សារព័ត៌មាន បាងកកប៉ុស្ដិ៍របស់ថៃ បានរាយការណ៍នៅថ្ងៃនេះ ថា រាជរដ្ឋាភិបាលថៃ បានចេញព្រមានសារជាថ្មីទៅកាន់ក្រុមហ៊ុនអ្នកនាំចេញទំនិញរបស់ខ្លួន ឲ្យមានការតាមដាន និងប្រុងប្រយ័ត្នខ្ពស់ ចំពោះបញ្ហាសង្គ្រាមបច្ចេកវិទ្យាដែលកំពុងមាននិន្នាការរីករាលដាលឡើងរវាងប្រទេសមហាអំណាចសេដ្ឋកិច្ចយក្សៗគឺចិន អាមេរិក រួមទាំងឥណ្ឌាផងដែរ។
សាកលវិទ្យាល័យសភាពាណិជ្ជកម្មថៃ បានគូសបញ្ជាក់ថា វិស័យពាណិជ្ជកម្មថៃ កំពុងតែមានការព្រួយបារម្ភខ្លាំង ជុំវិញបញ្ហាសង្គ្រាមពាណិជ្ជកម្មរវាង ប្រទេសចិន និងឥណ្ឌា ដោយសារតែ ឥណ្ឌា បានប្រកាសហាមឃាត់ការប្រើប្រាស់កម្មវិធីចំនួន ៥៩ ដែលបង្កើតឡើងដោយប្រទេសចិន បន្ថែមលើនេះ សង្គ្រាមពាណិជ្ជកម្មរវាង អាមេរិក និងចិន ក៏កំពុងប្រែក្លាយទៅជាជម្លោះបច្ចេកវិទ្យា និងមានការរឹតបន្តឹងទៅលើបញ្ហាសិទ្ធិមនុស្សថែមទៀត។
អត្ថបទទាក់ទង!
មន្រ្តីជាន់ខ្ពស់នៃសាកលវិទ្យាល័យសភាពាណិជ្ជកម្មថៃ លើកឡើងថា បើសិនជា កម្មវិធីផលិតដោយប្រទេសចិន ត្រូវបានហាមឃាត់ពិតមែន អាជីវកម្មថៃជាច្រើនដែលប្រើប្រាស់កម្មវិធីរបស់ចិន នឹងត្រូវរងគ្រោះ។
យ៉ាងណាក៏ដោយ រាជរដ្ឋាភិបាលថៃកំពុងតែពន្លឿនការងារ ដើម្បីជួយដល់វិស័យពាណិជ្ជកម្ម ដែលទទួលរងឥទ្ធិពលនេះ ដោយមានការផ្តល់កម្ចីការប្រាក់ទាប ការលើកលែងពន្ធពិសេស និងបង្កើតយុទ្ធនាការជំរុញការលក់ទាំងក្នុង និងក្រៅស្រុក។
គួររម្លឹកបន្តិចថា សាកលវិទ្យាល័យសភាពាណិជ្ជកម្មថៃ បានព្យាករថា ការនាំចេញទំនិញរបស់ប្រទេសថៃ អាចនឹងធ្លាក់ចុះដល់ ១៣,៥% នៅក្នុងឆ្នាំ ២០២០ បើសិនជា មិនមាន វ៉ាក់សាំងសម្រាប់មេរោគកូវីដ-១៩ ត្រូវបានរកឃើញនៅក្នុងឆ្នាំនេះទេ ហើយការនាំចេញទំនិញរបស់ថៃ នៅក្នុងឆមាសទី ២នេះ អាចនឹងធា្លក់ចុះខ្លាំងជាង ឆមាសទី ១ ទៅទៀត ដោយអាចនឹងធ្លាក់ចុះ ១៩,៨% ធៀបនឹងរយៈពេលដូចគ្នា កាលពីឆ្នាំមុន៕
None
