ស្ថិតិទេសចរណ៍សម្រាប់រយៈពេល៥ខែដំបូង របស់ក្រសួងទេសចរណ៍ និងកីឡាថៃបានបង្ហាញថា ជាមួយនឹងស្ថានភាពដាក់ប្រទេសក្នុងគ្រាអាសន្ន និងលុបចោលការហោះហើរចូលមកក្នុងប្រទេសថៃ បានធ្វើឲ្យប៉ះពាល់ដល់ការធ្វើដំណើរនៅក្នុងខែមេសា និងឧសភាកន្លងទៅនេះ។
ចំនួនទេសចរបរទេស កាលពីខែមករា ដល់ខែឧសភា មានការធ្លាក់ចុះដល់ទៅ ៦០% ធៀបនឹងរយៈពេលដូចគ្នាកាលពីឆ្នាំមុន ដោយមានចំនួនភ្ញៀវទេសចរមកនៅត្រឹមតែប្រមាណ ៦,៦៩ លាននាក់ប៉ុណ្ណោះ ដែលមានតិចជាងរយៈពេលដូចគ្នាកាលពីឆ្នាំមុនរហូតដល់ទៅ ១០លាននាក់។ ជាមួយគ្នានេះ ចំណូលពីទេសចរណ៍អន្តរជាតិ ក៏មានការធ្លាក់ចុះ ៥៩,៦%ផងដែរ ដែលមានចំណូលត្រឹមតែជិត ១១ ពាន់លានដុល្លារអាមេរិក។
អត្ថបទទាក់ទង!
លោក Chairat Trirattanajarasporn ប្រធានក្រុមប្រឹក្សាទេសចរណ៍ថៃបានឲ្យដឹងថា ប្រតិបត្តិករទេសចរណ៍ទាំងឡាយកំពុងមានតម្រូវការខ្លាំងពីភ្ញៀវទេសចរបរទេស។
លោកបន្ថែមថា «ភាគច្រើននៃពួកយើង គឺអាចទ្រាំទ្របានរហូតដល់ចុងខែមិថុនានេះ ប៉ុន្ដែមានប្រតិបត្តិករទេសចរណ៍ជាច្រើនក៏នឹងឈប់សងបំណុល និងទូទាត់ប្រាក់នានាផងដែរ នៅពេលដែលពួកគេមិនមានចំណូលសេសសល់នោះ»។
ប្រទេសថៃក៏កំពុងបង្កើតឲ្យមានគម្រោងបើកការធ្វើដំណើរឆ្លងព្រំដែនរវាងគ្នាទៅវិញទៅមក ជាមួយប្រទេសដៃគូ ដែលគម្រោងនេះហៅថា Travel Bubble។ គម្រោងនេះ ត្រូវបានក្រុមប្រឹក្សាទេសចរណ៍ថៃ រំពឹងថា នឹងអាចចុះហត្ថលេខាកាន់តែឆាប់ សម្រាប់អ្នកដំណើរជាពាណិជ្ជករបរទេស ចាប់ផ្ដើមធ្វើដំណើររបស់ពួកគេមកកាន់ប្រទេសថៃនៅក្នុងខែកក្កដាខាងមុខ។
លោក Chairat បានគូសបញ្ជាក់ដែរថា ទេសចរធ្វើដំណើរជាក្រុម និងអ្នកដំណើរឯករាជ្យ ដែលរំពឹងថា នឹងមកកម្សាន្ដក្នុងប្រទេសថៃ នៅខែកញ្ញានោះ នឹងត្រូវការពេលវេលាច្រើនទៀតដើម្បីរៀបចំ ព្រោះតែដំណើរការទិដ្ឋាការ។ លោកបន្ថែមទៀតថា រាជរដ្ឋាភិបាលគួរតែផ្ដល់នូវកម្មវិធីតាមដានដល់ភ្ញៀវទេសចរអន្តរជាតិ នៅពេលធ្វើដំណើរក្នុងប្រទេសថៃ ដើម្បីតាមដានថា ពួកគេបានទៅកន្លែងដូចគ្នា ដែលអ្នកជំងឺកូវីដ-១៩ បានទៅដែរ ឬយ៉ាងណា។
យ៉ាងណាក៏ដោយចុះ បើតាមរដ្ឋមន្ត្រីក្រសួងទេសចរណ៍ គឺលោក Phiphat Ratchakitprakarn បានឲ្យដឹងថា បើទោះបីមានការព្រមព្រៀងបង្កើតឲ្យមានគម្រោង Travel Bubble សម្រាប់បើកព្រំដែនរវាងគ្នាជាមួយប្រទេសដែលមានការឆ្លងកូវីដ-១៩ ធ្លាក់ចុះទាបក៏ដោយចុះ ប៉ុន្ដែ ប្រទេសថៃ ទំនងជាមិនអាចទទួលបានភ្ញៀវទេសចរអន្តរជាតិ នៅក្នុងកក្កដាទេ ហើយប្រទេសនេះ ក៏មិនសង្ឃឹមថា នឹងមានលំហូរទេសចរបរទេសច្រើននោះដែរ នៅឆ្នាំនេះ។
លោក Phiphat បន្ថែមថា អាជ្ញាធរទេសចរណ៍ថៃ បានចាត់តាំងការិយាល័យចំនួន ៥ នៅក្នុងប្រទេសចិន ដើម្បីពិចារណាក្នុងការចរចាទាក់ទងនឹងបទបញ្ញត្តិលើគម្រោង Travel Bubble ដោយនឹងជ្រើសរើសអនុវត្តចំពោះទីក្រុងមួយចំនួនសិន។
នៅក្នុងអំឡុងរយៈពេល ៥ខែដំបូងនៃឆ្នាំនេះ ការធ្វើដំណើរក្នុងស្រុកសរុបមានចំនួនជាង ៤០លាននាក់ ធ្លាក់ចុះប្រមាណជាង ៥៨% ខណៈដែលប្រាក់ចំណូលក៏មានការធ្លាក់ចុះ៥៧,៩%ដែរ ដែលមានមកនៅត្រឹម ជាង ៦ពាន់លានដុល្លារ។
ប្រភព៖ បាងកកប៉ុស្ដិ៍
None
