រាជរដ្ឋាភិបាលលោកប្រាយុទ្ធ ចាន់អូចា នាយករដ្ឋមន្ត្រីថៃ នឹងជួបពិភាក្សាជាមួយនឹងរដ្ឋមន្ត្រីក្រសួងវប្បធម៌ និងទេសចរណ៍ចិននៅក្នុងពេលឆាប់ៗនេះ ដើម្បីស្វែងរកកិច្ចសហប្រតិបត្តិការទ្វេភាគី លើកញ្ចប់ទេសចរណ៍ពិសេសនៅអំឡុងពេលកូវីដ១៩ ឬហៅថា Travel Bubble ដោយអនុញ្ញាតឲ្យភ្ញៀវទេសចរអាចធ្វើដំណើរទៅវិញមករវាងប្រទេសទាំងពីរបានកាន់តែងាយស្រួល និងសុវត្ថិភាព។ នេះបើតាមការអះអាងរបស់អ្នកនាំពាក្យរាជរដ្ឋាភិបាលនៅថ្ងៃចន្ទសប្ដាហ៍នេះ។ បន្ថែមពីនេះ មន្ត្រីរាជរដ្ឋាភិបាលថៃ ក៏កំពុងតែរៀបចំបង្កើតឲ្យមានកិច្ចពិភាក្សាជាមួយប្រទេសជិតខាង ដូចជាប្រទេសម៉ាឡេស៊ី សម្រាប់កិច្ចព្រមព្រៀងស្រដៀងគ្នានេះដែរ នៅចុងខែនេះ។
រាជរដ្ឋាភិបាលថៃ កំពុងព្យាយាមខ្លាំងមែនទែនក្នុងការស្វែងរកកិច្ចព្រមព្រៀងទ្វេភាគី ដើម្បីជំរុញការងើបឡើងវិញនៃវិស័យឧស្សាហកម្មទេសចរណ៍ ក៏ដូចជាសេដ្ឋកិច្ច បន្ទាប់ពីប្រទេសនេះ ទើបតែបានចាប់ផ្ដើមអនុវត្តឡើងវិញ នូវការបើកឲ្យជនបរទេសដែលបានចាក់វ៉ាក់សាំងរួច អាចធ្វើដំណើរចូលក្នុងប្រទេសថៃ ដោយមិនចាំបាច់ធ្វើចត្តាឡីស័ក។ ក្នុងនោះដែរ ថៃបានដាក់គោលដៅចម្បង ដើម្បីស្វែងរកកិច្ចសហប្រតិបត្តិការទេសចរណ៍ជាមួយនឹងចិន និងម៉ាឡេស៊ី ដ្បិតថា ប្រទេសទាំងពីរនេះ គឺជាប្រភពទេសចរណ៍ដ៏សំខាន់សម្រាប់ប្រទេសថៃ នៅអំឡុងពេលមិនទាន់មានកូវីដ១៩រាតត្បាត។អត្ថបទគួរអាន
ទេសចរជនជាតិចិន និងម៉ាឡេស៊ី គឺមានចំណែកដល់ទៅ ជាង១ភាគ៣នៃចំនួនភ្ញៀវទេសចរអន្តរជាតិសរុប ៤០លាននាក់ ដែលថៃទទួលបាននៅឆ្នាំ២០១៩ ព្រមទាំងទទួលបានចំណូលប្រមាណ ២០ពាន់លានដុល្លារពីវិស័យនេះផងដែរ។ ប៉ុន្ដែ ក្រោយមានកូវីដ១៩ចូលលុកលុយ ចំនួនភ្ញៀវទេសចរអន្តរជាតិ បានដាំក្បាលចុះយ៉ាងខ្លាំង ពិសេសភ្ញៀវចិនតែម្ដង ហើយមកទល់ពេលនេះ ក្រុងប៉េកាំងក៏នៅតែបន្ដដាក់ចេញវិធានការតឹងតែងចំពោះការធ្វើដំណើរចេញទៅក្រៅប្រទេសនៅឡើយដែរ។
សូមបញ្ជាក់ថា តាមរយៈ កញ្ចប់ទេសចរណ៍ពិសេស Travel bubble ភ្ញៀវទេសចរមិនមានការតម្រូវឲ្យធ្វើចត្តាឡីស័កនោះទេ និងអាចទទួលបាននូវការលើកលែងទិដ្ឋាការ និងការស្នាក់នៅពិសេសផងដែរ។ ប៉ុន្ដែ ប្រទេសដែលអនុវត្តកញ្ចប់ទេសចរណ៍ពិសេសនេះ ក៏នឹងត្រូវព្រមព្រៀងលើចំនួនកូតាភ្ញៀវទេសចរ និងបញ្ជាក់ពីទីតាំងជាក់លាក់នៃការធ្វើដំណើររបស់ពួកគេ ដើម្បីការពារការឆ្លងរីករាលដាលកូវីដ១៩៕None
