លោក ភីផាត រ័ត្នចាក់គីត ប្រាកាន រដ្ឋមន្ត្រីក្រសួងទេសចរណ៍ និងកីឡាថៃ បានឲ្យដឹងនៅក្នុងកាសែតបាងកកប៉ុស្ដ៍ កាលពីពេលថ្មីៗនេះថា ក្រសួងទេសចរណ៍ និងកីឡាថៃ រំពឹងចំនួនភ្ញៀវទេសចរបរទេសនៅឆ្នាំនេះ ថានឹងមាន ៣៦លាន ៩សែននាក់ បើសិនករណីដែល បញ្ហា Covid-19 ត្រូវបានធូរស្រាល និងអាចគ្រប់គ្រងបាន។ ប៉ុន្ដែ បើការរីករាលដាលនៅតែបន្ដ លោក ភីផាត បញ្ជាក់ថា វានឹងអាចធ្វើឲ្យមានបញ្ហាកាន់តែធំ និងមានក្ដីព្រួយបារម្ភកាន់តែខ្លាំង មិនមែនតែនៅក្នុងវិស័យសុខភាពសាធារណៈប៉ុណ្ណោះទេ ប៉ុន្ដែវាក៏នឹងធ្វើឲ្យមានការខាតបង់ធ្ងន់ធ្ងរដល់ចំណូលពីវិស័យទេសចរណ៍ផងដែរ ខណៈដែលសេដ្ឋកិច្ចថៃ គឺពឹងផ្អែកខ្លាំងលើវិស័យទេសចរណ៍ ដែលវិស័យនេះ បានចូលរួមចំណែកក្នុង ផលិតផលក្នុងស្រុកសរុបរហូតដល់ទៅ ២០%។
អត្ថបទទាក់ទង!
លោក ភីផាត បន្ថែមទៀតថា ក្នុងករណីមេរោគនេះ នឹងត្រូវឈប់បន្ដរីករាលដាល នៅក្នុងខែមេសា ឆ្នាំនេះ ប្រទេសថៃ រំពឹងទទួលបានភ្ញៀវទេសចរច្រើនបំផុត គឺមានរហូតដល់ ៣៦លាន ៩សែននាក់ ដែលអាចនឹងផ្ដល់ប្រាក់ចំណូលប្រមាណ ១,៧៨ ទ្រីលានបាត ឬស្មើនឹងប្រមាណ ៥៦ ពាន់លានដុល្លារអាមេរិក ពោលគឺ ចំនួននេះ មានការធ្លាក់ចុះប្រហែលជាង ៣ពាន់លានដុល្លារអាមេរិក ធៀបនឹងឆ្នាំ២០១៩ ដែលធ្លាប់ទទួលបានភ្ញៀវទេសចរ ៣៩លាន ៨សែននាក់។
វិស័យទេសចរណ៍ថៃ បានរងផលប៉ះពាល់ មិនធ្លាប់មានតាំងតែ ប្រទេសចិន បានសម្រេច បិទទីក្រុង វ៉ូហាន ដែលជាកន្លែងផ្ទុះឡើងនៃមេរោគ Covid-19 ដំបូងគេ ហើយវាបានបណ្ដាលឲ្យចំនួនទេសចរជនជាតិចិនដែលបានធ្វើដំណើរទៅកាន់ប្រទេសថៃ មានការថយចុះពីចំនួន ៣លាន៨សែននាក់ កាលពីខែមករា មកនៅត្រឹម ២លាននាក់ប៉ុណ្ណោះ នៅខែកុម្ភៈឆ្នាំនេះ ហើយមកទល់ពេលនេះចំនួនទេសចរបរទេសនៅតែបង្ហាញការធ្លាក់ចុះដដែល។
រដ្ឋមន្ត្រីក្រសួងទេសចរណ៍ និងកីឡាថៃ គូសបញ្ជាក់ថា កាលណាបញ្ហាមេរោគ Covid-19 អូសបន្លាយកាន់តែវែង នោះផលប៉ះពាល់មកលើប្រទេសថៃ នឹងមានកាន់តែធំដែរ។
ប្រធានសមាគមសណ្ឋាគារថៃ លោកស្រី ស៊ូប៉ាវណ្ណ តានំ គៀតទីភូម បានបញ្ជាក់ដែរថា ភ្ញៀវទេសចរដែលមកស្នាក់នៅក្នុងសណ្ឋាគារ គឺមានតែប្រមាណ ១០% ប៉ុណ្ណោះនាពេលបច្ចុប្បន្ននេះ ពោលគឺ ចំនួនបន្ទប់ដែលនៅសល់ គឺមានរហូតដល់ទៅ ៩០%ឯណោះ។
លោកស្រី ស៊ូប៉ាវណ្ណ បន្ថែមថា បើកាលណាការរីករាលដាលនៃ Covid-19 នេះ នៅតែបន្ដឥតល្ហែរយ៉ាងដូច្នេះ នឹងមានសណ្ឋាគារជាច្រើន នឹងត្រូវបង្ខំចិត្តបិទទ្វារ។
សូមបញ្ជាក់ថា គិតមកទល់ ថ្ងៃទី ១៦ ខែមីនានេះ ចំនួនករណីឆ្លងមេរោគ Covid-19 នៅប្រទេសថៃ កើនឡើងដល់ ១១៤ ករណី និងមានអ្នកស្លាប់ចំនួន ០១ នាក់ និង អ្នកដែលត្រូវបានព្យាបាលធូរស្បើយពីជំងឺនេះ មានចំនួន ៣៥ នាក់៕
None
