លោក ម៉ាសាគិ ស៊ុយសុគី ប្រធានក្រុមប្រឹក្សាភិបាលនៃ ក្រុមហ៊ុនសេវាហិរញ្ញវត្ថុ អ៊ីអន ដែលជាក្រុមហ៊ុនមេរបស់ផ្សារទំនើបអ៊ីអន បានជួបពិភាក្សាជាមួយ ឧបនាយករដ្ឋមន្រ្តីវៀតណាម លោក វួង ឌិញ ហួ អំពីបំណងវិនិយោគនៅក្នុងប្រទេសវៀតណាម ដោយបានចាត់ទុកវៀតណាម ជាគោលដៅវិនិយោគក៏មានសក្តានុពល ទាំងក្នុងវិស័យហិរញ្ញវត្ថុ និងការសាងសង់ផ្សារទំនើប។
លោក ម៉ាសាគិ បានឲ្យដឹងថា ការលក់ទំនិញ និងសេវាកម្មសរុប នៅក្នុងប្រទេសវៀតណាម កាលពីឆ្នាំ ២០១៨ មានការកើនឡើងប្រមាណ ១២ភាគរយ ធៀបនឹងឆ្នាំមុន ហើយគំរូអាជីវកម្មនៃផ្សារទំនើបអ៊ីអន ត្រូវបានទទួលស្គាល់ដោយ ប្រជាជនវៀតណាមហើយ។
អត្ថបទទាក់ទង!
វៀតណាម ក៏បានបង្ហាញការសាទរចំពោះ គម្រោងពង្រីកអាជីវកម្មរបស់ផ្សារទំនើបអ៊ីអននេះ ដែលអាចអភិវឌ្ឍន៍ វិស័យលក់រាយក្នុងស្រុករបស់ខ្លួន និងអាចនាំចេញផលិតផលវៀតណាម ទៅកាន់បណ្តាញ ផ្សារអ៊ីអន ទូទាំងសកលលោក ថែមទៀតផង។
គួរជម្រាបដែរថា គិតមកទល់ពេលបច្ចុប្បន្ន ប្រទេសវៀតណាម មានផ្សារទំនើបអ៊ីអនចំនួន ៤ សាខា កំពុងតែបើកដំណើរការ និងមាន ២សាខាទៀត ស្ថិតក្នុងការសាងសង់ គ្រោងនឹងបញ្ចប់នៅក្នុងឆ្នាំនេះ និងឆ្នាំ ២០២០ខាងមុខ។
តើក្រុមហ៊ុនមេ អ៊ីអនម៉ល នៅប្រទេសកម្ពុជា យើងវិញ គ្រោងនឹងវិនិយោគចំនួនប៉ុន្មាន?
ជាការពិតណាស់ វិនិយោគជប៉ុនក៏ចាត់ទុកកម្ពុជាជា គោលដៅវិនិយោគដ៏សំខាន់មួយផងដែរ ។ វិនិយោគជប៉ុនកំពុងតែបន្ថែមការវិនិយោគមកកាន់ប្រទេសកម្ពុជាយើងជាលំដាប់។ បើយើងក្រឡេកមកមើលពី ផ្សារទំនើបអ៊ីអនម៉ល នៅកម្ពុជាបន្តិចវិញ បច្ចុប្បន្ន គឺមាន ២សាខាហើយ កំពុងតែបើកដំណើរការ ហើយក្រុមហ៊ុន ក៏បានប្រកាសពី គម្រោងបើកសាខាទី ៣ នៅក្នុងទីក្រុង ING City ផងដែរ គ្រោងនឹងបើកដំណើរការនៅឆ្នាំ ២០២៣ខាងមុខនេះ។
អត្ថបទគួរឲ្យចាប់អារម្មណ៍!
ផ្សារទំនើបអ៊ីអនទី ៣នេះ ត្រូវបានដឹងថា មានទំហំធំជាងសាខាទី១ និងទី២ទៅទៀត ហើយក៏អាចចាត់ទុកបានថា ជាផ្សារទំនើបធំជាងគេមួយនៅកម្ពុជាផងដែរ ដោយមានផ្ទៃដីសាងសង់សរុបរហូតដល់ ១៨ ហិកតា ខណៈផ្សារទំនើបអ៊ីអនសាខាទី១ បានសាងសង់លើផ្ទៃដី ត្រឹមតែ ៧ ហិកតា និងសាខាទី២ មានផ្ទៃដីតែ ១០ហិកតាប៉ុណ្ណោះ។
បើមើលទៅក្នុងបញ្ជីឈ្មោះ គម្រោងផ្សារទំនើបអ៊ីអន ដែលនឹងត្រូវអភិវឌ្ឍឡើងនៅប៉ុន្មានឆ្នាំខាងមុខនេះនៅក្នុងបណ្ដាប្រទេសមួយចំនួននៅតំបន់អាស៊ី បានបង្ហាញថា ផ្សារទំនើបអ៊ីអនទី៣នេះ គឺធំជាងផ្សារទំនើបអ៊ីអន ដែលក្រុមហ៊ុនគ្រោងនឹងសាងសង់នៅប្រទេសចិន និងវៀតណាមទៅទៀត។
អត្ថបទគួរឲ្យចាប់អារម្មណ៍!
ទោះយ៉ាងណា គេមិនទាន់ដឹងនៅឡើយទេថា ផ្សារទំនើបអ៊ីអនសាខាទី៣នេះ នឹងត្រូវចំណាយដើមទុនអស់ប៉ុន្មានក្នុងការសាងសង់ឡើង ប៉ុន្ដែ បើតាមបទពិសោធន៍នាពេលកន្លងទៅ ផ្សារទំនើបអ៊ីអន ទី២ សែនសុខ ដែលមានទំហំផ្ទៃដីតូចជាងផ្សារទំនើបអ៊ីអនទី៣នេះ ៨ហិកតានោះ បានចំណាយទុនអស់ ១២០លានដុល្លារអាមេរិកឯណោះ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
