លោក អនុចា បានអះអាងថា ការងើបឡើងវិញនៃសេដ្ឋកិច្ចរបស់ចិន ដែលជាប្រទេសមានសេដ្ឋកិច្ចធំទីពីរនៅលើពិភពលោក បានជះឥទ្ធិពលជាវិជ្ជមានដល់ដៃគូពាណិជ្ជកម្មរបស់ខ្លួន រួមទាំងថៃផងដែរ។
អ្នកនាំពាក្យរដ្ឋាភិបាលថៃរូបនេះបាននិយាយដោយយោងលើការវិភាគរបស់ក្រុមអ្នកស្រាវជ្រាវនៃធនាគារថៃ ធីអេមប៊ី ថាណាឆាត (TMB Thanachart) ថា ការស្ទុះងើបឡើងវិញរបស់ចិនគឺផ្តល់ផលប្រយោជន៍ដោយផ្ទាល់ និងដោយប្រយោលដល់សេដ្ឋកិច្ចថៃ រួមទាំងកំណើនសេដ្ឋកិច្ចច្រើនជាងមុនដែលត្រូវបានរំពឹងថានឹងកើតឡើងនៅក្នុងឆមាសទីពីរនៃឆ្នាំនេះ។
លោក អនុចា បានបន្តថា ការបើកដំណើរការឡើងវិញនៅចិន និងការកើនឡើងនៃភ្ញៀវទេសចរចិនមកប្រទេសថៃ បានផ្តល់អត្ថប្រយោជន៍ដល់វិស័យឧស្សាហកម្មជាច្រើន រួមទាំងទេសចរណ៍ ការនាំចេញ និងសេវាកម្មផង។
មន្ត្រីដដែលបានបន្ថែមថា លោក ប្រាយុទ្ធ ចាន់អូចា បានណែនាំភ្នាក់ងាររដ្ឋឱ្យទាញយកអត្ថប្រយោជន៍ពីឱកាសនេះ ដោយពង្រឹងការប្រកួតប្រជែងរបស់ប្រទេស និងកែលម្អភាពខ្លាំងរបស់ខ្លួន។
អត្ថបទគួរអាន
លោក អនុចា បានអះអាងថាក្រុមអ្នកស្រាវជ្រាវរំពឹងថា ភ្ញៀវទេសចរចិនប្រហែល ៥,៣ លាននាក់ អាចនឹងមកកំសាន្តនៅប្រទេសថៃនាឆ្នាំនេះ ហើយពួកគេទំនងជាបង្កើតប្រាក់ចំណូលរហូតដល់ ៤០០ ពាន់លានបាត ឬជិត ១២ ពាន់លានដុល្លារឱ្យប្រទេសថៃ។
កាលពីឆ្នាំ ២០១៩ មុនកូវីដរីករាលដាល ថៃទទួលភ្ញៀវទេសចរចិន ១០ លាននាក់ ស្មើនឹង ២៨ % នៃការមកដល់នៃភ្ញៀវទេសចរបរទេសទាំងអស់ក្នុងឆ្នាំនោះ ជាមួយនឹងចំណូល ៥០០ ពាន់លានបាត ឬជិត ១៥ ពាន់លានដុល្លារ។
ក្រៅពីទេសចរណ៍ អ្នកនាំពាក្យរដ្ឋាភិបាលថៃរូបនេះបាន និយាយ ថា ការនាំ ចេញ របស់ ថៃ កំពុង ទទួល បាន អត្ថប្រយោជន៍ ពី ការ ស្ទុះ ងើប ឡើង វិញ របស់ ប្រទេស ចិន។ ការនាំចេញទៅកាន់ប្រទេសចិន ដែលជាទីផ្សារនាំចេញធំទីពីររបស់ថៃ បានកើនឡើងក្នុងអត្រាប៉ាន់ស្មាន ១០,៨% នៅឆមាសទីមួយនៃឆ្នាំនេះ ហើយក៏រំពឹងថានឹងកើនឡើងដល់ជិត ១៣% នៅក្នុងឆមាសទីពីរ៕
អត្ថបទ៖ សរ សុជាតិ
