អភិបាលក្រុងលោក Chadchart Sittipunt បានបញ្ជាឱ្យជួសជុលផ្លូវសម្រាប់ប្រព័ន្ធរថយន្តក្រុងសាធារណៈល្បឿនលឿន ប្រវែង ១៦ គីឡូម៉ែត្រឡើងវិញ ដែលតភ្ជាប់តំបន់ Rama III ទៅ Saton និង Ratchapreuk។
លោកបានបន្តថា អភិបាលក្រុងបានពិនិត្យមើលគម្រោងនេះ ហើយបានរកឃើញថា គម្រោងនេះ គឺមិនមានអ្នកប្រើប្រាស់សេវាធ្វើដំណើរច្រើន ដូចអ្វីដែលបានគ្រោងទុកនោះទេ ដែលវា គឺនៅតែជាបន្ទុកផ្នែកហិរញ្ញវត្ថុសម្រាប់រដ្ឋ។
មែនទែនទៅ ការសិក្សានៃប្រព័ន្ធរថយន្តក្រុងសាធារណៈល្បឿនលឿនត្រូវបានគេព្យាករណ៍ថា នឹងមានអ្នកដំណើរប្រហែល ២ ម៉ឺន ៥ ពាន់នាក់ ទៅ ៣ម៉ឺននាក់ក្នុងមួយថ្ងៃជាមធ្យម។
ទោះយ៉ាងណា ចំនួនអ្នកដំណើរមុនពេលការរាតត្បាតនៃកូវីត១៩ មានចំនួនត្រឹមតែ ១ ម៉ឺន ៧ ពាន់នាក់ ទៅ ១ ម៉ឺន ៩ ពាន់នាក់ក្នុងមួយថ្ងៃជាមធ្យម ហើយចំនួននេះបានធ្លាក់ចុះមកត្រឹម ៦ពាន់នាក់ក្នុងអំឡុងពេលមានការផ្ទុះឡើងនៃជំងឺកូវីដ១៩។ បច្ចុប្បន្នសេវាកម្មនេះ បានបម្រើអ្នកដំណើរប្រហែល ៩ ពាន់ ទៅ ១ ម៉ឺននាក់ប៉ុណ្ណោះក្នុងមួយថ្ងៃ ខណៈបង់ថ្លៃសំបុត្រឡានក្រុងមួយជើងមានតម្លៃប្រែល ១៥០០ រៀល។
លោក Wisanu បាននិយាយថា រថយន្តក្រុងល្បឿនលឿនក៏ជួបប្រទះនឹងបញ្ហាសុវត្ថិភាពផ្លូវផងដែរ នៅពេលដែលរថយន្តផ្សេងទៀតប្រើប្រាស់ផ្លូវល្បឿនលឿន ខណៈមានមនុស្ស២នាក់បានស្លាប់បាត់បង់ជីវិតក្នុងគ្រោះថ្នាក់ចរាចរណ៍កាលពីពេលថ្មីៗនេះ។
អត្ថបទគួរអាន
លោក Wisanu ក៏បានគូសបញ្ចាក់ថា អភិបាលក្រុងបាងកកបានប្រាប់ការិយាល័យចរាចរណ៍ និង ដឹកជញ្ជូន និង ក្រុមហ៊ុន Krungthep Thanakom Co ដែលជាអង្គភាពអាជីវកម្មគ្របគ្រងដោយរដ្ឋបាលក្រុងបាងកកឱ្យត្រួតពិនិត្យមើលគម្រោងរថយន្តក្រុងសាធារណៈល្បឿនលឿនឡើងវិញ និង ត្រួតពិនិត្យមើលកិច្ចសន្យាដែលជិតផុតកំណត់នៅថ្ងៃទី ៣១ ខែ សីហា ឆ្នាំ ២០២៣។
គួរជម្រាបថា សេវាកម្មរថយន្តក្រុងសាធារណៈល្បឿនលឿនដែលមានតម្លៃជាង៥០លានដុល្លារនេះ គឺត្រូវបានសាងសង់ឡើង កាលពីឆ្នាំ២០១៧ ដើម្បីជួយបន្ថយការកកស្ទះចរាចរណ៍ក្នុងទីក្រុងបាងកក៕
