ត្រូវបានស្រង់សម្ដីដោយសារព័ត៌មានក្នុងស្រុកថៃ បាងកកប៉ុស្ដិ៍ លោក សុវណ្ណឆៃ ឡូហាវ៉ាត់ ថាណាកុល អគ្គនាយក ការិយាល័យលើកកម្ពស់ សហគ្រាសធុនតូច និងមធ្យម របស់ថៃ បានឲ្យដឹងថា បើធៀបនឹងកញ្ចប់ថវិកា កាលពីឆ្នាំ ២០១៨ ដែលរដ្ឋថៃ ជួយដល់វិស័យ SME ឃើញថា នៅឆ្នាំនេះ ថវិកាមានច្រើនជាងឆ្នាំមុន ប្រមាណ តែ ១,២% ប៉ុណ្ណោះ។ លោក សុវណ្ណឆៃ បន្ថែមទៀតថា ថវិកាទាំងនេះ នឹងត្រូវប្រើប្រាស់ សម្រាប់គាំទ្រដល់កម្មវិធី សម្រាប់វិស័យ SME និងអាជីវកម្មបង្កើតឡើងថ្មីៗ។
អត្ថបទទាក់ទង!
លើសពីនេះទៀត កញ្ចប់ថវិកាប្រមាណ ៤០លានដុល្លារអាមេរិកនេះ នឹងត្រូវប្រើប្រាស់ជាសំខាន់លើការអភិវឌ្ឍសហគ្រាសធុនតូច និងមធ្យមនៅភាគខាងជើងឈៀងខាងកើតប្រទេសថៃ ដែលគ្របដណ្ដប់លើវិស័យជាច្រើនដូចជា ការផលិតកំណាត់ កសិកម្ម ម្ហូបអាហារ និងការវេចខ្ចប់ជាដើម។
តាមការរំពឹងទុក របស់ការិយាល័យលើកកម្ពស់សហគ្រាសធុនតូច និងមធ្យម វិស័យ SME នឹងជំរុញដល់កំណើនសេដ្ឋកិច្ចថៃ នឹងកើនដល់ ១ទ្រីលានបាត ឬស្មើនឹងប្រមាណ ៣២ ពាន់លានដុល្លារអាមេរិក ជាមួយនឹងកំណើន ៥%។
តាមប្រភពព័ត៌មានក្នុងស្រុកថៃ បានឲ្យដឹងថា ប្រទេសថៃ មានសហគ្រាសធុនតូច និងមធ្យមចំនួន ៣លាន សហគ្រាស ដែលក្នុងនោះ រួមបញ្ចូលទាំងសហគ្រាសសហគមន៍ផងដែរ។
ក្នុងចំណោមនោះ មាន៧០ម៉ឺន សហគ្រាស បានចុះឈ្មោះ ស្ថិតក្រោមប្រព័ន្ធពន្ធសាជីវកម្ម ខណៈដែលជាង ២,៣លាន សហគ្រាសទៀត គឺជាក្រុមហ៊ុនខ្នាតតូចៗនៅឡើយ។
បើតាមការបញ្ជាក់ពី មន្ត្រីរាជរដ្ឋាភិបាលថៃ មានសហគ្រាសប្រមាណ ៣០ម៉ឺន ទៅ៤០ម៉ឺន សហគ្រាស ស្ថិតនៅក្រោមប្រព័ន្ធពន្ធរបស់ប្រទេសនេះ ហើយគេសង្កេតឃើញថា សហគ្រាសទាំងនោះ គឺមានការលូតលាស់ល្អ រឹងមាំគ្រប់គ្រាន់ក្នុងការដំណើរការអាជីវកម្មបានដោយខ្លួនឯង៕
None
