ចជាតិដ៏យ៉ាប់យឺននេះ។
មែនទែនទៅ រូបិយបណ្ណរូពីរបស់ប្រទេសស្រីលង្កា បានបាត់បង់តម្លៃជាងពាក់កណ្តាលធៀបនឹងដុល្លារអាមេរិកនៅឆ្នាំនេះ។ ក៏ប៉ុន្តែ អ្នកសេដ្ឋកិច្ចបាននិយាយថា តម្លៃអតិផរណាកំពុងកើនឡើងខ្លាំងជាងការបង្ហាញនៅក្នុងស្ថិតិផ្លូវការរបស់នាយកដ្ឋានជំរឿន និងស្ថិតិស្រីលង្កាទៅទៀត។
អត្ថបទគួរអាន
ទោះបីយ៉ាងណា យោងតាមសេដ្ឋវិទូនៅសកលវិទ្យាល័យចន ហ៊ូបគីន (Johns Hopkins) លោកស្ទីវ ហ៊ានក៍ (Steve Hanke) ដែលជាអ្នកតាមដានការកើនឡើងតម្លៃអតិផរណានៅទូទាំងពិភពលោក ថាបច្ចុប្បន្នប្រទេសស្រីលង្កាមានអតិផរណាកើនឡើងឡើង ១២៨% ឯណោះ ដែលជាប្រទេសទីពីរបន្ទាប់ពីប្រទេសហ្ស៊ីមបាវ៉េ ដែលមានការកើនឡើងអត្រាអតិផរណាដល់ទៅ ៣៦៥%។
លើសពីនេះទៅទៀត ប្រឈមមុខនឹងការខ្វះខាតថាមពលធ្ងន់ធ្ងរ ប្រទេសស្រីលង្កាកំពុងសង្កេតមើល និងត្រៀមបិទស្ថាប័នរដ្ឋដែលមិនសំខាន់រយៈពេលពីរសប្តាហ៍ រួមជាមួយនឹងការបិទសាលារៀន ដើម្បីកាត់បន្ថយការធ្វើដំណើរផងដែរ។
ដោយឡែក ប្រជាជនទាំង ២២ លាននាក់របស់ប្រទេសដែនកោះមួយនេះ បាននឹងកំពុងស៊ូទ្រាំយ៉ាងស្វិតស្វាញ ចំពោះមុខនឹងការខ្វះខាតយ៉ាងធ្ងន់ធ្ងរនៃសម្ភារៈប្រើប្រាស់ប្រចាំថ្ងៃសំខាន់ៗ រួមទាំងអាហារ ប្រេងឥន្ធនៈ និងថ្នាំពេទ្យ ដែលខ្វះខាតអស់រយៈពេលជាច្រើនខែមកហើយ។
មិនតែប៉ុណ្ណោះ ការតវ៉ាពីសំណាក់ប្រជាជន ដែលកំពុងជួបបញ្ហាដ៏លំបាកនេះ នៅតែបន្តនៅខាងក្រៅការិយាល័យរបស់ប្រធានាធិបតីស្រីលង្កា លោករ៉ាចាប៉ាស្កា (Gotabaya Rajapaksa) ដែលទាមទារឱ្យលាលែងពីតំណែង ជុំវិញភាពចលាចលផ្នែកសេដ្ឋកិច្ចនេះ ដែលមិនធ្លាប់មានពីមុនមក និងការគ្រប់គ្រងដែលគ្មានប្រសិទ្ធិភាពក្នុងការឆ្លើយតបទៅនឹងបញ្ហាចាក់ស្រេះទាំងនេះពីសំណាក់រដ្ឋាភិបាលលោក។
គួរជម្រាបថា ប្រទេសស្រីលង្កាកាលពីខែមេសាកន្លងទៅ បានស្នើសុំឲ្យអង្គការមូលនិធិរូបិយវត្ថុអន្តរជាតិជួយទ្រាំទ្រសេដ្ឋកិច្ច ដែដួលរលំនេះ បន្ទាប់ពីប្រទេសនេះបានជំពាក់បំណុលបរទេសជាង ៥១ពាន់លានដុល្លារ គ្មានលទ្ធភាពសងនោះទេ៕
